Read Te B'aib'ara I-Karatia 4 Bible Online

I-Karatia 4 - Te B'aib'ara bible

I-Karatia 4

¹Ma I kan taekinna naba b'a i nanon ana tai n ataei te nati are na b'aib'ai i mwin tamana, ao e aki kakaokoro ma te toro, e boni ngae ngke ngaia ae na b'aini b'aai ni kabane.

²Ma e mena i aaia te koraki aika tararuaia ma n tau mwin ana b'ai ni karokoa te tai are e a tia ni baireia tamana.

³Ao ai arora naba, ngke ataei ngaira, ao ti toronaki ni baika iai m'aakaia n te aonnaba aei.

⁴Ma ngke e a koro raoi taina, ao te Atua E kanakoa Natina. E bungiaki iroun te aine, ao E mena i aan te Tua,

⁵b'a E aonga ni kainaomataia aika mena i aan te Tua, b'a ti aonga n riki b'a natin te Atua.

⁶Ao ngkai naati ngkami, ao te Atua E kanakoa Tamnein Natina nako nanora, are E tataro ni kaangai, “Aaba, Tamara.”

⁷Ma ngaia ae ko a aki manga riki b'a te toro ngkoe, ma ai te nati; ao ngkana te nati, ao te tia b'aib'ai naba iroun te Atua.

⁸Ma kam aki ata te Atua ngkekei, ao kam toro irouia baika iai m'akaia aika tiaki atua;

⁹ma ngkai kam a ata te Atua, ke ngkai kam a ataaki iroun te Atua, ao kam kanga ni manga rairaki nakoni baike iai m'aakaia ake a mamara ma n akea bonganaia, ake kam kani manga moana aromi n toronaki iai?

¹⁰Kam kawakini boong, ma taian nam'akaina, ma tain nako taian toa, ma ririki.

¹¹I maaku[7] iroumi, b'a e kaawa ni matebuaka au m'akuri i bukimi.

¹²Taari, I butingkami b'a kam na riki n arou, ngkai I riki naba n aromi. Akea te bae e buakaka ae kam a tia ni karaoia nako iu;

¹³ma kam ataia b'a I taekina te euangkerio nakoimi n te moa n tai, b'a kioina ngke e mamara rab'atau.

¹⁴E riki mamarau b'a te kangaanga nakoimi, ma kam aki kaota ae kam kakeaa bongana ke kam ribaia; ma kam m'aneai n akoai b'a kanga ai aron ana anera te Atua ngai, ao b'a kanga ai aroni Kristo Iesu.

¹⁵E nga ngkoa kukureimi? I boni koaua b'a kam na kaman tia n auti kanoani matami n anganai, ngke arona b'a kam kona.

¹⁶I a riki ngkai b'a ami kairiribai ngkai I taekina te koaua nakoimi?

¹⁷A tauaninne aomata akanne iroumi, ma tiaki n te aro ae e raoiroi; ma a kani kaokoroingkami,

¹⁸b'a kam aonga n tauaninne i rouia. E raoiroi te tauaninne n taai nako n te bae e raoiroi, ao tiaki ti ngkana I mena iroumi.

¹⁹Natiu aika uarereke, ai aron te aine ngai n ana tai ni bung, ae I ngirangira ni maraki i bukimi ni karokoa ae kam riki b'a taan ira Kristo ngkami.

²⁰Tera ngke I mena iroumi ngkai, b'a I aonga n ae I bita teini b'anaau; b'a I aki ata te bae N na karaoia nakoimi.

²¹Kam na tuangai, ngkami aika kam kani mena i aan te Tua, kam aki ataia b'a tera ae e taekinna te Tua[8]

²²B'a e kaangai, b'a uoman natin Aberaam aika mm'aane, temanna natina ma te aine ae te toro, ao temanna ma te aine ae te inaomata.

²³Teuare natin te aine are te toro e bungiaki n aroni bungiakiia aomata; ma teuare natin te aine are te inaomata e riki b'a kakoroan nanon te taeka n akoi.

²⁴Taetae ni kabotau baikai, b'a a boraraoi aika uoua nakekei: neiere bungiia natina b'a te toro bon Nei Aka, ao e tei i bukin te boraraoi are karaoaki n te maunga are Tinai.

²⁵Aka[9] bon te maunga are Tinai i Arabia, ao bon te banna ni kabotau naba i bukin Ierutarem ae ngkai, n arona n toronaki ma kaaina ni kabaneia.

²⁶Ma te Ierutarem are i Karawa e inaomata, ao bon tinara.

²⁷B'a e koreaki ae kaangai: “Ko na kukurei ngkoe ae ko kanoabo ae ko tuai ni bung; Ko na takarua ni kim'areirei ngkoe ae ko tuai n ariri; B'a a bati riki natin te aine ae tiku n ti ngaia nakoni m'aitiia natin neiere iai buna.”

²⁸Taari, natin te taeka n akoi ngaira, n ai aron Itaaka.

²⁹Ma n aron are ngkekei, ngke e b'ainikirinaki teuare bungiaki n aron nanon te Tamnei iroun teuare bungiaki n aron bungiakiia aomata, ao ai bon arona naba ngkai.

³⁰Ma e kanga te B'aib'ara? “Kanakoa te toro te aine ma natina; b'a e na bon aki b'aib'ai natin te aine are te toro ma natin te aine are te inaomata.”

³¹Ma ngaia aei, taari, tiaki ngaira natin te aine are te toro, ma bon natin te aine are te inaomata.