Read Te B'aib'ara Iotua 20 Bible Online

Iotua 20 - Te B'aib'ara bible

Iotua 20

¹E tuanga Iotua te UEA

²b'a e na tuangiia aomatan Iteraera ni kaangai, “Ko na rinei taian kaawa ni kamauri n aron are I tuanga Moote b'a e na tuangko.

³B'a ngkana iai ane e tiringa te aomata n tiaki nanona, ao e na kona ni mauri ngkana e karabaa ikanne mai i rouia ana koraki teuare e tiringnga. [78]

⁴E na kona ni birinako ni karabaa n teuana mai i buakon kaawa ni kamauri akanne, ao e na kab'arab'ara nakoia unim'aanen te kaawa anne te b'ai are e riki, ao a na karinna n te kaawa ni katikua ni kamaekaa moa ikanne.

⁵Ngkana iai ane e ri mwiina b'a e na irantaanga, ao a na aki anga teuarei kaain te kaawa anne nakon te tia irantaanga ngkai bon tiaki nanona n tiriaomata, ao ni bon tuai naba itabarara mai m'aaina.

⁶E na tiku teuanne n te kaawa anne ni karokoa tian raoi bairean taekana mai i rouia kaain te kaawa anne, ke ni karokoa naba maten te mataniwi ni ibonga n taai akanne, ao e a tib'a kona ngkanne n okira ana kaawa are nako mai iai.” [79]

⁷Ma ngaia are Iteraera a rinei tenua kaawa ni kamauri i maeaon te karaanga are te Ioretan. Aikai kaawa akanne: Keteti i Kariraia n aaba ake a tabukibuki i Nabetari, Tekem n aaba ake a tabukibuki i Eberaim, ao Eberon n aaba ake a tabukibuki i Iuta.

⁸A rineaki naba tenua kaawa ni kamauri i mainikun te Ioretan, n taabo ake a aoraoi n te rereua are i mainikun Ieriko, ao a rinea Betera are abaia te baronga are Reuben, Ramota are i Kireata are i abaia te baronga are Kata, ao Koran i Batian, are i abaia te baronga are Manate.

⁹Ao aikanne kaawa ni kamauri ake a rineaki i bukiia te botannaomata ae Iteraera, ao i bukiia naba iruwa ake a maeka i buakoia. E a kona ni mauri te aomata are e tiriaomata n tiaki nanona mai i rouia taan irantaanga. E bon aki kona n tiringaki teuanne ni karokoa kakoauana raoi n te kabowi b'a e bon reke n te bure.