Read Te B'aib'ara Tani Motiki-taeka 11 Bible Online

Tani Motiki-taeka 11 - Te B'aib'ara bible

Tani Motiki-taeka 11

¹Ao a iangoa rinean te tia kairiiri ae ninikoria ae Iebeta are natin Kireata taani kairiiri man te baronga are Kireata b'a e na kaira buakanaia kaain Ammon. E ngae ngke boni kaain te kaainga are Kireata Iebeta, are a tia ni kanakoaki man te aono are a maeka iai. Bon natin ainen mataawa Iebeta, ma ai tarina nako bon natin buun tamana ma temanna. Ao a taku nakoina ai tarina, Bon tiaki ngkoe raoi kaain ara utu, ma ngaia are, akea b'ain ara utu teuana ae ko na anganaki. Ao a tuangnga b'a e na kiitana te auti. Ao e nakon te kaawa are Toba Iebeta, ao a iria aomata aika akea aroia i bukin iangoan te m'ane. Ma ngaia are, a nako taani kairiiri mai Kireata ni kawara Iebeta ao a taku,

⁶Taiaoka ma ko na iriira n okira Kireata b'a ko na kairiira n te buaka b'a ti aonga ni buakaniia kaain Ammon.

⁷Ao e taku Iebeta, Ao e aera ngkoa ngke kam ribaai? Bon tiaki ngkami ngkoa ake kam kanakoai b'a N na kitaniia au utu? Ao kam a roko ngkai i bukina ngkai kam a taonaki n te kangaanga.

⁸Ao a taku taani kairiiri, Tiaki i bukin anne ma ngkana ko kairiira nakon te buaka, ao ti na karikiko b'a te tia tautaeka i Kireata.

⁹Ao e taku Iebeta, E raoiroi, ngkana I iringkami ao E karekea au tokanikai te UEA i aoia kaain Ammon, ao kam na bon karikai b'a ami tia tautaeka?

¹⁰Ao a taku taani kairiiri, Eng, bon ara taeka aikanne ao bon te tia kakoaua te UEA.

¹¹Ao e nako Iebeta nako Mitib'a [81] ma taani kairiiri mai Kireata. A bootaki kaain Kireata n tabo n taromauri ao a karika Iebeta b'a aia tia tautaeka. Ao e anga naba ana berita Iebeta nakoia.

¹²Ao i mwiin te bootaki, ao e kanakoa ana tia uarongorongo Iebeta nakon uean Ammon ma te rongorongo ae kaangai, Tera ae kam ukoukoria, kam ukoukora te buaka? Kam a tia ni buakana abau, ao I kan ongora b'a tera bukina?

¹³Ao e taku uean Ammon, Tuanga Iebeta b'a bon abau te aba aei, ni moa man te Karaanga are Arenon are i maiaki, nakon te Karaanga are Iaboka are i meang, ao nako maeaon te Karaanga are te Ioretan. Ao ngke a otinako Iteraera mai Aikubita, ao a iraea naba. Tuanga Iebeta b'a e na kaokia nako iu, ao a na akea te buaka.

¹⁴Ao e a manga kaoka ana taeka Iebeta nakon uean Ammon,

¹⁵ao a tuangnga ana taeka Iebeta ae kaangai: Bon akea te aba ae anaia Iteraera mai rouia kaain Moaaba ma kaain Ammon.

¹⁶Ngke a roko Iteraera mai Aikubita, ao a m'ananga i nanon te rereua nakon Taari are Mate [82] ao ni manga bo nako Kateti.

¹⁷Ao a kanakoa te rongorongo nakon uean Etom ao a taku, Taiaoka, ti na ri nanon abami. Ma e rawa uean Etom. A kanakoa naba te rongorongo nakon uean Moaaba, ma e rawa naba ni kariniia Iteraera. Ma ngaia are, a tiku Iteraera i Kateti.

¹⁸Ao tabeua te tai i mwiina, ao a m'ananga nako Iteraera nakon te rereua, n ri mainikun Etom ao Moaaba, ao a manga kaemb'a i mainikun te Karaanga are uarereke are Arenon. Bon tian Moaaba mai mainiku te Arenon, ao ngkai a aki ri nanona Iteraera, ao a bon aki roko naba n te toua tanon Moaaba.

¹⁹A kanakoa aia rongorongo Iteraera nakon uean Amora are Taion are maeka i Etibon ni kaangai, Taiaoka, kariaia ara aomata b'a a na ri nanon abami nakon abaia.

²⁰Ao e aki kakoauaia Iteraera te uea are Taion, ao e botiia ana taanga ni buaka. Ao a kaemb'a i Iaati, ao i mwiiina, a buakana aia kaemb'a Iteraera.

²¹Ma E buokiia Iteraera te UEA ni kataenikaia Taion ma ana taanga ni buaka. Ao a bane n reke abaia kaain Amora ake a maeka iai ana aomata Taion irouia Iteraera,

²²ni moa man te Karaanga are te Arenon are i maiaki nakon te Karaanga are Iaboka i meang, ao man te rereua are i mainikun te Karaanga are te Ioretan are i maeao.

²³Ao a tuanga naba uean Ammon te b'ai are e taekin Iebeta are kaangai: E buokiia ana Aomata te UEA ni kataenikaia kaain Amora ma n anai abaia. Ao ngkoe, ko taku ngkai b'a e na reke naba iroum te aba anne?

²⁴Ngkana atuami Kemoti [83] ao e taua te aba man anganingkami, e koaua b'a akea ami b'ai iai? Ma ngkana E anaa te aba anne te UEA ma n anganiira, ao bon abara!

²⁵Ko boraoi ma B'araka are natin Tibore te m'aane? Bon uean Moaaba ngaia, ma e aki kan uneaki ma Iteraera ke ni buaka ma ngaira.

²⁶A tia ni maeka Iteraera i Etibon ao Aroera ao ni kaawa aika uarereke ake i rarikiia, ma kaawa ake i mataniwiin karaangan te Arenon ae uarereke i nanon te maan ae 300 te ririki. E aera ngkai ko aki tataningaa te tai aei ni iangoa kaokakina ngkana ko taku b'a bon abam?

²⁷Bon akea te kaairua ae I a tia ni karaoia nakoimi, ao e rangi ni kaairua ngkai ko a iangoa te buaka. I tataro nakon te UEA b'a E na kaotia b'a tao e eti Iteraera ke Ammon.

²⁸Ma e aki tabeakina ana rongorongo Iebeta uean Ammon.

²⁹Ao E niniia Iebeta Tamnein te UEA, ao e nako Iebeta n ri nuukan Kireata ma Manate, ma ni kateirakea te taanga ni buaka. Ao n tokina, e a roko i Mitib'a i Kireata, ike

³⁰e berita iai nakon te UEA ni kaangai,

³¹N na anga b'a au karea nakoim te moani b'ai ane otinako ni kawarai

³²ngkana Ko kataenikaia kaain Ammon ma ni kaokai nakon mwengau ma te maiu.

³³Ao Iebeta ma ana taanga ni buaka a kataenikai 20 kaawa ake i marenan Aroera ma Minnita, ao tabeua riki ni karokoa Abera Keramim. Ao i mwiin anne, ao a aki manga kona ni buakaniia riki Iteraera kaain Ammon.

³⁴Ao ngke e a okira mwengana Iebeta i Mitib'a, ao te moan aomata are e otinako ni butim'aia bon natina te aine. E katanga te timbere, ao e b'ab'atere i bukin ana tokanikai tamana, ao bon ti ngaia natina.

³⁵Ao e tang Iebeta, O, ao e raeuaaka kunnikaina i bukin rawawatana ao e taku nakon natina, I a tia ni berita nakon te UEA, ao I riai ni kakoroa bukina. Otinakom ni kawarai e bon riki b'a uruakin nanou.

³⁶Ao e taku natina, Tamau, ko a tia ni berita nakon te UEA, ao E anganiko te tokanikai i aoia kaain Ammon. Ao ngkai ko riai ni kakoroa nanona, e aoria ngkana N na mate iai.

³⁷Ma te moan b'ai moa, I bubutiiko b'a ko na kariaiakai b'a N na nako ma raoraou b'a ti na m'am'ananga n neweaba n aaba ake a tabukibuki b'a ti na kaai n tang b'a I a aki kona n iein ma ni karekea natiu.

³⁸Ao e taku Iebeta, E na reke nakoim 2 te nam'akaina. Ao e nako te ataeinaine ma ataeinaine tabeman ni m'am'ananga i aon aaba ake a tabukibuki i nanon 2 te nam'akaina, ao a tang i bukina b'a e a aki kona n iein ma ni karekeia natina.

³⁹Ao i mwiina, e okira tamana, ao e karaoa te b'ai are a tia ni berita iai tamana, ao e aki iein te nati arei. Ao bon anne bukina are

⁴⁰a aki toki n nanakonako iai ainen Iteraera i nanon 4 te bong ma n tangitang ni katoa ririki.