Read Te B'aib'ara Tani Motiki-taeka 13 Bible Online

Tani Motiki-taeka 13 - Te B'aib'ara bible

Tani Motiki-taeka 13

¹Ao a manga moana naba aki ongotaekaia Iteraera nakon te UEA. Ma ngaia are, E kanakoia kaain Biritia te UEA b'a a na taua taekan Iteraera i nanon 40 te ririki.

²E maeka Manoa n te kaawa are Tora. E kanoabo buuna,

³ma n te tai teuana E kaoti Ana anera te UEA nakoina ao e taku: E tuai man reke natim, ma n te tai ae aki maan ao ko na bikoukou ao e na reke natim te m'aane. E na riki b'a Ana b'ai te Atua [91] man te tai are e moani bungiaki iai, ma ngaia are, e na aki kokoreaki iran atuuna. Ao i m'aain naba bungiakina, ao ko na aki momooi n te wain ke te biia ke ni kang am'arake aika tabuaki kanakiia n aron ake n ana Tua te Atua. E na moana kainaomataia Iteraera natim te m'aane mai rouia kaain Biritia.

⁶Ao e nakon Manoa ao e taku, E roko irou te burabeti ae ai aron Ana anera te Atua ao e taetae nako iu. I bon rangi ni maaku, n te aro are I aki roko n te titirakinna b'a e nako mai ia. E aki tuangai arana,

⁷ma e ti tuangai b'a N na bungia natiu te m'aane. N na riai n aki nima te wain ke te biia ke ni kang am'arake aika tabuaki kanakiia n aron ake n ana Tua te Atua. E na riki b'a Ana b'ai te Atua natira te m'aane ni kabane bongin maiuna.

⁸Ao e tataro Manoa ao e taku, Ara UEA, taiaoka ma kanakomaia riki am burabeti b'a e na tuangiira te b'ai ae ti na karaoia nakon natira te m'aane ae nang reke iroura.

⁹Ao E kaeka ana tataro Manoa te Atua, ao e manga okira buun Manoa te anera ngke e tabe neirei ni motirawa i nanon te katawanang. E bon aki mena Manoa ikekei n te tai arei,

¹⁰ma ngaia are, ngke e reke Manoa i rouna ao e taku, E a manga roko naba te m'aane arei. Bon te aomata are I nooria ni boong aika nako.

¹¹Ao e airi Manoa ma buuna ao e titirakina te m'aane arei ni kaangai, Boni ngkoe te aomata are e taetae ma buu? Ao e taku teuarei, Eng, boni ngai.

¹²Ao e titiraki Manoa ni kaangai, Tera te tua ae ti na ira nanona, ao tera ae na karaoia natira ngkana e koro bukin am taeka ni berita?

¹³Ao E taku Ana anera te UEA, E na riai ni karaoi raoi b'aai ni kabane buum ake I a tia n tuangnga. E na aki nim ke ni kang b'aai aika karaoaki man te kureebe.

¹⁴E na aki nima te wain ke te biia ke ni kang b'aai aika tabuaki kanakiia n aron akana n ana tua te Atua. I a tia n tuangnga raoi b'aai aika e na karaoi.

¹⁵Ao e taku Manoa, Taiaoka ma ko na tiku i rarikira tabeua te tai b'a ti na tiringa te kooti ae uarereke b'a ko na am'arake.

¹⁶E m'aninga Manoa are e taetae ma temanna ana anera te UEA. Ao e taku te anera, I aki kona n tiku tabeua te tai, ma ngkana ko kan anga am karea te kooti nakon te UEA, ao e tamaroa.

¹⁷Ao e taku Manoa, Taiaoka ma tuangiira aram, b'a ti aonga ni karineko ngkana e a tia ni bungiaki natira te m'aane.

¹⁸Ao e taku te anera, Tiaki ngaia anne, bon akea uaan ataakin arau iroumi. Ao ngkana iai, ao kam bon aki kona naba n ataa nanona.

¹⁹Ao e anaa te kooti ae uarereke Manoa nako aon te b'a ae buubura ae a tia n rineia b'a ana baonikarea, ao e kauraa te ai i aon te b'a. Ao e tiringa te kooti, ao e anga ma tabeua te uita b'a te karea nakon te UEA. Ma e riki te b'ai teuana ae kamimii.

²⁰E ura te ai ni karokoa karawa, ao e waerake te anera arei n te ai nako karawa. Ao a bobaraaki Manoa ma buuna nako naano ngke a noori baikai.

²¹Ao e a nako te anera, ma a tib'a ataia Manoa ma buuna b'a ngaia Ana anera te UEA.

²²Ao e taku Manoa, Ti a tia n noora te anera [92] Ti nang mate. [93]

²³Ao e taku buun Manoa, E na aki tiringiira te UEA, b'a E kukurei n ara karea ma ara uita are ti anga, ao E kariaia b'a ti na noori baika a kamimii. Ao i rarikin anne, E tuangiira naba b'a e na reke natira te m'aane.

²⁴Ao i mwiin te tai ae maan, ao e bungiia natina te m'aane buun Manoa, ao e aranna b'a Tamton. Ao E kakab'aia te tei arei te UEA i nanon rikirakena.

²⁵Ao ngke e mena Tamton n ana kaemb'a Taan [94] are i marenan te kaawa are Tora ma Etitaora, ao e niniaki n Tamnein te UEA.