Read Te B'aib'ara 1.I-Korinto 12 Bible Online

1.I-Korinto 12 - Te B'aib'ara bible

1.I-Korinto 12

¹Taari, I aki tangiringkami b'a kam na aki atai aroni b'aai n tituaraoi ake mairoun te Tamnei are Raoiroi.

²Kam ataingkami b'a ngke beekan ngkami ngkoa, ao kam kairaki nakoni bouannanti aika aki kona n taetae.

³Ma ngaia ae I kaotia nako imi, b'a bon akea ae kairaki iroun Tamnein te Atua, ae e kangai, “Ke e reke kain Iesu!” Ao akea ae kona ni kangai, “Te UEA Iesu”, ma ti ngkana e kairaki iroun te Tamnei are Raoiroi.

⁴Ao a bati aekani b'aai n tituaraoi, ma ti temanna te Tamnei are Raoiroi are anga;

⁵Ao a bati aron nakoa, ma ti temanna te UEA ae e m'akuri te aba i bukina.

⁶Ao a bati aaro ni m'akuri, ma ti temanna te Atua, ae m'akuri i nanoia aomata ni kabaneia ao E buokiia ni b'aai ni kabane aika a karaoi.

⁷Ao a anganaki aomata nako te bae E karaoia te Tamnei are Raoiroi b'a e na noraki b'a e bongana.

⁸B'a e anganaki temanna ana m'akuri iroun te Tamnei are Raoiroi b'a te tia taekina te rabakau, ao temanna b'a te tia taekina te atatai, iroun naba te Tamnei are Raoiroi aei.

⁹Ao e anganaki temanna te onimaki, iroun te Tamnei are Raoiroi naba aei; ao temanna b'aai n tituaraoi i bukini katokan aoraki,

¹⁰ao e anganaki temanna karaoani m'akuri aika kamimii. Ao tabeman b'a burabeti, ao tabeman te kona ni kinaa Tamnein te Atua ngkana e kaoti.[32] Ao tabeman te kona n taetae n taetae aika aki ataaki nanoia, ao tabeman te kona ni kab'arab'arai nanoia.

¹¹Bon te Tamnei are Raoiroi naba aei ae ti temanna ae karaoi baikai ni kabane, n tib'atib'ai nakoia aomata n tatabemaniia nako n ai aron nanona.

¹²Kristo ai aron te rab'ata ae ti teuana, ae a bati b'aina; ma e boni ngae ni bati b'aina, ma bon te rab'ata ae ti teuana.

¹³B'a ti bane ni b'abetitoaki nako nanon te rab'ata ae ti teuana iroun te Tamnei are Raoiroi ae ti temanna, ngaira aika I-Iutaia ma I-Erene, ma tooro ma inaomata; ao a bane n anganaki nanora te Tamnei are Raoiroi ae ti temanna.

¹⁴B'a tiaki ti teuana b'ain te rab'ata, ma a bati b'aina.

¹⁵Ngkana tao e kangai te wae, “Ngkai tiaki te bai ngai, ao tiaki b'ain te rab'ata ngai,” ao tiaki nanona b'a e a riki naba iai b'a tiaki b'ain te rab'ata.

¹⁶Ao ngkana tao e kangai te taninga, “Ngkai tiaki te mata ngai, ao tiaki bain te rab'ata ngai,” ao tiaki nanona b'a e a riki naba iai b'a tiaki b'ain te rab'ata.

¹⁷Ngkana arona b'a te mata te rab'ata ni kabanea, ao e nga te ongo? Ao ngkana te taninga te rab'ata ni kabanea, ao e nga te aroboi?

¹⁸Ma E a tia te Atua ni kabane b'ain te rab'ata n tatabeua nako ni kaki n te rab'ata, n ai aron nanona.

¹⁹Ao ngkana arona b'a a bane b'ain te rab'ata n riki b'a b'aina ae ti teuana, ao e nga te rab'ata?

²⁰Ma n arona ae ngkai: a bati b'aina, ma te rab'ata bon ti teuana.

²¹Ao e aki kona ni kangai te mata nakon te bai, “I aki kainanoiko!” ke te atu nakon te wae ni kangai, “I aki kainanoingkami!”

²²Ma moan te kai te nano ngkana akea b'ain te rab'ata aika atongaki b'a a mamara riki;

²³ao ti kabatiai riki karineani b'ain te rab'ata aika ti taku b'a a mangori, ao a m'aiti riki aron tararuani b'ain rab'atara aika aki tau n te noraki;

²⁴arora aikai, a aki kainanoaki i bukini b'ain te rab'ata aika a tau aroia n te noraki. Ma te Atua E a tia ni karaoa te rab'ata n te aro are e na iai riki karineani b'aina are akea karineana,

²⁵b'a e kawa n riki te bwenaua n te rab'ata, ma a na i akoakoi b'ain nako te rab'ata n te aro ae ti te arona nako ia n tatabeua nako.

²⁶Ngkana e maraki b'ain te rab'ata teuana, ao a bane naba ni maraki b'ain nako te rab'ata ma ngaia; ao ngkana e karineaki b'ain te rab'ata teuana, ao a bane b'ain nako te rab'ata ni kim'areirei ma ngaia.

²⁷Rab'atani Kristo ngkami, ao b'ain rab'atana ngkami n tatabemaningkami.

²⁸Ao E a tia te Atua ni kateia tem'angina i nanon te ekaretia: taan tuatua moa; te kauoua, burabeti; te katenua, taan reirei; ao i mwiia, taani karaoi m'akuri aika kamimii; ao i mwiia, te koraki aika anganaki te b'ai n tituaraoi i bukini katokan aoraki; ma taani buobuoki, ma taani kairiri, ma taan taetae n taetae aika a aki ataaki nanoia.

²⁹Taan tuatua aomata ni kabaneia? Burabeti aomata ni kabaneia? Taan reirei aomata ni kabaneia? Taani karaoi m'akuri aika kamimii aomata ni kabaneia?

³⁰Iai irouia aomata nako b'aai n tituaraoi i bukini katokan aoraki? A bane aomata nako n taetae n taetae nako aika a aki ataaki nanoia, ao a kona ni kab'arai nanoia?

³¹Ma kam na tangiri riki b'aai n tituaraoi aika moa ni kakannato.