Read Te B'aib'ara Iotua 23 Bible Online

Iotua 23 - Te B'aib'ara bible

Iotua 23

¹Ao ngke e a bon maan, ao e anga te rau te UEA i marenaia Iteraera ma ana kairiribai i nanon ririki aika a bati, ao e a bon rangi ni kara Iotua n te tai aei,

²Ma ngaia are e a weteia Iteraera ni kabane, ana unim'aane ma ana taan kairiri ao ana taan moti ma ana b'akuaku ao e taku nakoia, “I a rangi ni kara ngkai.

³Kam a tia n noori b'aai ni kabane aika E karaoi te UEA nakoia botannaomata aika kam rin i buakoia. E a tia ni buaka te UEA ae Atuami i bukimi.

⁴I a tia n angan ami baronga nako aaba ni moa man te karaanga are te Ioretan are i mainiku nako taari are te Mereterenian are i maeao. I a tia n anganingkami abaia botannaomata ake ti a tia ni kataenikaia, ao abaia naba botannaomata ake a tuai taenikai i roura.

⁵E na kakioia nako te UEA mai m'aaimi ao e na kamumuniia nako ngkana kam buakaniia. E na reke i roumi abaia n aron Ana taeka te UEA nakoimi.

⁶Ma ngaia ae kam na taratara raoi, ao kam na ongotaeka ao kam na karaoi b'aai ni kabane ake a koreaki n ana boki n tua Moote. Kam na aki kaaki teuana mai i buakon tuua,

⁷ao kam na aki rangi n reitaki ma koraki akanne, ao kam na aki naba m'anewei araia antiia, ke n te tuea n araia, ke n taromauriia, ke ni boobaraaki nakoia.

⁸Ma kam na ti kakaonimaki nakon te UEA n ai aromi n taai ake ngkoa ni karokoa ngkai.

⁹E a tia te UEA ni kamumuniia nako botannaomata aika a korakora mai i m'aaimi, ao bon akea ae konaa n tei ni kaaitarai ngkami.

¹⁰E kona temanna mai i buakomi ni kataenikaia tengaa te aomata, kioina ngke E berita te Atua b'a E na buaka i bukimi.

¹¹Ma ngaia ae ti bon riai n tangira te UEA ae Atuara n ti ngaia ma te nano ae koaua.

¹²Ngkana kam aki kakaonimaki nakoina b'a kam a manga reitaki ma nikiraia botannaomata, ma ni manga iein ma ngaiia,

¹³ao E na bon aki manga kakioia nako botannaomata aikai mai m'aimi te UEA ae te Atua ngkana kam buakaniia. Ma ana riki b'a b'aai aika a na kakamaaku nakoimi n ai aron te kaini kab'aru ma te abea. Ao a na riki naba b'a b'aai aika a kammaraki n aron te kainikataere i nuukami ao te kateketeke i nanon matami, ao e na teimatoa n riki aei nakoimi ni karokoa banemi man te aba aei, ae E a tia n anganingkami te UEA ae Atuami.

¹⁴Ao ngkai e a bon roko au tai ni mate. Ao kam bon bane n ataia i nanomi ao n tamneimi b'a E a tia te UEA ae Atuami n anganingkami ni kabane baika E berita b'a E na anganingkami aika a raraoi. A bane n tia ni koro bukin Ana berita, ao bon akea teuana ae aki kakoroa bukina.

¹⁵E bon kakakoroa bukin Ana berita te UEA n anganga te kab'aia ao te rekenikai nakoia ana aomata.

¹⁶E na bon orei ngkami te UEA ao kam na waekoa ni mauna nako n akea nikirami n tiku n te aba ae raoiroi aei, ae E a tia n anganingkami, ngkana kam aki kaawakina ami raoiroi ma te UEA ae Atuami, ao ngkana kam taromauriia naba anti tabem'aang.”