Read Te B'aib'ara Iotua 8 Bible Online

Iotua 8 - Te B'aib'ara bible

Iotua 8

¹E taku te UEA nakon Iotua, “Ko na kairiia am tautia ni kabane ni waerakea te kaawa are Ai. Tai maaku ao tai b'ara n nano. N na anganiko te tokanikai i aon uean Ai. Ko na taua taekana ma ana aomata ma ana kaawa, ao abana.

²Ko na tiringa uean Ai n ai aron are ko karaoia naba ngkoa nakon uean Ieriko, ma n te tai aei ngkanne ao kam nang kaawakin kaub'aina nako ma manna b'a ai bon ami b'ai. Katauraoi ngkami b'a kam na kakubanakoia ni buakaniia mai akuiia.

³Ma ngaia are e a katauraoi Iotua ma ana tautia ni m'ananga nako Ai. E rineia 30,000 ana tautia aika a rangi n ninikoria, ao e kanakoia ngke e bong

⁴ma ana mwioko nakoia ae kaangai, “karabai ngkami i akuun te kaawa, ma tai rangi ni kararoai ngkami ma te kaawa; ao tatauraoi nakon te buaka.

⁵Ao ngai ma nikiraia ara aomata ti na kaania te kaawa, ao ngkana a otinako tautian Ai ni kaaitaraira ao ti na rairaki ni birinako n arora naba are mai m'aaina.

⁶Ane a na taku b'a ti birinako mai rouia n aron are ti karaoia naba ngkoa ngke ti moan buakana Ai, ao ane a na kakioira ni karokoa a raroanako man te kaawa.

⁷Ao kam na kawaekoai ngkami n otinako man te tabo are kam karabai ngkami iai ao kam na niniia te kaawa ma n taua. E na anga te kaawa te UEA ae Atuara nako nanoni baimi.

⁸Ngkana e reke te kaawa i roumi ao kam na kabuokia ni kabane, n ai aron are E tuangngkami te UEA. Ao aikanne au taeka nakoimi.”

⁹Ao e kanakoia Iotua ao a nako nakon te tabo are a na karabaia iai. Ao a tataninga i maeaon Ai, are i marenan Ai ma Betaera. E matu Iotua n te tabo are katei iai aia auti ni motirawa.

¹⁰E utim'aaka Iotua n te bong are i mwiina ni bootia ana tautia. Ao e m'ananga ngaia ma ana mataniwi, ao ana tautia nako Ai.

¹¹E m'ananga ma tautia ake raona ni kaineta mataroan te kaawa, ao a katei aia auti ni motirawa mai meangin te kaawa i rarikin te mataroa are buubura, ao e mena te m'arua i marenaia ma Ai.

¹²E kairiia tao nimaua te ngaa tautia b'a a na karabaia i maeaon te kaawa, i marenan Ai ma Betaera.

¹³Ao a bane ni baireaki aroia tautia nakon te buaka. Iteraia tautia ake tekorakina a mena n te maeka nako meangin Ai, ao te korakina a karabaia nako maeao. E kabanea ana tairiki Iotua n te m'arua. [22]

¹⁴A kawaekoaia n otinako uean Ai ma ana tautia b'a a na buakaniia Iteraera ngke a nooria, ao a aki ataia aomatan Ai b'a ngaia a nang buakanaki mai akuiia.

¹⁵Ao a bakaaea te mumun rikaaki Iotua ma ana tautia, ma ni biri nako nakon aaba ake a rereua.

¹⁶A bon babane tautian te kaawa n otinako ni kakioia aomatan Iteraera, ao ngke a kakioia Iteraera ao ai aron ae a bon kararoaia nako man aia kaawa.

¹⁷A bon baabane m'aanen Ai n otinako ni kakioia Iteraera, ao bon akea temanna ae tiku n te kaawa are Ai. E a bon tiku n uki te kaawa.

¹⁸Ao e taku te UEA nakon Iotua, “Kotea Ai n tabon am kainiwai; b'a I a anga nako nanon baim.” Ao e karaoa are e tuangaki Iotua.

¹⁹Ao ngke e a tib'a tabeka baina Iotua, ao a bane ni kawaekoaia n teirake ana tautia ake a karabaia ma n ninia nako te kaawa ni buakanna. Ao a kabuoka te kaawa n te tai naba arei.

²⁰Ngke a tanrikaaki tautian Ai, ao a noora te bubu ae korakora ae waerake nako karawa. Ao bon akea riki aia anga ni birinako, b'a a manga rairaki tautian Iteraera ngkoa ake a kakioia nakon aaba ake a rereua, b'a a nang manga buakaniia.

²¹Ngke a nooria Iotua ma ana koraki b'a e a reke te kaawa i rouia raoia ake te korakina b'a e a bue te kaawa, ao a rairaki n tiringiia tautian Ai ake a kakioaki i rouia ngkoa.

²²A manga roko tautian Iteraera ake a buakana te kaawa ni buokiia Iotua ma ana koraki. Ao a tib'a ataia tautian Ai b'a ngaia a katobibiaki; ao a bane n tiringaki. Bon akea temanna ae reke maiuna

²³ma ti uean Ai. E tauaki ao e kairaki nakon Iotua.

²⁴A bane n tiringaki aia kairiribai Iteraera n te tabo ngkoa are a kakioaki nako iai, ake aaba ake a rereua. Ao a manga okira Ai n tiringiia kaaina ni kabane.

²⁵E teimatoa Iotua ni kotea te kaawa are Ai n tabon ana kainiwai ni karokoa baneia raoi kaaina ni mate.

²⁶M'aitin te botannaomata i aon Ai ake a bane n tiringaki n te tai arei, bon tebwi ma uoua tengaa te m'aane ao te aine.

²⁷Ao a kaawakin b'aai ma maan aomatan Iteraera ake a reke i rouia n tatabemaniia nako b'a ai bon aia b'ai, n aron ana taeka Iotua.

²⁸E kabuoka Ai Iotua ao e karikia b'a te tabo ae akea bonganana ni karokoa boong aikai.

²⁹E kabaea roroan uean Ai n te aroka tekaina, ao e katikua ikekei ni karokoa e bong. Ngke e a bung taai ao e a tuatua b'a e na anaaki rab'atana,[23] ni karenakoaki i mataroan te kaawa are Ai. Ao a tauna rab'atan n taian atiibu aika korakora, are e bon tiku naba ikanne ni karokoa boong aikai.

³⁰Ao i mwiina Iotua e katea baoni karean te UEA ae Atuaia Iteraera i aon te maunga are Eeb'ara.

³¹E karaoa aei ni kaineti ma ana taeka Moote are ana toro te UEA are e a tia n anganiia Iteraera, are e kaangai n te boki are Ana tua Moote: “Karaoa baonikareau n atiibu aika aki koreaki ni b'ainim'akuri aika biiti.”

³²Ao e a manga kaewei ana tua Moote Iotua i aon atiibu[24] tabeua, i mataia aomatan Iteraera

³³A tei aomatan Iteraera ma aia mataniwi ma aia b'akuaku, ao aia taani moti, n reitaki naba ma iruwa ake i buakoia. A tei aomatan Iteraera ni iteran te Atiniberita ake uoua ni kaaitaraia ibonga ake kanoan Rewi ake a uouota te Atiniberita. A tei aomata ake n te iterana ni bukin atuua te maunga are Keritim, ao ake tekorakina a bukin atuua te maunga are Eeb'ara. Bon aio ana taeka Moote ngkoa nakoia b'a a na karaoa te aro aei ngkana e a roko aia tai ni kakab'aiaki.

³⁴Ao e a wareka taekan te tua ni kabane Iotua ni kanenea b'anaana, ao e wareki naba taian kakab'aia, ma taian karereanti n ai aron are e koreaki n te boki n tua.

³⁵Bon akea te tua teuana ae aki warekia Iotua nakoia aomatan Iteraera ni kabane, m'aane, aine, ataei, ao iruwa naba ake a maeka i buakoia.