Read Te B'aib'ara 1.I-Tetaronike 3 Bible Online

1.I-Tetaronike 3 - Te B'aib'ara bible

1.I-Tetaronike 3

¹Ma ngaia arei, ngke ti aki kona ni kamaniira riki n taon nanora, ao ti a kukurei b'a ti na kitanaki i Atenai n ti ngaira;

²ao ti kanakoa Timoteo, ae tarira, ae raora ni m'akuri i bukin te Atua, n tataekinan euangkerioni Kristo, b'a e na kateimatoaingkami ma ni kaungaingkami n ami onimaki;

³b'a e na tai riki n aki rau nanon temanna n taian rawawata aikai. B'a kam bon ataia b'a boni katauara b'a ti na ri nanon te rawawata.

⁴B'a ngke ti mena i roumi, ao ti tuangngkami b'a ti na karawawataki. Ti taekina aei i m'ain rikina; ao n aron ae kam ataia, b'a e bon riki.

⁵Ma ngaia arei, ngke I aki kona ni kamaanai riki n taona nanou, ao I kanakoa Timoteo nako imi b'a I aonga n ata aron ami onimaki; b'a I raraoma ngkana tao kam a tia ni kairaki iroun te tia kariri, ao a matebuaka ara m'akuri.

⁶Ma ngkae e a roko Timoteo i roura i mwin okina mai roumi, ao e kaongoraeira n taeka aika raraoi aika taekan ami onimaki ma ami tangira; ao e tuangiira naba b'a kam aki toki n ururingiira ma te kukurei, ao kam rangi ni kan norira, n ai arora naba ngkai ti rangi ni kan noringkami.

⁷Ma ngaia aei, taari, i buakoni kain nanora ma rawawatara ni bane ao a karauaki nanora i roumi n ami onimaki:

⁸b'a e a manga karekea te maiu ae boou nako ira aromi n teimatoa n reitaki ma te Uea.

⁹B'a tera katituaraoan te Atua ae ti kona n anganna i bukimi, i bukin te kim'areirei ni kabanea ae ti kim'areirei iai i bukimi i matan te Atua?

¹⁰Ti tataro ni bubuti ma nanora n te ngaina ao n te bong b'a ti na nori matami, ma ni karokoraoa ae aki roko raoi n ami onimaki.

¹¹E na kairira nako imi te Atua ae Tamara ma ara Uea are Iesu;

¹²ao te Uea E na kabatia ni karakaa ami i-tangitangiri ma tangiraia aomata ni kabaneia i roumi, n ai aron arora nako imi;

¹³b'a E na kateimatoai nanomi, b'a a aonga n itiaki ma n akea kabuakakakiia i matan Atuara ae Tamara, ngkana E roko ara Uea are Iesu[4] ma ana aomata aika itiaki ni kabaneia.