Read Te B'aib'ara Iakobo 1 Bible Online

Iakobo 1 - Te B'aib'ara bible

Iakobo 1

¹Mairoun Iakobo, ae ana toro te Atua ma te Uea are Iesu Kristo; nakoia ana aomata nako te Atua ake a uamaae i aonnaba; kam na mauri.

²Tariu, kam na kim'areirei ngkana kam kaitara ma taiani kariri nako,

³ngkai kam ata kataan ami onimaki b'a e karika te nano m'aaka.

⁴Ao ke e kakororaoa raoi ana m'akuri te nanom'aaka i nanomi, b'a kam aonga ni kororaoi n akea kab'akami, ao kam aki kainano n te b'ai teuana.

⁵Ngkana akea ana rabakau temanna i buakomi, ao e na butiia te Atua ae tituaraoi, ae kukurei n anganganiia aomata ni kabaneia, ao e na bon anganaki.

⁶Ma e na bubuti ma te nano n onimaki, n aki nanokokoraki teutana; b'a ane nanokokoraki ai aron naoni marawa ae ukaki n te ang ao e kaueaki.

⁷E na tai taku te aomata anne b'a e na anganaki te b'ai mairoun te Uea;

⁸ngkai te aomata ngaia n nanououa, ae e kai bibitaki arona.

⁹Ke e kim'areirei te tari ae aki kaub'ai ngkae e karietataki;

¹⁰ao e na kim'areirei ane kaub'ai ngkae e karinanoaki: b'a ane kaub'ai ao e na mauna n ai aron ueen te uteute.

¹¹B'a e oti taai ma te ang ae kabuebue, ao e karaia te uteute; ao e b'aka ueena, ao e mauna tamaroana. Ao ai aron naba te aomata ae kaub'ai: e na rai i nanon ana tai ni wakina ana bitineti.

¹²E a kab'aia te aomata ae teimatoa i buakon te kaririaki; b'a ngkana e a tia ni kataaki, ao e na reke i rouna te bau are te maiu, are E atongnga te Uea b'a aia b'ai akana tangiria.

¹³Ngkana e kaririaki temanna, ao ke e tai kaangai, “I kaririaki mairoun te Atua.” B'a E aki konaaki te Atua ni kaririaki ni baika bubuaka, ao akea ae E kaririaki i rouna;

¹⁴ma e kaririaki te aomata ngkana e kairaki ma n tauaki n nanona ni kaib'ab'aru.

¹⁵Ao te nano ni kaib'ab'aru, ngkana e bikoukou, ao e bungia te bure; ao te bure, ngkana e ikawai, ao e bungia te mate.

¹⁶Tariu aika kam tangiraki, a na tai bure ami iango.

¹⁷B'aai ni kabane aika raraoi ma ni moanibaan te raoiroi boni b'aai n tituaraoi mai eta, aika ruo mairoun Taman te oota,[1] are akea i rouna te bibitaki are e na reke mai iai te nu ae roo.

¹⁸E karikira n oin nanona, n te taeka are te koaua, b'a ti na riki b'a kanga moani-b'ai i buakoia akana karikaki i rouna.

¹⁹Tariu aika kam tangiraki, kam na ata aei: a riai aomata nako n aki tab'ara n ongora, a na aki waekoa ni kan taetae, ao a na aki kakai un;

²⁰b'a unin te aomata e aki kona ni karaoa nanon te Atua.

²¹Ma ngaia ae kam na kaaki aromi aika kam'ara ma kateimi ni kabane aika bubuaka, ao kam na kaaki i nanomi ma te nimamannei te taeka are unikaki are kona te kamaiungkami.

²²Kam na aki m'am'anaingkami n iangoia b'a ti taan ongora ngkami n ana taeka te Atua; ma kam na riki b'a taan toua mwina.

²³B'a ngkana e ongo ana taeka te Atua te aomata n aki toua mwina, ao ai aron te aomata ae tirotiroia n te tirotaam:

²⁴b'a e tirotiroia, ao e nako, ao e a m'aninga naba ngkekei tein taraana.

²⁵Ma ane taratara te tua are moanibaan te raoiroi, are tuan te inaomata, n teimatoa iai, ngkai tiaki te aomata ngaia are e ongo ao i mwina e m'aninga, ma te aomata are karaoa nanon te baere e ongo, ao e na kakab'aiaki n are e na karaoia.

²⁶Ngkana e taku temanna b'a e taua te Aro, ao e aki kona n taua tian ana taeka, ao e boni m'am'anaia i bon i rouna, ao akea nanon tauan te Aro i rouna.

²⁷Aio te Aro ae itiaki ae aki kam'ara i matan te Atua ae te Tama: bon tararuaia akana a mate tamaia ma aine aika a mate buia ni kain nanoia; ao te kawakinna te aomata b'a e na aki baareka ni b'ain aon te aba.