Read Te B'aib'ara Iotua 22 Bible Online

Iotua 22 - Te B'aib'ara bible

Iotua 22

¹Ao e weteia baronga ake Reuben ma Kata ao Manate mainiku Iotua

²ao e kaangai nakoia, “Kam a tia ni karaoi b'aai ni kabane ake e a tia n tuangngkami Moote are ana toro te UEA, ao kam karaoi naba ni kabane au taeka ake I tuangngkami.

³Kam a tia ni buokiia tarimi, ao kam a tia n ongotaeka i roun te UEA ae Atuami i nanon taai aika a nako ni karokoa ngkai.

⁴Ao ngkai E bon teimatoa te UEA ae Atuami ni kaawakin ana berita i bukin te rau, n ai aron are e taekinna naba ngkoa nakoia raomi ake baronga ake tabem'aang. Ma ngaia ae kam na nako n okiri abami are kam abanna are i mainikun te Ioretan are e a tia n anganingkami Moote are Ana toro te UEA.

⁵Kam na riai ni kaawakin ana tua Moote ake e anganingkami are kaangai, Tangira te UEA ae Atuam, karaoa nanona, ongotaeka nakon ana mwioko, kakaonimaki nakoina, ao m'akuri i rouna ma nanom ao tamneim ni kabane.”

⁶E kaokiia Iotua nako abaia ma taeka ni kakab'aia aika a kaangai, “Kam nang okiri abami ma kaub'aimi aika ami nanai ni man ma ami tirewa ma ami koora,

⁷ma ami buraonti ma ami m'akoro ni biti, ma ami kunnikai aika a bati, aike kam anai mai i rouia ami kairiribai. Kam na tib'atib'ai raoi baikanne i aomi ma raomi.” Ao a okiri abaia.

⁸E a tia Moote n anganiia iteran te baronga are Manate abaia i mainikun te Ioretan, ao Iotua e a manga anganiia iteran te baronga are Manate are teuana abaia i maeaon te Ioretan, ni ikotaki naba ma baronga ake tabeua.

⁹Ma ngaia are a teirake n nako baronga ake Reuben ma Kata ao Manate mainiku mai i buakoia aomatan Iteraera ngke a mena i Tiro n te aba are Kanaan, b'a a nang okiri abaia are n te aba are Kireata are e anganiia Iotua n ai aron Ana mwioko te UEA nakoia i roun Moote.

¹⁰Ao ngke a roko i Kirerota baronga ake Reuben, ma Kata, ao Manate mainiku, ao a katea te baonikarea ae buubura i mataniwiin te karaanga; bon i maeaon naba te Ioretan. [83]

¹¹Ao a kaongoraeaki aomatan Iteraera ni kabane taekaia baronga ake Reuben, Kata, ao Manate mainiku ae a katea aia baonikarea i Kerirota are maeaon te Ioretan, ao tiaki i abaia.

¹²Ngke a ongo aei aomatan Iteraera ao a bane ni katauraoi nakon te buaka i Tiro b'a a na buakaniia barongan mainiku.

¹³A kanakoa Bineati are natin te ibonga are Ereata barongan maeao ake tebwina b'a e na kawariia barongan mainiku ake Reuben, Kata ma Manate mainiku n te aba are Kireata.

¹⁴A ira Bineati tengaun taan kairiri b'a kakatemanna man barongan maeao aika atuun utu mai nanon kaainga.

¹⁵Ao ngke a roko i Kireata ao a taetae nakoia baronga ake Reuben, ma Kata ma Manate mainiku ni kaangai,

¹⁶“Ti kanakoaki mai rouia ana aomata te UEA ni kabane b'a ti na ongora i roumi b'a kam aera ngkai kam aki kakaonimaki nakon te UEA, b'a kam a manga katea ami baonikarea anne bon ti i bukimi? E aera ngkai kam a manga tannako mai roun te UEA ni karaoa te b'ai ae rangi ni buakaka?

¹⁷Kam aki uringa ara bure nakon te UEA ngkoa i Beore are e katuuaira iai n te aoraki ae rangi ni kakamaaku, ao kam aki mwimwinikora? E bon tuai totoki raoi mwiin arei ao kam a manga moana naba ami aki ongotaeka? [84]

¹⁸Ngkana kam aki ongotaeka i roun te UEA n te bong aei ao e na reke kaimi ma aomatan Iteraera ningabong.

¹⁹Ngkana kam taku b'a e aki raoiroi abami i bukin taromaurian te UEA ao e raoiroi riki ngkana kam karekei abami i buakora b'a kam aonga n taromauri n um'an te UEA ae i roura ngkai nakon ae kam na katea riki teuana bon i aon naba ikai ao bon iai baonikarean te UEA ae Atuara aei.

²⁰Kam aki uringa Akan are natin Tera ngke e aki ongotaeka naba nakon Ana mwioko te UEA are a na aki anaaki baikeke a riai ni kamaunaaki ao a bane ni katuaaeaki aomatan Iteraera i bukin anne, tiaki ti Akan ni mate i bukin ana bure.” [85]

²¹Ao a kaeka baronga ake Reuben ma Kata ao Manate mainiku nakoia atuun utu man barongan maeao ni kaangai,

²²“Ti bon kaotia ma te koaua i matan te UEA ae te Atua ae m'aaka ae ara tia kakoaua. E ataa bukin karaoan aei iroura, ao ti bon tangiriia naba aomatan Iteraera b'a a na ataa bukin karaoan aei iroura.

²³B'a ngke tao arona b'a ti katea aei i bukin karaoan ae buakaka nakon te UEA, ao ke e anga ngaira te UEA nako nanoni baimi b'a kam na tiringiira naba n te bong aei. Ti bon aki karaoa te baonikarea aei i bukin te angakarea ke te angab'ai.

²⁴Ti karaoa aei b'a ti raraoma ngkana a manga taetae ami kariki rimwi ni kaangai, “Tera ami b'ai n taromauriia te UEA ae Atuaia Iteraera?

²⁵E a tia ni karaoa te Ioretan b'a tiara ma ngkami. Tiaki Atuami te UEA! Ao ane a na tuukia ara kariki ami kariki rimwi man taromaurian te UEA.

²⁶Ma ngaia ae ti katea te baonikarea aei tiaki i bukin te angakarea ke te angab'ai, [86]

²⁷ma ti karaoa aei b'a te kanikina i marenara ma ngkami, ao ara kariki ma ami kariki rimwi ni kaotia b'a ti teuana arora n taromauriia te UEA i nanoaan um'ana are e tabu, ma ara angakarea ma ara angab'ai. E na riki te baei b'a te kakoaua b'a ana aomata naba te Atua ngaira ma ngkami.

²⁸Ma ngkana arona b'a kam taekina aei nakoira ke nakoia ara kariki rimwi, ao ti na kona ni kabooa ni kaangai, “Ao tera te baonikarea ae a karaoia ara ikawai. Tiaki i bukin te angakarea ke te angab'ai ma bon te b'ai ni kauring nakoira ma ngkami b'a ti riai n taromauriia te UEA.

²⁹Ti bon aki konaa n tannako mai roun te UEA ni manga katea te baonikarea teuana ae kaanga ai aron te baonikarea i bukin te angakarea ke te angab'ai. Ti bon aki kona ni karaoa riki teuana i rarikin Ana baonikarea te UEA ae Atuara are i matan um'ana are tabu.

³⁰Ao ngke a ongo Beniata ma raona ake atuun utu man barongan maeao ake tengaun aia taeka barongan mainiku ao a rau nanoia iai.

³¹Ao e taku Beniata are natin Ereata are te ibonga nakoia, “N te bong aei ao ti a ataia b'a e bon mena te UEA i roura, ao ngaia kam bon aki rawa nakon te UEA ma kam a tia ni kamaiuia Iteraera man ana karekekai te UEA.”

³²Ao a oki rikaaki Bineata ma ana mataniwi ake tengaun mai i rouia baronga ake Reuben ma Kata man te aba are Kireata, ao a okiria aomatan Iteraera n te kaawa are Kanaan, ao a kaongoraaia b'aai ni kabane.

³³Ao a bane n rau nanoia aomata ni kabane ao a neboa te Atua, ao akea riki manga iangoan te kan nako n urua te tabo are a mena iai baronga ake Reuben ma Kata.

³⁴Ao a taku baronga ake Reuben ma Kata, “E na riki te baonikarea aei b'a te b'ai ni kakoaua i marenara ma barongan maeao b'a bon te Atua te UEA.