Read Te B'aib'ara 1.I-Tetaronike 5 Bible Online

1.I-Tetaronike 5 - Te B'aib'ara bible

1.I-Tetaronike 5

¹Kam aki kainanoa koreakin taekan taai ma boong aika a na riki iai baikai.

²B'a kam bon ata ana bong te Uea, b'a e na roko n ai aron rokon te tia iraa n te bong.

³Ngkana a kangai aomata, “E a rau te aba ao akea te kakiriwe,” ao ane e na roko ni karina te kabuanib'ai nako ia, kanga ai aron rokon te ariri ni maraki iroun te aine ae nangi bung; ao a na bon aki kona ni kamaiuia maiai.

⁴Ma ngkami, taari, kam aki mena i nanon te roo; ma ngaia ae e na aki kakubanakoingkami te bong arei n ai aron te tia ira;

⁵b'a natin te oota ngkami ni kabaneingkami, ao natin naba te ngaina. Tiaki ana b'ai te bong ma te roo ngaira.

⁶Ma ngaia ae ti na tai nimatutuu n ai aroia tabem'aang; ma ti na kauti matara, ao ti na kamarurungira.

⁷B'a a matu aomata n te bong, ao a manging n te bong naba.

⁸Ma ngaira, aika ana b'ai te ngaina, ti na tauu baangira; ti na karina te tanga are te onimaki ma te tangira, ao te barengaru are kaantaningan te maiu.

⁹B'a tiaki ana kaantaninga te Atua b'a E na kareke kaira, ma ana kaantaninga b'a ti na karekea te maiu iroun ara Uea are Iesu Kristo,

¹⁰are mate i bukira, b'a ti na uaia ni maiu ma Ngaia ngkana tao ti maiu ke ti mate.

¹¹Ma ngaia ae kam na i karau nanomi, ao kam na i kateimatoaingkami, n ai aron ae kam kakaraoia.

¹²Ma ti butingkami, taari, b'a kam na ataiia akana kakorakoraia ni m'am'akuri i buakomi, akana kairingkami ma n reireingkami n aromi ni maiu n reitaki ma te Uea.

¹³Kam na anganiia karineaia ae bati ma tangiraia i bukin aia m'akuri. Kam na b'aina te raoi i buakomi.

¹⁴Ao ti kaungaingkami, taari, b'a kam na reireiia akana rawa ni m'akuri, kam na kaungai nanoia akana a kai toki nanoia, kam na buokiia akana mamara, ao kam na taotaon nanomi nakoia aomata ni kabaneia.

¹⁵Kam na taraia b'a akea temanna ae na karaoa ae buakaka nakon temanna i bukina ngke te aomata arei e a tia ni karaoa ae buakaka nako ina; ma kam na ukoukora ae raoiroi i bukimi n taai nako, ao i bukiia naba aomata ni kabaneia.

¹⁶Kam na kim'areirei n taai nako,

¹⁷ao tataro n taai nako,

¹⁸kam na katituaraoi ni b'aai ni kabane. B'a bon aei nanon te Atua i bukimi ngkai kam reitaki ma Kristo Iesu.

¹⁹Kam na tai tuka te Tamnei are Raoiroi;

²⁰kam na tai kakeai bonganan taetae ni burabeti;

²¹ma kam na katai b'aai ni kabane b'a ua ra; kam na taua ae raoiroi,

²²ao kam na rawa nakoni karaoan te buakaka ni kabane.

²³Ao Atuan te raoiroi E na karaoingkami b'a kam na riki n ai arona n aromi nako; ao a na kawakinaki tamneimi, ma maiumi, ma rab'atami, b'a a na aki konaki ni kabuakakaki i matan ara Uea are Iesu Kristo.

²⁴E kakaonimaki Teuare weteingkami, ao E na boni karaoia.

²⁵Taari, kam na tataro naba i bukira.

²⁶Kam na kamauriia taari ni kabaneia n ai aroia taari n inga.

²⁷I tuangngkami iroun te Uea b'a e na warekaki te reta aei nakoia taari ni kabaneia.

²⁸E na mena i roumi ana akoi ara Uea are Iesu Kristo.