Read Te B'aib'ara Ebera 5 Bible Online

Ebera 5 - Te B'aib'ara bible

Ebera 5

¹B'a te ibonga ae kakannato e a rineaki mai buakoia raona, b'a e na m'akuri i bukin te Atua i bukiia aomata, b'a e na kakaraoi taromauri ma n anganga karea i bukini buure.

²Ngkai a bati naba mamaran te ibonga ae kakannato ao bon iai ana kona n nanoangaia akana karaoi m'akuri aika kairua i bukini babangaia;

³i bukini mamarana anne, ao e bon riai b'a e na anga karea tiaki ti i bukin aia bure aomata, ma i bukin naba oin ana bure.

⁴Ao akea temanna ae anaa te karineaki aei b'a karineana, ae te nakoa n ibonga ae kakannato, ma ti ngkana e weteaki nako iai iroun te Atua, n ai aron Aaron.

⁵Ao ai aron naba Kristo, E aki neboaia i bon i Rouna n arona n riki b'a te Ibonga ae Kakannato Ngaia, ma E neboaki iai iroun te Atua ngke E kangai nako Ina, “Bon Natiu Ngkoe, I karikiko n te bong aei.”

⁶Ao E a manga kangai naba n te tabo teuana: “Bon te Ibonga Ngkoe n aki toki N ai aroni Merekitereka.”

⁷Ngke E maiu Iesu i aon te aba, ao E tataro ni bubuti ma te tang ae korakora ma ranni matana nakon Teuare kona te kamaiua man te mate, ao E ongo i Rouna i bukina b'a iai makan ma karinean te Atua i Rouna.

⁸E boni ngae ngke te Nati, ma E reireinaki te ongeaba ni baike E maraki iai;

⁹ao ngke E a bobonga raoi arona, ao E riki iai b'a te tia karika te maiu are aki toki nakoia ni kabaneia aika ira nanona;

¹⁰ao E atongaki iroun te Atua b'a te Ibonga ae Kakannato, ae te karinan ae Merekitereka.

¹¹A bati ara taeka aika ti kan taekin i bukin te nakoa n ibonga aei ma a kanganga aroia ni kab'arab'araaki nako imi, i bukina ngkai kam aki kai oota iai.

¹²Kam a riai ni kaman tia n riki b'a taan reirei, ma ae kam bon tangira naba temanna b'a e na reireingkami baike moan reirei n ana taeka te Atua; ao ae kam bon teimatoa naba n tangira te miriki, ao tiaki te am'arake ae matoatoa.

¹³B'a ane momooi n te miriki ao ai aron te merimeri ae akea ana atatai n taekani karaoan nanon te Atua.

¹⁴Ma te am'arake ae matoatoa bon i bukiia aika ikawai, akana a kataneiaki b'a a aonga ni kona n ata te kaokoro i marenan ae raoiroi ma ae buakaka.