Read Te B'aib'ara I-Karatia 6 Bible Online

I-Karatia 6 - Te B'aib'ara bible

I-Karatia 6

¹Taari, ngkana e bure te aomata temanna,[12] ao ngkami akana kam kairaki iroun te Tamnei, kam na manga kaetia n te nano ae nimamanei; ma ko na tarataraiko, b'a ko kaawa ni manga kaririaki naba ngkoe.

²Kam na i buobuoki n uotami nako, ao kam na toua mwin ana tua Kristo iai.

³B'a ngkana e taku temanna n ana iango b'a e kakannato, ngke e bon aki, ao e burebureia.

⁴Ma a na kataa oin aia m'akuri aomata n tatabemaniia nako b'a a uara, ao ane e na kamoamoa te aomata i nanona n ti ngaia n are e a tia ni karaoia. E na aki kabotaua are e karaoia ma are e karaoia temanna.

⁵B'a a na bon uoti oin uotaia aomata n tatabemaniia nako.

⁶Ao ane reireiaki ana taeka te Atua e na buokanib'ai ni baika raraoi ma te tia reirei.

⁷Kam na tai burebureaki; E aki konaaki ni m'am'anaki te Atua: b'a te bae e unikia te aomata, ao e na manga anaa naba uaana.

⁸B'a ane ira nanon rab'atana ao e na anaa mwina ae te mate man te rab'ata; ao ane ira nanon te Tamnei are Raoiroi, ao e na anaa mwina ae te maiu are aki toki mairoun te Tamnei are Raoiroi.

⁹Ma a na tai toki nanora ni kakaraoa ae e raoiroi, b'a ti a bon tai anai mwin ara m'akuri n te tai ae riai, ngkana a aki b'ara nanora.

¹⁰Ma ngaia ae ti na kakaraoa ae e raoiroi nakoia aomata ni kabaneia, n aron ae ti kona, ao ai moara riki nakoia kaain te utu n onimaki.

¹¹Nori manin au koroboki aika I koroi n oini baiu b'a ai buuburara!

¹²A i manonoingkami te koraki akana kani bakantamaroa n aron te maiu n rab'ata b'a kam na korotabonim'aneaki; b'a ti i bukin aei, b'a a aonga n aki b'ainikirinaki i bukin tataekinan ana kaibangaki Kristo.

¹³B'a a aki toua naba mwin te Tua te koraki ake a korotabonim'aneaki; ma a tangiringkami b'a kam na korotabonim'aneaki, b'a a aonga ni kamoamoaia n aromi ni kariaia.

¹⁴Ma ngai, I bon aki kani kamoamoaai n te b'ai teuana, ma ti n ana kaibangaki ara UEA are Iesu Kristo; b'a n ana kaibangaki ao ai aron ae mate te aonnaba nako iu, ao ngai nakon te aonnaba.

¹⁵B'a e aki kakawaki te korotabonim'aneaki ke te aki-korotabonim'aneaki, ma e kakawaki reken te maiu ae boou ni maiun te aomata.

¹⁶E na mena i aoia akana e reke i rouia te aro aei te rau ma te nanoangaki, ao i aoia naba ana Iteraera[13] te Atua.

¹⁷Kabanean au taeka: Akea ae na kariki baika N na aki rau iai; b'a I uoti mwin kain te UEA are Iesu n rab'atau.

¹⁸E na mena ana akoi ara UEA are Iesu Kristo irouia tamneimi, taari. Amen.