Read Te B'aib'ara Iotua 13 Bible Online

Iotua 13 - Te B'aib'ara bible

Iotua 13

¹Ngke e a rangi ni kara Iotua ao E taetae te UEA nakoina ni kaangai, “Ko a rangi ni kara ao a m'aiti aaba ake a tuai man reke i roum.

²Aika abaia I-Biritia, ma Keturaite,

³ma abaia naba taian Awim nako maiaki, (aaba ake man te karaanga are Tiora, are n tian Aikubita, nako iaang nakon tian Ekiron e atongaki b'a abaia I-Kanaan; a maeka uean Biritia i Kata, i Atitota, i Atikeron, ao i Ekiron.)

⁴A tuai reke naba i roumi abaia te baronga are Kanaan, ma Meara (are a b'ainna aomatan Titon), ni karokoa Abeki,[43] are tian abaia taian Amoraite.

⁵A tuai reke naba abaia I-Keeb'ara, ma Reb'anon ni kabane ake i mainiku, ni moa mai B'aara-kata, are i maiakin te maunga are Oman nako kawain Amata.

⁶Ni ikotaki naba ma abaia I-Titon ake a tuai reke naba i roumi ake a maeka n aaba ake tabukibuki, i marenan maungan Reb'anon ma Metirebotamaim. N na bane ni kakioia nako aomata aikai mai i m'aaia aomatan Iteraera ngkana a roko ni buakaniia. Ko na tib'aa te aba i aoia aomatan Iteraera, n ai aron Au mwioko ngkoa nakoim.

⁷Ma ngaia ae ngkai, manga tib'aa te aba i marenaia ruaiwa te baronga, ao iteran te baronga are Manate b'a ai bon abaia.”

⁸A kaman tia n anganaki abaia te baronga are Reuben, ao Kaata, ao iteran te baronga are Manate n aaba ake i mainikun te karaanga are te Ioretan i roun Moote are ana toro te UEA.

⁹E roko tian abaia te baronga are Reuben i Aroera (i mataniwiin te m'arua are Aroera), ao te kaawa naba are i nukan te m'arua naba anne, ao ni kabane aaba ake a aoraoi mai Meteb'a nako Ribon.

¹⁰E waaki nako tian abaia ni karokoa tian abaia te baronga are Ammon, ma kaawa ni kabane ake a tautaekanaki ngkoa irouia uean Amora are Taion are uea i Etibon.

¹¹Ni ikotaki naba ma te baronga are Kireata, ma aban nako Keturi, ma Maakata, te maunga are Oman ni kabane, ma Batian ni kabane ni karokoa Tareka. [44]

¹²N ikotaki naba ma aban te uea are Oka, are nikiraia taian Rebaim, are a tautaekana Atitarota ao Eterei. A kaman taenikai aomatan aaba aikai i roun Moote, e kakioia nako.

¹³Ma e ngae n anne, ao a aki kona ni kakioia nako aomatan Keturi ma Maakata aomatan Iteraera ngaia are a kaai ni maeka ma ngaia ni karokoa boong aikai.

¹⁴Ao e aki karekea abaia te baronga are Rewi Moote b'a bon tuangana i roun te UEA, i bukina ngke bon iai tib'aia man taian karea nakon te UEA are Atuaia Iteraera.

¹⁵Ao Moote e anganiia abaia utuun te baronga are Reuben.

¹⁶Tian abaia mai maiaki bon te kaawa are i nukan te m'arua are Arenon, ma te kaawa are Aroera, are i mataniwiin te m'arua anne mai meang, ni karokoa aaba ake a aoraoi ake i meang i rarikin Meteb'a.

¹⁷E reke naba Etibon i nanon abaia, ma taian kaawa naba ake taabo ake a aoraoi ake: Ribon, ma Bamota-b'aara, ma Beta-b'aara-meon,

¹⁸ma Iaati, ma Ketemota, Meb'ata,

¹⁹ma Kiriataim, Tibema, ma Teretatiaa are i aon te tabuki n te m'arua,

²⁰ma Beta-beore, ma raabeen te maunga are Bitika, ao Beta-ietimota.

²¹A reke naba aaba ni kabane ake n taabo ake a booraoi i nanon abaia, ao aban uean Amoraite ni kabutaa are Taion are e maeka i Etibon. Ao Moote e kataenikaia Taion ma taan tautaeka i Mirian ake: Ewi, Rekem, Tura, Ura, ao Reba ake a tautaekani aaba i bukin te uea are Taion.

²²I buakoia aomata ake a tiringaki i rouia aomatan Iteraera bon te tia tabunea are B'araam natin Beora.

²³Tian abaia te baronga are Reuben mai maeao bon te Ioretan. Ao aikanne kaawa ake a anganaki kaaingan utuun te baronga are Reuben b'a abaia.

²⁴Ao Moote e anganiia utuun te baronga are Kata abaia n tatabemaniia nako.

²⁵A reke i nanon abaia te baronga are Kata kaawa aika: Iatera, ma kaawan Kireata ni kabane ma iteran abaia I-Ammon n toki i Aroera,[45] are i mainikun Raab'a,[46]

²⁶e waakinako naba tian abaia mai Etibon nako Ramata-mitibe ao Betonim, ao mai Maanaim nako tian Riteb'ara.[47]

²⁷Ao Kata e reke i rouna iteran te Ioretan are mai mainiku, are e tautaekanaki ngkoa i roun te uea are Taion, are maeka i Etibon. E biri nako iaang te aba aei n toki n namani Kariraia ao a reke i nanona kaawa aika: Beta-aram, Beta-nimra, Tukota ao Tabon.

²⁸Aikanne kaawa aika a buubura ma kaawa aika a uarereke ake a anganaki utuun te baronga are Kata b'a abaia.

²⁹Ao Moote e anganiia utuun iteran te baronga are Manate abaia n tatabeua nako.

³⁰A reke i nanon abaia utuun te baronga are Manate i mainiku n taabo aika: Maanaim, ao Batian ni kabane, are aban uean Oka, ao kaawa naba ake onobwi ake kaawan Iaira i Batian.

³¹Ao Moote e angan kaaingan iteran te baronga are Manate, ake kanoan Makira are natin Manate abaia are iteran Kireata ma kaawa aika Atiterota ma Eterei are atuun ana tautaeka te uea are Oka i Batian.

³²Ao anne aron Moote n tib'atib'ai aaba ake i mainikun Ieriko ao te Ioretan ngke e mena n te aba are aoraoi are Moaba.

³³Ma e aki anga te aba teuana Moote nakoia te baronga are Rewi, ma e tuangiia b'a ai tib'angaia naba taian karea nakon te UEA are Atuaia Iteraera.