Read Te B'aib'ara 2.I-Tetaronike 2 Bible Online

2.I-Tetaronike 2 - Te B'aib'ara bible

2.I-Tetaronike 2

¹Ngkana E roko ara Uea are Iesu Kristo, ao ti na bane n ikotaki n uotaki rake nako Ina; ma ngaia ae I butingkami, taari,

²b'a kam na tai kam'aeieiaki n ami iango, ao kam na tai kakiriweaki irouia aomata aika taku b'a e a tia n roko ana bong[1] te Uea. A kona n taku b'a tao a ongo aei mairoun te Tamnei are Raoiroi, ke mairoun temanna, ke a boni warekia n ara reta teuana.

³E na tai burebureingkami temanna n te aro teuana: b'a e bon aki kona n roko te bong arei ngkana e tuai n roko moa te tai are a na ekaanako iai te Atua aomata aika bati, ao ngkana e tuai ni kaoti teuare buakaka, are kanan te mate.

⁴E na ekianako akana atongaki b'a atua ni kabaneia ma baika taromauriaki, ao e na rin n tekateka n um'antabun te Atua ma n taetae ni kaotia b'a aongkoa te Atua ngaia.

⁵Kam aki uringnga b'a ngke I mena i roumi ao I tuangngkami baikai?

⁶Ao kam bon ata te b'ai ae tutuka teuare buakaka b'a e aonga ni kaotaki n ana tai.

⁷B'a e a kamani waki te m'akuri n riri aon te tua n te aro ae aki konaki ni kab'arab'araaki raoi taekana; ma te baere e na riki e na aki kona n riki ni karokoa e uotaki nako teuare tutukia b'a e na aki riki,

⁸ao i mwina ngkanne, e na kaotaki teuare te tia ri aon te tua, are e na kamateaki iroun te Uea are Iesu n ikeni wina, ma ni kamaunaki ni mimitongin rokona.

⁹E na roko te tia ri aon te tua ma m'aakan Tatan ao e na karaoi taiani kanikina ma kamimii ni kewe.

¹⁰Ao e na kamanenai aaro ni m'am'anai ni kabane aika buakaka nakoia te koraki ake a nangi boni mate, i bukin aroia n rawa n anganaki tangiran te koaua are a na kamaiuaki iai.

¹¹Ma ngaia ae te Atua E kanakoa m'aakan te kairua b'a e na m'am'akuri i nanoia b'a a aonga ni kakoaua te kewe;

¹²ao b'a a aonga ni bane n atongaki b'a a bure akana rawa nakon te koaua, ma a kukurei n te buakaka.

¹³Ma e riai b'a ti na katituaraoa te Atua n taai nako i bukimi, taari, akana kam tangiraki iroun te Uea. I bukina b'a E a tia n rineingkami te Atua b'a moan aomata[2] ake a ana kamaiuaki ni m'aakana iroun Tamneina are Raoiroi b'a kam aonga n Raoiroi, ao ni kaaki ami onimaki n te koaua.

¹⁴E weteingkami nakon aei te Atua n te euangkerio are ti taekinna, b'a kam aonga ni buokanib'ai ma ara Uea are Iesu Kristo n neboakina.

¹⁵Ma ngaia ae kam na tei matoa, taari, ao kam na tauu taian taeka ake kam reireiaki iai, tao n ara taeka, ke tao n ara reta;

¹⁶ao ara Uea are Iesu Kristo ma te Atua ae Tamara are tangirira, ma n akoira n anganira kabebetean te nano ae aki toki, ma te kaantaninga ae raoiroi,

¹⁷E na kaninikoriai ma ni kateimatoai nanomi ni m'akuri ni kabane aika raraoi, ma taeka nako aika raraoi.