Read Te B'aib'ara 1.I-Tetaronike 4 Bible Online

1.I-Tetaronike 4 - Te B'aib'ara bible

1.I-Tetaronike 4

¹Te kabanea ngkanne: taari, ti butingkami ma ni kaungaingkami iroun te Uea are Iesu, b'a ngkai kam a tia n reirei mai roura aromi ni maiu ae riai ae kakukureia te Atua, n aron ae kam b'ainna ngkai ni maiumi, ao kam na kabatia riki karaoana ni maiumi.

²Kam bon atai taian tua ake ti anganingkami ake mairoun te Uea are Iesu.

³B'a aio nanon te Atua i bukini katabuani maiumi b'a ana b'ai: kam na rawa nakon te wene ni bure;

⁴kam na atai aromi ngkami mm'aane n tatabemaningkami nako, ni maeka ma buumi[5] n te aro ae itiaki ao n te aro ni karinerine,

⁵ma tiaki n te aro ni kaitataan ni kaib'ab'aru n ai aron ae noraki irouia aomata aika tiaki I-Iutaia aika aki ata te Atua.

⁶E na aki bure temanna nakon raona ke ni babakanikawaia ni baika kaeti ma aron te mm'aane nakon te aine[6] b'a te Uea boni Ngaia te tia kareke-kai i bukini baikai ni kabane, n ai aron are ti tuangngkami rimoa, ma ni kaotiotia naba.

⁷B'a E aki weteira te Atua nakon te maiu ni kammaira, ma E weteira b'a ti na b'aina te maiu ae itiaki.

⁸Ma ngaia are te aomata ae rawa nakon te taeka n reirei aei, ao e aki rawa nakon te aomata, ma e rawa nakon te Atua, are anganingkami Tamneina are Raoiroi.

⁹Akea kainanoan te koroboki nako imi i bukin aromi n tangiriia raomi ni Kristian: b'a kam a bon tia n reireiaki iroun te Atua b'a kam na i tangitangiri;

¹⁰b'a kam bon tangiriia taari ni kabaneia ake a mena i M'aketonia ni kabuta. Ma ti kaungaingkami, taari, b'a kam na kabatia riki karaoana.

¹¹Kam na kataa ae kam kona b'a kam na rau, ao kam na karaoi oin tabemi; kam na m'akuri ni baimi, n ai aron are ti tuangngkami.

¹²Ao n te aro aei kam na kamoamoaki iai irouia aomata ake tiaki kaain te ekaretia, ao a na akea te bae kam na kainanoia.

¹³Ti aki tangiringkami taari, b'a kam na aki atai aroia aika mate, b'a kam aonga n aki nanokawaki, n ai aroia tabem'aang akana akea aia kaantaninga.

¹⁴B'a ngkana ti kakoaua b'a E mate Iesu ao E a manga uti, ao ti boni kakoaua naba b'a te Atua E na kairiia b'a raon Iesu te koraki ni kabaneia ake a tia ni mate ake a onimakina Iesu.

¹⁵B'a ae ti tuangngkami aei bon ana taeka te Uea: ngaira aika ti maiu aika ti tiku ni karokoa rokon te Uea ti na bon aki nako n rimoaia ake a tia ni mate.

¹⁶B'a ane E na ruo te Uea mai karawa ma te b'anaa ae takarua n taetae, ma b'anaan te anera ae kakannato, ma tangin ana bu te Atua. Ao a na manga uti moa ake a mate ake a onimakina Kristo,

¹⁷ao ngaira aika ti maiu n te tai anne ti na uotaki rake ma ngaiia nakon te tabo are a mena iai naang, ao ti na kaitibo ma te Uea i aani karawa; ao n te aro aei ti na memena n taai nako iroun te Uea.

¹⁸Ma ngaia ae kam na karau nanomi n taeka aikai.