Read Te B'aib'ara Iotua 17 Bible Online

Iotua 17 - Te B'aib'ara bible

Iotua 17

¹Mai buakon aaba ake i maeaon te Ioretan a bon anganaki tabeman man utuun nako ana kariki ana karimoa Ioteb'a te m'aane are Manate. Makira, are taman Kireata, ao bon ngaia temanna mai i buakoia tautia aika a rangin ninikoria, ngaia are e anganaki Kireata ao Batian, ake i mainikun te karaanga are te Ioretan b'a abana.

²Ao aaba ake i maeaon te karaanga are te Ioretan a bane n nakoia nikiran utuun te baronga are Manate: Abietera, Ereka, Atiriera, Tekem, Ebera, ao Temita. Bon aikai kanoan Manate are natin Ioteb'a, ao bon mataniwiin naba aia utu.

³Terobeata, are natin Ebera are natin Kireata, are natin Makira, are natin Manate, bon akea natina te m'aane, ma ti taian aine. Araia bon Mara, Nooa, Okera, Mireka, ao Tireta.

⁴A m'ananga n te taina natin Terobeata ake aine ni kawara Ereata are te ibonga, ma Iotua are natin Nuun, ma taan kairiri, ao a taku, “E taku ngkoa te UEA nakon Moote b'a ko na anganiira abara n ai aroia ara utu m'aane.” Ma ngaia are e kakoroa nanon ana taeka te UEA Iotua anne ao e karekei abaia natin Terobeata ake aine n ai aroia aia utu ake m'aane.

⁵Ao bon anne bukina ngkai tebwina aban te baronga are Manate n reitaki ma are i Kireata ao Batian i maeaon te karaanga are te Ioretan,

⁶e ngae ngke kanoana aika aine ma kanoana aika m'aane anganaki abaia. Te aba ae Kireata a bane n anganaki nako ia nikiran te baronga are Manate.

⁷Tian abaia te baronga are Manate mai Atera nako Mikemetata, mainikun te kaawa are Tekem. Ao te tia e a manga biri nako aiaki ni kariniia iai aomatan En-tabua.

⁸E ti b'aina te kaawa ae Tabua te baronga are Eberaim ma e b'aina te aba are i tinanikun Tabua ni kabane te baronga are Manate.

⁹E a manga biri rikaaki te tia nakon te karaanga are Kana. A b'ainaki kaawa ake a buubura ake i maiakin te karaanga i roun te baronga are Eberaim, e ngae ngke a reke ni m'akoron abaia te baronga are Manate. E biri ri meangin te karaanga tian te baronga are Manate ao e toki n taari are te Mereterenian.

¹⁰Te baronga are Eberaim mai maiaki ao te baronga are Manate mai meang, ao a uaia ni wairio n toki n taari are te Mereterenian. Tian te baronga are Manate mai meang maeao bon te baronga are Atera, ao mai meang mainiku bon te baronga are Itakara.

¹¹Ao e b'aini naba kaawa aika buubura te baronga are Manate ake i nanon m'akoron te baronga are Itakara ao te baronga are Atera, aika kaawa aika: Beta-tean, ao Ibeream ma kaawa naba aika a uarereke ake i rarikiia, ao ni ikotaki naba ma te kaawa are Tora (te kaawa are i rarikin taari),[61] Entora, Taanaka, Mekito, ao kaawa ake i rarikiia nako.

¹²Ma a aki konaa te baronga are Manate ni kataenikai kaawa aikai, ma ngaia are a bon tiku naba ni maeka aomatan Kanaan iai.

¹³Ma ngke e a korakora te botannaomata ae Iteraera rimwi riki, ao a bon teimatoa naba n aki kakioia nako aomatan Kanaan ni kabane ma a kam'akuriia b'a kaanga tooro.

¹⁴A kaangai ana kariki Ioteb'a [62] nakon Iotua, “Bukin tera ngkai ko anganiira abara ae ti teuana te m'akoro n aba? Ao nooria, E kakab'aiaira te Atua ao E kabatiai ara kariki, ma e rangi ni uarereke abara ae ko anganiira.”

¹⁵Ao e kaekaia Iotua ni kaangai, “Ngkana arona b'a kam a rangi ni m'aiti n aomata ao e aki tau nakoimi te aba are tabukibuki are i Eberaim,[63] ao kam na nako ni kaitiaka buakonikain abaia I-Beritaite ma taian Rebaim b'a abami.”

¹⁶Ao a manga kaeka ni kaangai, “Eng, e bon aki tau abara ake n aaba ake a tabukibuki b'a a maekana te tabo ae aoraoi I-Kanaan, ao a m'aiti aia kaa ni buaka aika biiti, ao ai aroia naba ake a maeka i Beta-tean, ao kaawa naba ake i rarikiia, ma ake a maekana te m'arua are Ietireera.”

¹⁷Ao e taku Iotua nakoia te baronga are Eberaim ao Manate maeao, “E bon koaua b'a a bon rangi ni m'aiti ami koraki, ao kam korakora, ao e na bon riai n reke riki abami.

¹⁸A na riki aaba ake a tabukibuki ni kabane b'a abami, e aoria ngke te buakonikai ma ko na kaitiakia ao ko na abanna mai tabona nako tabona. Ao i bukiia ngkanne aomatan Kanaan, kam na kakioia nako mai ikanne, e ngae ngkana a korakora ao a m'aiti aia kaa aika biiti.