Read Te B'aib'ara Ebera 2 Bible Online

Ebera 2 - Te B'aib'ara bible

Ebera 2

¹Ma ngaia ae e riai b'a ti na tau ni kamatoai baika ti a tia n ongo, b'a ti kawa ni beibeti nako.

²B'a ngke e noraki aron te taeka are taekinaki irouia anera b'a e koaua, ao ngke a reke booni buure ni kabane ma aki ongeaba ni kabane aika booia aika riai,

³ao ti na iranira ni kareke maiura ngkana ti aki mutiakina te aro ni kamaiu ae kakannato aei? E moa n taekinaki iroun te Uea, ao e kakoauaki nako ira irouia ake a ongo;

⁴ao te Atua E raoniia ni kakoaua n arona ni karaoi kanikina ma kamimii ma m'akuri aika m'aka ma tib'akini b'aai n tituaraoi ake mairoun te Tamnei are Raoiroi.

⁵B'a te Atua E aki kaki i aani m'akaia anera taekan te aonnaba ae nangi roko, ae ti taekinna.

⁶Ma e taetae temanna n te tabo teuana n te B'aib'ara ni kangai: “Tera te aomata, ngkai Ko ururingnga? Ke natin te aomata, ngkai ko kakawaria?

⁷Ko karinanoa riki nakoia anera i nanon te tai ae aki maan; Ko baunna b'a kanga te uea n te neboaki ma te karineaki.[3]

⁸Ko kaki b'aai ni kabane i aani waena.” B'a ngke E kaki b'aai ni kabane i aana, ao bon akea ae E katikua n aki kaki i aana. Ma ngkai, ti tuai n nori b'aai ni kabane i aana.

⁹Ma ti nora Iesu, are karaoaki ni karinanoaki riki nakoia anera i nanon te tai ae aki maan, b'a E aonga ni mate i bukiia aomata ni kabaneia; ao e riki aei man nanon te Atua n akoi. Ti noria ngkai b'a E a baunaki n te neboaki ma te karineaki i bukin arona ni maraki ma ni mate.

¹⁰Bon te b'ai ae riai iroun te Atua, are Ngaia ae kariki b'aai ma ni kateimatoai aroia, b'a E na karaoa Iesu b'a E na bobonga raoi arona n te maraki, b'a a aonga natin te Atua aika bati ni buokanib'ai ma Iesu ni mimitongin te Atua. B'a Iesu boni Ngaia ae kairiia nakon te kamaiuaki.

¹¹B'a Iesu ni botaki ma ake a riki n tabu maiuia i Rouna b'a ana b'ai te Atua a bane n nako man te oi ae ti teuana. Ma ngaia ae E aki mamaa n atongiia b'a tarina,

¹²ngkae E kangai “N na taekina aram nakoia tariu; N na anenea aram i buakon aia botaki n taromauri.”

¹³Ao E kangai naba: “N na onimakinna.” Ao E a manga kangai naba, “Noria, Ngai ma ataei aika E anganai te Atua.”

¹⁴Ma ngaia ae ngkai a buokanib'ai ataei n te raraa ma te iriko, ao Iesu E buokanib'ai naba ma ngaiia ni baikai, b'a e aonga n riki matena b'a kataean ana kai teuare iai m'aakana i aon te mate, ao teuaei bon te riaboro;

¹⁵ao n te aro aei E a kainaomataia iai aomata ni kabaneia aika a toronaki n aia bongi ni maiu ni kabane ni makan te mate.

¹⁶B'a E aki tauia anera ni kamaiuia, ma E tauia ana kariki Aberaam ni kamaiuia.

¹⁷Ma ngaia are e riai i Rouna b'a E na riki n ai aroia tarina ni b'aai ni kabane, b'a E aonga n riki b'a aia Ibonga ae Kakannato ae nanoanga ma ni kakaonimaki ni baika reitaki ma te Atua, n anga te karea n raoi i bukin aia bure aomata.

¹⁸B'a ngkae E a tia ni maraki ao ni kaririaki, ao E boni kona ni buokiia akana kaririaki.