Read Te B'aib'ara 1.Timoteo 4 Bible Online

1.Timoteo 4 - Te B'aib'ara bible

1.Timoteo 4

¹E taetae te Tamnei are Raoiroi ni kaotia raoi b'a ni boong aika kabanea ni boong, ao bon iai tem'aangina aika na kaaka taekan te onimaki; ao ane a na iri nanoia tamnei aika bureburea te aba, ma aia reirei taimonio,

²aika nako mairouia taani kewe aika m'am'anaa te aba, aika mate mataniwin nanoia b'a kanga mwini kabuokaia n te biti ae kabuebue;

³a tuangiia aomata b'a a na tai iein, ao a na tai kang am'arake nako, aika E kariki te Atua b'a a na kakanaki ma te katituaraoi irouia aika onimaki ma n ata te koaua.

⁴B'a a bane n raraoi baika karikaki iroun te Atua, ao akea te b'ai teuana ae na kakiaki, ngkana e anaaki ni katituaraoaki te Atua iai,

⁵i bukina b'a e a katabuaki[7] n ana taeka te Atua ao n te tataro.

⁶Ngkana ko anga taeka n reirei aikai nakoia taari, ao ko riki iai b'a a na tia m'akuri ae e raoiroi Kristo Iesu, ae ko nabeaki n taekan te onimaki ma taekan reirei aika raraoi, aika ko tou mwiia.

⁷Ma ko na tai mutiakini karaki aika aki koaua aika bo buaka ma kanoan te euangkerio, aika karaki aika akea nanoia. Kataneiako b'a ko aonga n rangi n reitaki ma nanon te Atua ni maium.

⁸B'a bon iai teutana bonganani kataneiaan te rab'ata b'a e na marurung, ma te maiu n reitaki ma te Atua e bongana i bukini b'aai ni kabane, ngkai iai taeka n akoi, ae iai te kab'aia iai i bukin te maiu aei, ao i bukin te maiu ae na roko.

⁹E koaua te taeka aei, ao e riai b'a e na kakiaki i nanoia aomata ni kabaneia:

¹⁰B'a ti kakorakoraira ni m'akuri ao ti kekeiaki m'aaka[8] i bukina ngkai ti onimakina te Atua ae maiu, ae aia Tia Kamaiu aomata ni kabaneia, ai moara riki te koraki aika onimaki.

¹¹Ko na tuangiia kaain te ekaretia baikai, ao reireiia iai.

¹²E na tai kakeaa bonganam temanna ngkai te rorobuaka n ataei ngkoe; ma ko na riki b'a te banna ni kakairi nakoia aika onimaki, n am taeka, n te bae ko karaoia, n arom n tangira, n am onimaki, ma te aro ni maiu ae itiaki.

¹³Ko na tabe ma warekan te B'aib'ara, te kab'arab'ara, ao te reireiia aomata ni karokoa rokou.

¹⁴Ko na tai kaaki taekan te b'ai n tituaraoi ane i roum, are ko anganaki n te tai are a taetae ni burabeti iai burabeti ao a katokai baiia i aom unimm'aanen te ekaretia.

¹⁵Ko na kakaraoi baikai, ao kakaonimaki nako iai, b'a e aonga n noraki tamaroan am waaki irouia aomata ni kabaneia.

¹⁶Ko na tarataraiko n arom ni maium, ao tarataraa kanoan am reirei. Ko na kakaraoi baikai;[9] b'a ngkana ko karaoa aei, ao ko na kamaiuaki iai ma ake a ongo i roum.