Read Te B'aib'ara Iotua 18 Bible Online

Iotua 18 - Te B'aib'ara bible

Iotua 18

¹Ngke a tia aomatan Iteraera n taua te aba, ao a bane ni ikotaki i Tiro ao a katea ana Um'antabunrianna ni kaota memenana iai.

²Ai ti itiua riki barongan Iteraera ake a tuai man reke abaia.

³Ao e taku Iotua nakoia aomatan Iteraera, “Tao ana manra riki ngkami n tataninga i m'ain rinimi ao n anaa abami are E a tia te UEA are Atuaia ami bakatibu n anganingkami b'a abami?

⁴Kanakomaia kakateniman te m'aane man taian baronga nako. N na kanakoia b'a a na taraa aon te aba arei ni kabuta n aron are a tangiria b'a a na abanna, ao a na manga okirai.

⁵Ao a na tib'aa aonteaba nakon itiua te m'akoro. E na bon tiku Iuta n abana are i maiaki, ao e na tiku naba Ioteb'a n abana are i meang.

⁶Uotaamai rongorongon aonteaba ae kam a tia n tib'atib'aia nakon itiua te m'akoro, b'a n na kakaea nanon te UEA ni karaoa te katekeraoi i bukin tib'aakin abami i aomi.

⁷Ma e ngae n anne ao akea tib'aia tibun Rewi ae a na anganaki b'a abaia n ai aromi, i bukina ngke bon iai tib'aia are bon Ana ibonga te UEA ngaiia. Ao a bon tia naba n reke tib'aia te baronga are Kata, Reuben, ao Manate i mainiku, n aaba ake i mainikun te Ioretan n aron are e a tia ni karaoia ana toro te UEA are Moote nakoia.”

⁸Ao a nako m'aane akekei ni katarataraa abaia i mwiin anganakiia ana kaetieti Iotua are kaangai, “Kam na nako nakon te aba arei ao kam na taraa aona. Ao kam na manga okirai. Ao mai ikai i Tiro, n na tuanga te UEA b'a E na tib'a aonteaba nakoimi ni karaoa te katekeraoi i aomi.”

⁹Ma ngaia are a nako m'aane akekei n taraa aonteaba arei ni kabuta, ao n tib'aia nakon itiua te m'akoro. Ao a taui naba m'aitin kaawana ni kabane. Ao i mwiina a okira Iotua n te maeka i Tiro.

¹⁰Ao e karaoa te katekeraoi Iotua i bukin kakaean nanon te UEA i bukin tib'aakin te aba arei nakoia nikiraia aomatan Iteraera.

¹¹Te moan baronga are e moan reke abana n te katekeraoi bon te baronga are Beniamin. Ao e reke i rouia te aba are e mena i marenan te baronga are Iuta ma te baronga are Ioteb'a. [64]

¹²Ao e moa tian abaia mai meang man te Ioretan ao e a manga waerakea te karaabee are i meangin Ieriko ao ni manga wairio ri nanon aaba ake a tabukibuki ni karokoa rereuan Beta-awen.

¹³E a manga reitinako tian abaia nakon te karabee are i maiakin Ruti (arana teuana Betaera), ao e a manga ruorikaaki nako Atorata-ata are i aon te maunga are i maiakin Beta-oron i nano.

¹⁴Ao e a manga b'aoua nako aiaki mai maeaon te maunga anne ao e a manga nako Kiriata B'aara (ke Kiriata Iearim), are abaia te baronga are Iuta. Ao bon anne ngkanne tokiia mai maeao.

¹⁵E moa tiaia mai maiaki mai rarikin Kiriata Iearim, ao e nakon te koburake n ran are i Nebetoa.

¹⁶Ao e a manga biri rikaaki nako oin te maunga are e kaitaraa te m'arua are Innom, are i tabon te m'arua are Rebaim mai meang. E a manga nako aiaki n ri nanon te m'arua are Innom are i maiakin taberan maungan Iebuti ni kaineta rarikin Enrokera.

¹⁷E a manga b'aoua nako iaang nako Entemeti ni manga birinako Kerirota ni kaaitaraa kawain Arummim. E a manga ruorikaaki te tia nakon atiibun Boan (Boan bon natin Reuben te m'aane)

¹⁸ao e manga rimeangin taberani maunga ake a kaaitaraa m'aruan Ioretan. Ao e a manga ruo i nanon te m'arua,

¹⁹ao n rimeangin taberan maungan Betaokera, ao e toki n tabon Taari are Mate are mai meang are e rin mai iai ranin te karaanga are te Ioretan. Ao bon anne tiaia mai maiaki.

²⁰Tokiia mai mainiku bon te Ioretan. Ao ai anne ngkanne tian abaia utuun te baronga are Beniamin.

²¹Kaawa aika a buubura ake a reke i nanon abaia utuun te baronga are Beniamin bon Ieriko, Betaokera, Emeka Ketiti,

²²Beta Araba, Temaraim, Betaera,

²³Awim, Bara, Obera,

²⁴Kebaraammoni, Obeni, ao Keeb'a. Bon tebwi ma uoua bootan kaawa aikai, ao iai naba kaawa aika a uarereke i rarikiia.

²⁵Ao bon iai Kibeon, Raama, Beerota,

²⁶Mitibe, Kebira, Mota,

²⁷Rekem, Irebeera, Tarara,

²⁸Tera, Ereba, I-Iebuti (ke Ierutarem), Kibeata, ao Kiriata-iearim. Bon tebwi ma aua bootan kaawa aikai, ao bon iai naba kaawa aika a uarereke i rarikiia. Ao ai anne ngkanne te aba are a anganaki utuun te baronga are Beniamin b'a abaia i roun Iotua.