Read Te B'aib'ara Iotua 21 Bible Online

Iotua 21 - Te B'aib'ara bible

Iotua 21

¹Ngke a bon tabe naba ni kaemb'a aomatan Iteraera i Tiro n te aba are Kanaan, ao a m'ananga mataniwiin utu man te baronga are Rewi ni kawara Ereata are te ibonga, ma Iotua are natin Nun, ma atun utuun Iteraera ni kabane, [80]

²ao a kaangai nakoia, “E a tia ni mwiokoa Moote te UEA b'a e na anganira taian kaawa b'a nnera ni maeka, ao taian tawaana n uteute naba akana i rarikin kaawa akanne i bukiia ara nanai ni man.”

³Ma ngaia are a anganaki aia kaawa ma aia tawaana n uteute te baronga are Rewi i rouia aomatan Iteraera man abaia nako n ai aron Ana mwioko te UEA.

⁴A moan anganaki aia kaawa utuun Rewi, man te kaainga are Koata. A anganaki utuun kanoan Aron tebwi ma tenua kaawa aika a buubura man abaia te baronga are Iuta, ma Timeon, ao Beniamin. [81]

⁵Ao a anganaki tebwiina aia kaawa nikiran te kaainga are Koata man abaia te baronga are Eberaim, Taan, ao Manate maeao.

⁶A anganaki tebwi ma tenua aia kaawa te kaainga are Kerition man abaia taian baronga ake Itakara, Atera, Nabetari, ao Manate mainiku.

⁷A anganaki tebwi ma uoua aia kaawa kanoan Merari man abaia te baronga are Reuben, Kata, ao Teburun. [82]

⁸A karaoa tib'aakin kaawa ma taian tawaana Iteraera nakoia te baronga are Rewi n te katekeraoi n aron ana mwioko te UEA nakon Moote.

⁹Aikai aran kaawa ake a anaaki man abaia te baronga are Iuta ao Timeon ao a anganaki

¹⁰kanoan Aaron are kaain te kaainga are Koata, are ana kariki Rewi. Boni ngaia te moan anganaki aia kaawa.

¹¹Ao a anganaki te kaawa are Areb'a (Areb'a bon taman Anaka), ma e a aranaki ngkai te kaawa anne b'a Eberon, are n aaba ake tabukibuki i Iuta, ni ikotaki ma tawaana ake a katobibia.

¹²Ma e ngae n anne ao e a kaman anganaki Kareb'a are natin Iebunne tawaanan te kaawa, ma taian kaawa naba aika a uarereke ake i rarikiia b'a ana b'ai.

¹³Ao aikai naba kaawa ake a anganaki naba kanoan Aaron ake ibonga i rarikin Eberon (te kaawa ni kamauri teuana): Ribena,

¹⁴Iatira, Etitemo,

¹⁵Oron, Tebira,

¹⁶Ain, Iuteta, ao Beta-temeti. Ao ni ikotaki naba ma taian tawaana n uteute. Bootan kaawa ake anganaki man baronga ake Iuta ma Timeon, bon ruaiwa.

¹⁷A anganaki naba aua kaawa man abaia te baronga are Beniamin aika kaawa aika: Kibeon, Keeb'a,

¹⁸Anatota, Aremon, ni ikotaki ma tawaana n uteuten taian kaawa aikanne.

¹⁹Bon tebwi ma tenua bootan kaawa aikanne, ma taian tawaana n uteute. Aikai kaawa ake a anganaki ibonga ake kanoan Aaron.

²⁰Ao a anganaki naba utuun Rewi ake te korakina ake kaain te kaainga are Koata kaawa tabeua man abaia te baronga are Eberaim,

²¹A anganaki aua aia kaawa aika a buubura aika: Tekem ma ana tawaana n uteute n aaba ake a tabukibuki i Eberaim (te kaawa ni kamauri teuana), Ketere,

²²Kibetaim ao Beta-oron ma aia tawaana n uteute.

²³Aikai naba kaawa aika aua ake a anganaki man te baronga are Taan, Ereteke Kibeton

²⁴Aiiaron, Kata-rimmon, n airi ma aia tawaana n uteute.

²⁵Ao uoua naba aia kaawa ake a anganaki man abaia te baronga are Manate maeao b'a Taanaka ao Kata-rimmon, n airi naba ma aia tawaana n uteute.

²⁶Bootan aia kaawa utuun te kaainga are Koata ake a anganaki bon tebwiina, aika a airi ma aia tawaana n uteute.

²⁷Ao te koraki teuana are kaain te kaainga are Rewi, are kanoan Kerition, a anganaki tebwi ma teuana aia kaawa man abaia te baronga are Manate mainiku, aika kaawa aika: Koran are i Batian (te kawa ni kamauri teuana) ao Beetitera, ao n airi naba ma aia tawaana n uteute.

²⁸A anganaki naba aua aia kaawa man abaia te baronga are Itakara aika: Kition, Taberata,

²⁹Iaremuta, En-kannim, ao a airi naba ma aia tawaana n uteute.

³⁰A anganaki naba aua aia kaawa man abaia te baronga are Atera aika: Mitiara, Abeton,

³¹Erekata, ao Reoba. Ao a airi naba ma aia tawaana n uteute.

³²A anganaki naba tenua aia kaawa man abaia te baronga are Nabetari aika: Keteti i Kariraia, ma ana tawaana n uteute (te kaawa ni kamauri teuana), Ammotatora, ao Karetan, ma aia tawaana n uteute.

³³Bootan kaawa ake a anganaki kanoan Kerition bon tebwi ma tenua, aika a airi ma aia tawaana n uteute.

³⁴A anganaki kanoan Merari ake nikiraia te baronga are Rewi, aua aia kaawa man abaia te baronga are Teburun aika: Iokeneam, Kareta,

³⁵Rimna, ao Naarara. Ao a airi naba ma aia tawaana n uteute.

³⁶A anganaki naba aua aia kaawa man abaia te baronga are Reuben aika: Betera, Iaati,

³⁷Ketemota, ao Meb'ata, ao a airi naba ma aia tawaana n uteute.

³⁸Man te baronga are Kata ao a anganaki naba aua aia kaawa aika: Ramota are i Kireata (te kaawa ni kamauri teuana), Maanaim,

³⁹Etibon, ao Iatera, ao a airi naba ma aia tawaana n uteute.

⁴⁰Ma ngaia are a anganaki kaaingan Merari tebwi ma uoua aia kaawa.

⁴¹Bootan aia kaawa te baronga are Rewi man abaia aomatan Iteraera bon abwi ma m'aane,

⁴²ao a airi ma aia tawaana n uteute i rarikiia nako.

⁴³Ma ngaia are e anganiia aomatan Iteraera ni kabane abaia te UEA n aron are E a tia n taekinna n ana berita ae tabu nakoia aia bakatibu b'a E na anganiia. Ao a bon maekanna b'a ai bon abaia.

⁴⁴E anga te rau te UEA nakoia ni kabutaa aonteaba n ai aron are e a tia ni berita iai nakoia aia bakatibu. Bon akea riki ana kairiribai Iteraera ae kona ni manga eekaanako Iteraera b'a E angaanga te tokanikai te UEA nakoia Iteraera i aoia aia kairiribai ni kabane.

⁴⁵E kakoroi bukin ana taeka te UEA ni kabane n aron are E a tia ni berita iai nakoia aomatan Iteraera.