Read Te B'aib'ara 1.I-Korinto 2 Bible Online

1.I-Korinto 2 - Te B'aib'ara bible

1.I-Korinto 2

¹Ao ngai, taari, ngke I roko i roumi n taekina te baere raba[3] are mairoun te Atua, ao I aki kamanenai taeka aika N na atongaki iai b'a iai i rou te rabakau n taetae ma te ataib'ai.

²B'a e reke nanou ngke I mena i buakomi b'a akea riki te bae N na taekinna b'a ti Iesu Kristo, te Kristo are mate n te kaibangaki.

³Ma ngaia are ngke I roko i roumi, ao I mamara ma n rurubenebene ni maaku.

⁴Ngke I taetae ma ngkami, ao ngke I taekina te euangkerio, ao I aki kani kaotai b'a aongkoa I rabakau n taetae; ma I angan Tamnein te Atua b'a E na kaota m'aakana.

⁵N te aro anne, ao e a reke i roumi iai te onimaki ni m'aakan te Atua, ma tiaki n rabakaun te aomata.

⁶Ma ti kabongana te taeka n rabakau i buakoia aomata aika ikawai n aia onimaki; ma tiaki rabakaun aon te aba ke rabakauia taan tautaeka i aonnaba, aika te koraki aika nangi mauna mataia.

⁷Ti taekina rabakaun te Atua ae akea temanna ae ata arona, are te rabakau ae raba, are E a tia ni motika taekana te Atua, i m'ain rikin aonnaba, b'a E na karekea iai arora n neboaki.

⁸Akea irouia taan tautaeka n te aonnaba aei ae ata te rabakau aei. B'a ngke a ataia, ao a na bon aki kamatea n te kaibangaki te UEA, are ana b'ai te neboaki.

⁹Ma e a tia taekana n ai aron are koreaki ni kangai: [4] “Baike e tuai n nori te mata, ao e tuai n ongo te taninga, ao e tuai n reke n ana iango te aomata, boni ngaai baike E katauraoi te Atua i bukiia ake a tangiria!”

¹⁰E a tia ni kaotii te Atua nako ira iroun Tamneina. B'a akea te b'ai teuana ae E aki ata arona te Tamnei, ao E atai naba ana kaantaninga te Atua aika nano.

¹¹B'a antai i buakoia aomata ae ata te aomata n arona ni kabane? Bon ti tamnein te aomata ae i nanona. Ao ai arona naba, b'a akea ae ata aron te Atua ni kabane b'a bon ti Tamnein te Atua.

¹²Ao ngaira ti aki anganaki te tamnei ae b'ain aon te aba, [5] ma ti anganaki te Tamnei are mairoun te Atua, b'a ti na atai ana b'ai n tituaraoi te Atua nako ira.

¹³Ma ngaia ae ti na aki kabonganai taeka aika ti karekei man te rabakau n aomata ngkana ti taetae, ma ti na kabonganai taeka aika ti reireiaki iai iroun te Tamnei ngkana ti kab'arab'arai ana koaua te Atua nakoia ake iai Tamnein te Atua i rouia.

¹⁴Te aomata ae akea Tamnein te Atua i rouna e aki kona ni butim'aai b'aai ake ana b'ai Tamnein te Atua, b'a e taku n ana iango b'a b'aai n nanobaba; ao e aki kona n atai aroia ma bukiia i bukina b'a akea Tamnein te Atua i rouna.

¹⁵Ane E memena i rouna Tamnein te Atua, ao e kona neneri aroni b'aai nako b'a a bongana ke a aki; ma akea ae e kona n nenera arona;

¹⁶n aron are koreaki ni kangai: “B'a antai ae ata nanon te UEA, b'a e na reireia?” Ma bon iai i roura i nanoni Kristo.