Read Te B'aib'ara Iotua 2 Bible Online

Iotua 2 - Te B'aib'ara bible

Iotua 2

¹Ao Iotua e kanakoia uoman ana tib'aai ngke a kaemb'a i Titim, b'a a na tib'aaiakina aon Kanaan, ma e a moamoa riki te kaawa ae Ieriko. Ngke a roko n te kaawa, ao a nako ni kangainaa n ana auti ainen mataawa ae arana Nei Raaba. [3]

²E ongo uean Ieriko b'a iai uoman aomatan Iteraera aika a roko e bong b'a a na tib'aaiakina abaia,

³Ma ngaia are e kanakoa ana taeka nakon Nei Raaba ao e kaangai, “Mm'aane akana roko ni mwengam bon taan tib'aaiakina abara! Kaotinakoia man am auti!” [4]

⁴Ao e taku Nei Raaba, “Eng, a bon roko uoman m'aane n au auti, ma I aki ataia b'a a nako mai ia.

⁵A kitana ikai ngke e a bung taai i m'aain inin mataroan te kawa.[5]

⁶I aki ataia b'a a bo nakea ngkanne, ma I taku b'a kam na bon kawiaia ngkana kam waekoa n rimwiia.” (Ma e a kaman karabaia tib'aai ake uoman Nei Raaba i aan kain buraekiti ake e katikui i taubukin ana auti)

⁷A kawaekoa n otinako man te kaawa ana tautia te uea, ao e a manga kainaki te mataroa i mwiia. A kawaekoaia ni kakaeia ni karokoa a roko n te tabo are a riri nanon te karaanga are te Ioretan iai aomata.

⁸Ngke a nang iangoa matuuia tib'aai akekei i taubukin te auti, ao e tam'arake Nei Raaba ni kawariia,

⁹ao e taku nakoia, “I ataia b'a e a tia n anganingkami te UEA te aba aei. A bane ni maakui ngkami kaain te aba aei.

¹⁰Ti a tia n ongo rongorongon te UEA ngke e kaoraa Taari are e Uraura i m'aaimi ngke kam kiitana Aikubita. Ti ongo naba rongorongomi ngke kam tiringiia uean Amoraite ake Taion ma Oka, ake i mainikun te Ioretan. [6]

¹¹Ao ti rootaki n te maaku n te tai are ti ongo iai baikai; ti maakui ngkami. E bon tautaeka te UEA ae Atuami i eta i karawa, ao i nano i aon te aba.

¹²Ma ngaia ae I butingkami ngkai, b'a kam na berita i matan Atuami b'a kam na nanoangaiia au utu n ai arou ngke I nanoangaai ngkami naba. Ao kam na anganai te kanikina ae N na kakoauai ngkami iai.

¹³Kam na berita nako iu b'a kam na kamaiuia tamau, tinau, m'aneu ma tariu nako ao aia utu ni kabane! Kam na aki tiringiira!”

¹⁴Ao a taku nakekei nako ina, “Ke e anai maiura te Atua ngkana ti aki kakoroi bukin ara taeka![7]

¹⁵E mena ana auti Nei Raaba i eta i aon oon te kaawa, ma ngaia are e a nnaia man te winto n te roobu. [8]

¹⁶E taku nako ia, “Kam na nakon aaba ake a tabukibuki b'a kam rawa n reke i rouia ana tautia te uea. Ao karabaingkami ikanne i nanon tenibong ni karokoa okiia taan kakaae, ao kam a tib'a kona ngkanne n toua nako kawaimi.”

¹⁷A taku uakekei nakon neierei, “Ti na kaawakina ara berita ake ko tuangiira b'a ti na karaoia, n aron are ko tangiria.

¹⁸Aio te b'ai ae ko riai ni karaoia. Ko na kabaea te kabae ae uraura n te winto are ko nnaira mai iai. Ngkana ti buakana te kaawa aei, ao ko na bootia tamam, ma tinam, ma m'anem nako, ma ana utu tamam ni kabane i nanon te auti aei.

¹⁹Ngkana iai ane e otinako man te auti aei ao bon ana bure i rouna ngkana e mate, ao ngaira akea naba tabera iai, ao ko na aki bukiniira i rouna, ma ti na bukinaki iroun ane e mate i nanon te auti.

²⁰Ma ngaia aei b'a ngkana ko kaotiira nakon temanna, ao ti na bon aki kakoroa naba bukin ara berita n aron are ko tangiria.”

²¹E kariaia neierei aia boraraoi, ao e kanakoia ao e kabaea te kabae ae uraura n te winto.

²²Ao a nako tib'aai akekei ni karabaia i aon tabuki. A kakaae ana tautia uean Ieriko i tinanikun te kaawa i nanon tenibong, ma a bon aki kuneia, ma ngaia are a okira Ieriko.

²³Ao a ruorikaaki tib'aai man taian tabuki, n ri aon te karaanga, ma n okira Iotua. A tuangnga b'aai ni kabane ake rongorongon m'anangaia,

²⁴ao a kaangai, “Ti kakoauaa b'a E a tia n anganiira te aba arei te UEA ni kabane, b'a a bane ni makuira kain te tabo arei.”