Read Te B'aib'ara Iotua 6 Bible Online

Iotua 6 - Te B'aib'ara bible

Iotua 6

¹A kainaki mataroan Ieriko ao a uateiaki ni kawakinaki b'a aonga n aki rin aomatan Iteraera iai. Ao bon akea ae e kona n rin iai, ke n otinako mai iai.

²E taku te UEA nakon Iotua, “I anga nako nanoni baim Ieriko, ma ueana ao tautiana ni kabane ake a ninikoria.

³Kam na nakonako ni katobibia Ieriko ngkoe ma am tautia teuana te tai n te bongina.

⁴Itiman ibonga aika a na uouota kakateuana te buu i aoia, ao a na rimoan te Atiniberita. Ko na nakonako ni katobibia Ieriko itiua te tai n te kaitibong, ngkoe ma am tautia, ao ibonga, a na katang aia buu i nanon tain te nakonako. [17]

⁵N tokin te kaitiua ni katobibi ao a na katanga te buu ni kamaana tangina. Ao n te tai naba are kam ongo iai anne, ao kam na bane n takaarua ni kanenei b'anaami, ao e na rina ni b'aka oon te kaawa. Ao kam na bane n rin ni kaineta nanon te kaawa.”

⁶E weteia ibonga Iotua ao e taku nakoia, “Anaa te Atiniberita ao a na rimoan te Atiniberita itiman mai i buakomi ma aia buu.”

⁷Ao i mwiina, e a tuangiia aomata b'a a nang nakonako ni katobibia te kaawa, ao tabeman a na rimoan te Atiniberita ni kaawakinna.

⁸Ao a karaoa tuangaia aomata i roun Iotua. A rimoaia ibonga ake a katanga te buu tabeman tautia, ao imwiia ibonga ake taan katang buu bon ibonga ake taan uota te Atiniberita.

⁹Ao i mwiia ibonga ake taan uouota te Atiniberita bon taian tautia ake taan kaawakina te Atiniberita mai bukin te rain.

¹⁰Ma e a tia n tuangiia ana aomata Iotua b'a akea temanna ae e na takaarua b'a a na ti tataninga are i rouia.

¹¹Ma ngaia are a katobibia Ieriko Iotua ma ana aomata, ma Ana Ati ni Berita te Atua n aia moan tai n nakonako. Ao ngke a manga okira te tabo ike a moan m'ananga mai iai, ao a manga katei mwengaia ni motirawa ni karokoa te ingabong.

¹²Ao e utim'aaka Iotua n te ingabong are i mwiina, ao a manga nakonako naba ni katobibia Ieriko te kauoua n tai n aroia naba arei; are a rimoa tautia ake taan kaawakiniia ibonga,

¹³ao a rimwiiaki i rouia itiman ibonga ake taan katanga te buu, ao i mwiina riki ibonga ake taan uouota te Atiniberita, ao taian kabane mai i buki tautia ake taan kaawakina te Atiniberita mai buki. Ao e tang te buu i nanon tain te m'ananga.

¹⁴Bon aroia naba arei n aia kauabong, are a katobibia te kaawa n nakonako ti teuana te tai, ao a manga oki nakon aia tabo ni motirawa. A karaoa te aro anne i nanon onobong.

¹⁵Ao a utim'aaka ni kaarangainan te kaitibong, ao a manga m'ananga naba ni katobibia te kaawa ma n te tai ngkanne aei ai itiua te tai m'anangaia ni katobibia te kaawa. Bon ti aio te bong are a kaitiua iai te tai m'anangaia ni katobibia Ieriko.

¹⁶Ngke a nang katanga aia buu ibonga n aia kaitiua n tai ni katobibi, ao e a anga ana taeka Iotua nakoia aomata b'a a na takaarua, ao e taku, “E anganingkami ngkai te kaawa aei te UEA!

¹⁷A na bane ni kamaunaaki b'aina ni kabane aika i nanona, b'a taian karea nakon te UEA, [18] ma bon ti te kabekaau are nei Raaba ae e na kamaiuaki ma kaain ana auti ni kabane i bukina ngke e karabaia ara taan tutuo ni karaba. [19]

¹⁸Ma bon akea b'ain te kaawa aei ae kam na anaia b'a a na bane ni kamaunaaki; ngkana iai te b'ai teuana ae kam anaia ao bon iai te kabuanib'ai, ao te urub'ai ae e na reke nakoia aomatan Iteraera ni kabane.

¹⁹A na kaokoroaki b'aai ni kabane akana a karaoaki man te tirewa, te koora, te buraonti, ao te biti, b'a ana b'ai te Atua. A na kaawakinaki ni nnen ana b'ai te UEA.”

²⁰Ma ngaia are a katanga aia buu ibonga, ao a takaarua aomata ni kanenei b'anaaia, ao e rina ni b'aka oon te kaawa ni katab'aninna, ao a bane ni m'ananga ana taanga ni buaka Iotua n tam'arakea te tabuki are e tei iai te kaawa, n niniia ma n taua.

²¹A tiringiia kaain te kaawa ni kabane, aika m'aane ma aine, ao ataei ma kaara. A tiringiia naba maan ni kabane, aika kaao, tiibu ma taian aati n aia kabaang. [20] [21]

²²Ao e taku Iotua nakoia aomata ake uoman ake taan tutuo ni karaba, “Naako nakon ana auti neiere te kabekaau, ao kaotinakoa ma ana utu n ai aron are kam a tia ni berita iai nakoina.”

²³Ma ngaia are a nako n anaa Nei Raaba ma tamana, tinana, m'aanena, ao ana utu ma ana toro ni kabane, ao a kairiia nako rarikin te tabo are a motirawa aomatan Iteraera iai.

²⁴Ao a kauraa te kaawa ni kamannangnga, ma b'aai ni kabane ake iai, ma ti b'aai ake a karaoaki man te koora, te tirewa, te buraonti, ao te biti, ake a anai ni kaawakin ni nnen ana b'ai te UEA.

²⁵Ma e kamaiua Nei Raaba are te kabekaau Iotua ma ana utu ni kabane, i bukina ngke e karabaia taan tutuo ni karaba ake e kanakoia b'a a na tuoa Ieriko. Ao bon akana i aon Iteraera ana kariki Nei Raaba ni karokoa boong aikai.

²⁶Ao e anga ana taeka ni bau Iotua ae kaangai, “E na kamaraiaa te aomata te UEA ane e a manga kataia ni katea Ieriko. E na mate ana karimoa ae te m'aane te aomata ane e a manga kataia ni kawenea aan te kaawa aei; ao e na bua ana bina te aomata ane e karaoa te mataroa.”

²⁷Ao te UEA e memena i roun Iotua, ao e tanoata kakannaton Iotua i aon Kanaan ni kabutaa.