Read Te B'aib'ara 2.Timoteo 3 Bible Online

2.Timoteo 3 - Te B'aib'ara bible

2.Timoteo 3

¹Ma ko na ata aei, b'a ane a na roko taai aika kamamate ni boong aika kabaneani boong.

²B'a ane a na riki aomata b'a taan tangiriia i bon i rouia, taani baki-tianti, taani kamoamoaia, taani kainikatonga, taan taetaebuaka, taan aki-ongeaba nakoia aia karo, taani bangaomata, taani kam'araai ana b'ai te Atua,

³taani babakaine, taani kainamatoa, taani winanti, taan akiako, taan tiritiri, taan ribaa te raoiroi,

⁴taani kam'anea te aba, taan aki kuba b'a tera ae na riki i mwin te baere a karaoia, taan nanorieta, taan tangira riki kukurein nanoia nakon tangiran te Atua;

⁵aongkoa taan taua te Aro, ma a oti ni maiuia b'a akea nanon tauan te Aro i rouia. Ko na tan nako mani baikai.

⁶Iai tem'angina i buakoia aika kawari aia auti aomata ao a anai nanoia aine aika akea aia iango ngkai a taonaki n rawawatani mwin aia bure aika bati, ao a kairaki n aeka n naano ni kaib'ab'aru aika bati.

⁷Aine aika aki toki ni kani karekei rabakauia, ma e bon aki kona n reke i rouia ataakin te koaua.

⁸B'a ai aroia Ianne ma Iambere[4] ngke a eekaanako Mote, ao ai aroia naba aomata aikai n eekaanako te koaua, aomata aika babanga n iango, ao taan aki onimaki ni koaua.

⁹Ma ane a na aki maan n aroia anne, ao a na ataaki aroia n nanobaba irouia aomata, n ai aron naba are e riki nakoia Ianne ma Iambere.

¹⁰Ma ngkoe, ko a tia n tou mwin au reirei, ma aroarou, ma oin au kaantaninga, ma au onimaki, ma taotaonan nanou, ma au tangira, ma nanom'akau,

¹¹ma b'ainikirinau nako, ma marakiu nako, ake a ituai i Antioka, i Ikonio, ao i Rutetera; ake b'ainikirinau ake I taona nanou nako iai; ao E kamaiuai te Uea mani baikai ni kabane.

¹²Ao ane a na bane ni b'ainikirinaki naba akana kani kabane aia bong ni maiu n iraorao ma te Atua ngkai a reitaki ma Kristo Iesu;

¹³ma aomata aika buakaka ma aika m'am'anaa te aba n aroia n atongiia b'a aomata tabem'aang ngke bon tiaki ngaiia; ane a na rikirake aroia man ae buakaka nakon ae buakaka riki, ni bureburea te aba ao ni burebureaki i bon i rouia.

¹⁴Ma ngkoe, ko na tai toki n tauu ni kamatoai baikana ko reireiaki iai, akana ko kakoauai raoi, ngkai ko ataiia ake a reireiniko iai;

¹⁵ao ko ataia b'a ma ngke te merimeri ngkoe ao ko a kaman ata te B'aib'ara ae tabu, b'a e kona ni kawanawanako ma ni kairiko nakon te kamaiuaki are reke n onimakinani Kristo Iesu.

¹⁶Te B'aib'ara ni kabanea bon ana taeka te Atua, ao e manena i bukin te reirei, ma boaan te bure, ma manga-kaetan te kairua, ao i bukin te reirei aroni karaoan nanon te Atua:

¹⁷b'a e aonga ni konab'ai ma ni bobonga raoi nakoni karaoani baika raraoi ni kabane ana aomata te Atua.