Read Te B'aib'ara Iotua 19 Bible Online

Iotua 19 - Te B'aib'ara bible

Iotua 19

¹Ao te kauoua ni baronga are e a manga reke abana n te katekeraoi bon te baronga are Timeon. E karekeaki abaia te baronga are Timeon mai i nuukan abaia te baronga are Iuta.

²Kaawa ake a reke i nanon abaia bon Beerateb'a, Teba, Morata,

³Ataratuara, Bara, Etem,

⁴Eretorata, Betura, Orema,

⁵Tikeraka, Beta-marekabota, Atata-tuta,

⁶Beta-rebaota, ao Tiaruen. Bon tebwi ma tenua bootan kaawa ake a reke i nanon abaia te baronga are Timeon, ao bon iai naba kaawa aika a uarereke i rarikiia.

⁷Aikai naba kaawa ake a reke i nanon abaia te baronga are Timeon: Ain, Rimmon, Etera, ao Atian. Bon aua bootan kaawa aikai, ao bon iai naba kaawa aika a uarereke i rarikiia.

⁸A reke naba kaawa aika a uarereke ake i rarikin kaawa aikai ni karokoa Baarata-beera (ke Rama), are i maiaki. Aio te aba are a anganaki utuun te baronga are Timeon b'a abaia.

⁹E karekeaki abaia te baronga are Timeon man abaia te baronga are Iuta, i bukina ngke e bon rangi ni buubura aban te baronga are Iuta.

¹⁰Te katenua ni baronga are e a manga reke abana n te katekeraoi bon te baronga are Teburun. Ao e reke i rouia aaba ake a waerake nakon te kaawa are Tarita.

¹¹Ao e a manga wairio te tia mai ikanne nako Marara ao e roko naba i Tabeteta, ao te karaanga naba are i mainikun Iokeneam.

¹²E a manga biri ni waerake ni iteran Tarita are teuana nako tian Kitirota-tabora,

¹³ao e a manga nako Taberata, ao e a manga tam'arakea Iabia. Ao e reitinako mai ikanne ni waerake nako Kata-ebere, ma Etakatin. E a manga b'aoua ni kaineta Nea are te kawai nako Rimmon.

¹⁴E a manga b'aoua te tia mai meaang ni kaineta Annaton, ao e toki n te m'arua are Ibeta-era.

¹⁵A reke naba kaawa aikai i nanon abaia: Katata, Naarara, Timron, Tirara[65] ao Betereem.[66]

¹⁶Tebwi ma uoua bootan kaawa aikai ma kaawa naba aika a uarereke i rarikiia. A bane ni mena kaawa aikai ma kaawa naba aika a uarereke i nanon te aba are a anganaki utuun te baronga are Teburun b'a abaia.

¹⁷Te kaaua ni baronga are e a manga reke abana n te katekeraoi bon te baronga are Itakara. [67] Kition, Ebeti, Remeta, En-Kannim, Enata, Beta-Bateti, Tabora,[68] Tiaatum'a ao Beta-Temeti.[69]

¹⁸Aikai kaawa aika tebwi ma onoua ake a reke naba i nanon abaia: Ietireera, Teturota, Tunem,

¹⁹Abaraim, Tion, Anaarata,

²⁰Rabita, Kition, Ebeti,

²¹Remeta, En-kannim, En-ata, ao Beta-bateti.

²²E waaki nako te tia are mai meang nakon te maunga are Tabora ao Tiaatuma, ma Beta-temeti, nakon te karaanga are te Ioretan. Bon tebwi ma onoua kaawa aika a buubura ake a reke i nanona n reitaki naba ma kaawa aika a uarereke i rarikiia.

²³Ao aikai kaawa aika a buubura ma kaawa naba aika a uarereke ake a reke n te aba are a anganaki utuun te baronga are Itakara b'a abaia.

²⁴Te kanimaua ni baronga are e a manga reke abana n te katekeraoi bon te baronga are Atera.

²⁵Aikai kaawa ake a reke i nanon te aba are a anganaki te baronga are Atera b'a abaia: Erekata, Ari, Beten, Aketaba,

²⁶Arammereke, Amata, Mitiara, ao e roko naba tian abaia are mai maeao i Karemera, ma Tiora-ribenata.

²⁷E a manga b'aoua ni waerake te tia ni biri nako Beta-takon, ao e roko naba i Teburun, ma te m'arua are Ibetaera, are n te kawai nako meangin Beta-emeka, ma Neiera. E reiti nako iaang nako Kabura,

²⁸Ebiron, Reoba, Ammon, Kana, ao e toki i Titon.

²⁹E a manga b'aoua te tia nako Rama, ao e roko n te kaawa are e nonoaki are Turo, ao e a manga nako Ota ao e toki n taari are te Mereterenian. A aikai naba kaawa ake a reke i nanon abaia: M'araba, Aketib'a, [70] [71]

³⁰Umma, Abeki, ao Reoba. Uabwi ma aua bootan kaawa aikai, ao iai naba kaawa aika a uarereke i rarikia nako.

³¹Aikai kaawa aika a buubura ma kaawa naba aika uarereke ake a reke i nanon te aba are a anganaki utuun te baronga are Atera b'a abaia.

³²Te kaonoua ni baronga are e a manga reke abana n te katekeraoi bon te baronga are Nabetari [72]

³³E moa tian abaia te baronga ae Nabetari mai Ereba nakon te kaawa are Oke i Taanannim, ni karokoa Ataminekeba, Iabeneera, ni karokoa Rakum, ao e toki n te Ioretan.

³⁴Ao e a manga b'aoua ni wairio te tia mai ikanne nako Atinota-tabora, ao e a manga nako Ukoka, ao e roko i Teburun i maiaki, ao i Atera i maeao, ao n te Ioretan i mainiku.

³⁵Aikai kaawa ake a nonoaki ake a reke i nanon naba abaia; Tirim, Tea, Ammata, Rakata, Kinnereta, [73] [74] [75]

³⁶Atama, Rama, Atora,

³⁷Keteti, Eterei, En-atora,

³⁸Iron, Miketara-era, Orem, Beta-anata, ao Beta-temeti. Tebwi ma ruaiwa bootan kaawa aikai, ao iai naba kaawa aika a uarereke i rarikiia.

³⁹Ao aikai kaawa aika a buubura ma kaawa naba aika a uarereke ake a reke i nanon te aba are a anganaki utuun te baronga are Nabetari b'a abaia.

⁴⁰Te kaitiua ni baronga are e a manga reke abana n te katekeraoi bon te baronga are Taan. [76]

⁴¹Aikai aaba ake a reke i nanon abaia te baronga are Taan; Tora, Etitaora, Ira-temeti,

⁴²Tiaarabin, Aiiaron, Itera,

⁴³Eron, Timna, Ekiron,

⁴⁴Ereteke, Kibeton, Baarata,

⁴⁵Ieuta, Bene-beraka, Kata-rimmon,

⁴⁶Me-iarekon, Rakon, ao ai kaawa ake i rarikin Iobe.

⁴⁷Ngke e anaaki abaia te baronga are Taan mai rouia ao a kitana abaia anne i bukina ngke a aki kona n totokoia aiaia ake a kan taua naba te aba arei, ma ngaia are a teirake n nako te baronga aei, ao a manga buakana te kaawa are Raiti. A taua te kaawa anne ao a tiringiia aomatana, ao a anaia b'a abaia. A tekateka iai ao a onika aran te tabo anne are Raiti nakon Taan, are bon ingoan aia bakatibu. [77]

⁴⁸Ao aikai kaawa aika a buubura ma kaawa naba aika a uarereke ake a reke i nanon te aba are a anganaki utuun te baronga are Taan b'a abaia, ao bon iai naba kaawa aika a uarereke i rarikiia.

⁴⁹Ao ngke e a bon bane tib'atib'aan aonteaba i rouia aomatan Iteraera, ao a angan Iotua are natin Nun te m'akoro n aba teuana b'a abana.

⁵⁰A angan Iotua te m'akoro n aba are e bon rineia, n ai aron Ana mwioko te UEA. Ao te kaawa anne bon Timnata-tera, ake n aaba ake a tabukibuki i Eberaim. Ao e a manga katea oon te kaawa anne ao e maeka iai.

⁵¹A karaoa tib'atib'aan aonteaba Ereata are te ibonga, ma Iotua are natin Nun, ma taan kairiri man utuun barongan Iteraera n te katekeraoi b'a ana kakaea nanon te UEA i Tiro, i matan te mataroa n rin n ana Umantabunrianna. N te aro aei ao e a bane tib'atib'an aonteaba.