Read Te B'aib'ara I-Ebeto 6 Bible Online

I-Ebeto 6 - Te B'aib'ara bible

I-Ebeto 6

¹Ataei, ngkai kam reitaki ma te UEA;[15] ao kam na ongotaeka irouia ami karo, b'a e riai aei.

²“Ko na karinea tamam ma tinam” bon aei te moa n tua ae raonaki n te taeka n akoi ae kaangai:

³“b'a ko aonga ni kab'aia, ao e aonga ni maan am tai ni maiu i aon te aba.”[16]

⁴Ao ngkami taama, tai kauniia natimi: ma kam na tongaiia ma ni kairiia i aan te reireiaki ma te tuatuangaki aroia aika riai n ai aron nanon te UEA.

⁵Ao ngkami tooro, kam na ongotaeka irouia ami toka aika aomata, n ruru ni maku, ao karaoia ma te nano ni koaua, n ai aromi n ongotaeka irouni Kristo.

⁶Kam na karaoia tiaki i bukina ngke kam kani kakukureia ngke a taraingkami; ma kam na karaoia n ai aroia ana toro Kristo aika karaoa nanon te Atua ma nanoia ni koaua.

⁷Kam na karaoa ami m'akuri n toro ma te nanoraoi, b'a kanga ai aron ae kam toro iroun te UEA ma tiaki irouia aomata.

⁸Kam bon ataia b'a e na reke nakon temanna ma temanna boona mairoun te UEA n te m'akuri ae e raoiroi are e karaoia, n aki warekaki b'a te toro ngaia ke te inaomata.

⁹Ao ngkami tooka, kam na karaoi baikai naba nakoia, ao tai kakamakuia; ngkai kam ata aia Toka, are ami Toka naba, b'a E mena i karawa, ao akea ae E nanoniia irouia aomata.

¹⁰Te kabanea: kam na korakora i nanon te UEA, ao ni korakorani m'aakana.

¹¹Kam na karini b'aini buaka nako ake mairoun te Atua aika b'aini kamanoan rab'atami, b'a kam aonga ni kona n tei ni kaitarai aron te riaboro ni wanawana aika bureburea te aba.

¹²B'a ti aki buaka ma aomata, ma ti buaka ma uea, ma ake a korakora, ma taan tauu taekan aonnaba aika taan taua aron te roo aei, ma taian tamnei aika buakaka ake i aani karawa.

¹³Ma ngaia ae kam na karini b'aini kamanoan rab'atami ake mairoun te Atua, b'a kam aonga ni kona n tei ni kaitaraia n te bong ae buakaka; ao ngkana kam a tia ni karaoi b'aai ni kabane, ao kam na bon aki konaaki.

¹⁴Ma ngaia ae kam na tei, ao kam na kabae nuukami n te koaua, ao kam na katokaa te tanga are karaoan nanon te Atua,

¹⁵ao kauniwaeningkami n te tauraoi n taekina euangkerion te raoi.

¹⁶Kam na uouota n taai nako te otanga are te onimaki, are kam kona iai ni kabane n tiring taian ai ake a ura i tabon ana kai ni bakarere teuare buakaka.

¹⁷Ao kam na uouota naba te barengaru are te maiu, ma ana kabaang te Tamnei, ae ana taeka te Atua.

¹⁸Ao kam na tataro n aki toki n taian tataro ni kabane ma bubuti, n ai aroni kairami iroun te Tamnei; ao kam na kamarurungngkami nako iai, ma n aki b'ara n nano, ni bubuti i bukiia ake a itiaki ni kabaneia,

¹⁹ao i buku naba; b'a I aonga n anganaki te taetae, b'a N na kaurea wiiu n aki mamaku, ni kaota te baere raba are n te euangkerio,

²⁰are te tia taetae ngai i bukina ae I kabaeaki iai n te taurekereke; b'a I aonga n taekinna n aki mamaku, n te aro ae riai b'a N na taekinna iai.

²¹ Tukiko, ae te tari ae tangiraki, ae te tia m'akuri ae kakaonimaki i bukin te UEA, e na kaongoraingkami b'aai ni kabane, b'a kam aonga naba n atai taekau ma arou b'a I uara:

²²b'a anne bukin ae I kanakoa iai nakoimi, b'a kam na atai arora, ao e na karau nanomi.

²³E bia reke te rau, ma te tangira, ma te onimaki irouia taari mairoun te Atua are te Tama ma te UEA are Iesu Kristo.

²⁴E na mena te akoaki irouia aomata ni kabaneia ake a tangira ara UEA are Iesu Kristo n te tangira ae akea tokina.