Read Te B'aib'ara Iotua 7 Bible Online

Iotua 7 - Te B'aib'ara bible

Iotua 7

¹E a tia n tuatua te UEA b'a akea ae na anai b'aai i Ieriko ake a na kamaunaaki ma aki kan ongotaeka. Temanna te aomata ae arana Akan ae e aki kan ongo te kaetieti, ma ngaia are E a un te UEA nakoia aomatan Iteraera. (Akan bon natin Karemi, ao tibun Taberi ao tibutorun Tera, kaain te baronga are Iuta.)

²E kanakoia tabeman m'aane Iotua mai Ieriko nako Ai, are i mainikun te kaawa are Betaera, i rarikin Beta-awen, b'a a na tuoa aon te aba. Ao a kaoka aia kaongora ngke a tia n tuoa te aba,

³nakon Iotua ae kaangai, “E aki tangira te taanga ni buaka ni kabane, b'a bon te kaawa ae uarereke te kaawa arei. Tao ti uoua, ke tenua te ngaa te tautia ae a riai ni buakanna.”

⁴Ma ngaia are tao ti tenua tengaa tautia ake a nako ni buakana Ai, ma a bane ni mumun rikaaki.

⁵A kakioaki tautian Iteraera i rouia tautian Ai man te mataroa ni karokoa te tabo n riko atiibu, ao e kaania teningaun ma onoman tautian Iteraera ake a mate i nanon tain kakioakiia rikaaki man te tabuki. Ao a buuang aomatan Iteraera ao a maaku.

⁶Ao a raeuai kunnikaia Iotua ma ana mataniwi, ao a iakiaki i aontano i matan Ana Ati ni Berita te UEA ni kabongnga, ao a tauni atuia n te baareka ni kaota rawawataia.

⁷Ao e taku Iotua, Ara UEA ae moan te rietaata, e aera ngkai Ko uotiira ri aon te Ioretan nako ikai? Ko na anga ngaira nako nanoni baiia Amoraite? Ko na tiringiira? E raoiroi riki ngke ti tiku i mainikun te karaanga?

⁸Bon akea te b'ai ae n na taekinna te UEA b'a a mumun nako Iteraera i rouia ara kairiribai?

⁹A na bane n ongo aomatan Kanaan ma kaain te aba aei ni kabane rongorongora, ao a na teirake n otab'aninira n tiringiira ni kabane! Ao e na kanga ngkanne ni karineaki aram?”

¹⁰E taku te UEA nakon Iotua, “Teirake! bukin tera ngkai ko wene i aon te tano n aron anne?

¹¹E a tia ni bure Iteraera! A tia ni urua Au boraraoi ma ngaiia are I tuangiia b'a a na kawakinna. A tia n anai b'aai tabeua ake a riai ni kamaunaaki ni kabane. A iraei, ao a karaoa te kewe iai ao a kaawakin i buakon aia b'ai.

¹²Ao bon anne bukina are a aki konaa n tei iai Iteraera ni kaaitaraia aia kairiribai. A mumun nako i rouia aia kairiribai. A kaitaraaki ngkai n unin te UEA. N na bon aki manga mena i roumi ni karokoa kam kanakoi baike I tuangngkami b'a kam na aki anai!

¹³Tei rake! tabuia am aomata ao katauraoia i m'aain rokoia i matau. Tuangiia b'a a na katauraoia i m'aain te ingabong, b'a iai au taeka Ngai ae te UEA ae Atuaia Iteraera nakoia ae kaangai, ‘Iai b'aai i buakon ami b'ai Iteraera are I tuangngkami ngkoa b'a kam na kamaunai. Kam na bon aki konaa ni kaaitaraia ami kairiribai ni karokoa kam a tia ni karenakoi baikanne ni kabane.’

¹⁴Ma ngaia ae ko na tuangiia b'a a na bane ni bootaki i matau nakon te moaningabong. Bootia nako barongan nako Iteraera b'a n na katebenakoa mai buakoia te baronga are e karaoa te bure. Ao i mwiina n na manga katebenakoa man te baronga anne te kaainga are e karaoa te bure. I mwiina n na manga katebenakoa man te kaainga anne te utu are e karaoa te bure. Ao i mwiina n na manga katebenakoa man te utu anne te aomata are e karaoa te bure anne.

¹⁵E na kabuokaki te aomata are e reke ni iraei b'aai ake a riai ni kamaunaaki, ao a na kamaunaaki naba ana utu ni ikotaki ma ana b'ai ni kabane, i bukina ngke e a tia ni uota kamamaaeaia Iteraera, ao e a tia naba n urua Au boraraoi ma ngkami.”

¹⁶Ao e utim'aaka Iotua n te moaningabong are i mwiina ao e bootia barongan Iteraera ni kabane; te barongana imwin te barongana, ao te UEA E katebenakoa te baronga are Iuta.

¹⁷Ao e katea te baronga are Iuta Iotua i matan te UEA; te kaaingana i mwiin te kaaingana, ao te UEA e katebenakoa te kaainga are Tera. E a manga katea te kaainga are Tera Iotua i matan te UEA, te utuuna i mwiin te utuuna ao te UEA E katebenakoa te utu are Taberi mai i buakona.

¹⁸Ao e a manga katea te utu are Taberi Iotua i matan te UEA temanna i mwiin temanna, ao te UEA e a katebenakoa te aomata ae Akan are natin Karemi, are tibun Taberi.

¹⁹Ao e taku Iotua nakoina, “Natiu, taekina te koaua i matan te UEA ae Atuaia Iteraera ao ko riai n raraoma. Tuangai b'a tera ae ko a tia ni karaoia. Tai manga kataia ni karaba nako iu.”

²⁰E kaeka Akan, “E bon koaua b'a I a tia ni bure nakon te UEA, ae Atuaia Iteraera, ao n na kaota te b'ai ae I a tia ni karaoia.

²¹I noora niiniiran B'aburon ae e rangi n tamaroa i buakon taian b'ai ni kuri, ao I noora naba nimaua te rawawata te tirewa, ao te m'akoro ni koora ae nakon teuana te b'auna rawawatana. I rangi ni mataai iai ao I a anai naba ni karabai. Ao I tauni i aan au auti n rianna, ao I kamenaa te tirewa n te kabanea mai nano.”

²²Ao e a kanakoia m'aane tabeman Iotua nakon ana auti n rianna teuarei, ao a kunei baikeke a riai ni kamaunaaki n aron are e a tia n taekinna Akan, are e mena te tirewa n te kabanea mai nano.

²³A uoti rikaaki man te auti n rianna nakon Iotua, ma aomatan Iteraera, ao a kawenei n te tabo are a tataromauri iai.

²⁴A taua Akan aomatan Iteraera, ao a anaa te tirewa ma te kunnikai, ao te m'akoro ni koora, ni ikotaki naba ma natina m'aane, ao natina aine, ma ana nanai ni kao, ma ana aati, ma ana tiibu, ma ana auti n rianna, ao ana b'ai ni kabane, ao a uoti nakon te m'arua are M'aruan te kaangaanga.

²⁵Ao e taku Iotua nakoina, “Bukin tera ngkai ko karika te kaangaanga nakoira? E nang karokoa te kaangaanga ae ab'ab'aki te UEA i aom!” Ao a bane ni karea Akan ma ana utu Aomatan Iteraera ni kamateia. Ao a kabuoki rab'ataia ma aia b'ai ni kabane.

²⁶Ao a katabukirakei atiibu i aona, ao bon akekei naba atiibu ni karokoa boong aikai. Ao bon anne bukina ngkai e aranaki te tabo arei b'a M'aruan te kaangaanga. Ao e a toki unin te UEA i rouia aomatan Iteraera ngke e a mate Akan.