Read Te B'aib'ara Tani Motiki-taeka 16 Bible Online

Tani Motiki-taeka 16 - Te B'aib'ara bible

Tani Motiki-taeka 16

¹Ao n te tai teuana ngke e mena Tamton i Kaata, ao e noora temanna ainen mataawa, ao e rinnako n ana auti ni mena iai n te tairiki arei ni kangainaa.

²Ao a ataia kaain te kaawa arei b'a e mena ikekei, ao a iangoa tiringana i m'aain te ngaina. Ma ngaia are, a nako n torokaranna n taian auti ni uaatiman ake ni iteran te mataroa ake uoua n tataninga okina.[113]

³Ma e uti Tamton ngke nukanibong ao e nakon mataroan te kaawa, ao e kouti taiani mataroa ma taiani boua ake a nim iai ma te o, ao e katokai i aon angana. Ao e a uoti nako nakon te tabuki teuana ae kaaitaraa Eberon, [114] ao e katei taiani mataroa akekei n aroia are a bono ma n rokanaki.

⁴Ao i mwiin te tai ae aki maan, ao teuare Tamton e a tangira te aine ae Nei Terira ae maeka ni M'aruan Toreka.

⁵Ao a m'ananga taan tautaeka mai Biritia [115] n tatabemaniia nako ni kawara Nei Terira ao a taku, Ko na m'am'anaa Tamton b'a e na tuangko te b'ai ae riki n aintoa iai, ao te b'ai ae na manga riki ni ngore iai. Ao i mwiina, ti na kabaea b'a e aonga n aki manga kona ni biri nako. Ngkana ko kona ni karaoa anne, ao ti na anganiko 11,000 taiani m'akoro n tirewa. [116]

⁶Ao n te tai riki teuana i mwiina, e a manga mena naba Tamton n ana auti Nei Terira, ao e titirakinna neirei ni kaangai, Tamton, tera te b'ai ae ko riki ni korakora iai? E kanga aron ae N na kabaeko iai ao ko na aki kona ni manga ni b'aranako? Anne ngkoe, tuangai.

⁷Ao e taku Tamton, “Ngkana ko kabaeai n itiai karain te kainikatebe aika tuai ni kam'auaki, [117] ao N na riki iai ni ngore kaanga aroia aomata nako.”

⁸Ao a karaoi itiai karain te kainikatebe aika boou taan tautaeka ao a angan Nei Terira. Ao a tuangiia tautia tabeman b'a a na kawara Nei Terira, ao a na karabaia n te ru are a mena iai Tamton ma Nei Terira. B'a ngkana e riki ni ngore Tamton ni karain te kainikatebe ake a karaoaki, ao a na taua Tamton. Ao e kabaea Tamton Nei Terira ni karain te kainikatebe, ao e takaarua, Tamton, a nang buakaniko kaain Biritia. Ao e motiki karain te kainikatebe Tamton kaanga ai aron taiani karai aika mka. Ao e aki reke bukin korakoran Tamton irouia kaain Biritia.

¹⁰Ao e taku Nei Terira, “Ko keweai ao ko kataia ni kaburababaai. Ko na tuangai ngkai b'a tera bukin korakoram, ao N na kanga ni kabaeko?”

¹¹Ao e taku Tamton, “Ko na kamanenai taian roobu aika rangi ni boou. Ngkana ko kabaeai n taian roobu aika rangi ni boou, ao N na riki n aroia aomata aika ngore.”

¹²Ao a reke ana roobu Nei Terira aika boou ao a manga karabaia naba kaain Biritia tabeman n te ru. Ao e a manga kabaea naba bain Tamton ao e takaarua, “Tamton, a nang buakaniko kaain Biritia.” Ao e moimotiki taian roobu Tamton kaanga taiani karai aika irariki.

¹³Ao e taku Nei Terira, “Ngaia ko boni keweai naba ma ni kataia ni kaburababaai. Ko na tuangai ngkai aron kabaeam.” Ao e taku Tamton, “Ngkana ko bibiri au bibiri aika itiai aikai ma karain te b'ai n raranga kunnikai, ao ko a manga neeran ma te b'ai n raranga kunnikai [118] ma te o, ao N na riki b'a te aomata ae ngore.”

¹⁴Ao ngke e matu Tamton, ao e a bibira iran Tamton Nei Terira ma karain te b'ai n raranga kunnikai, ao e boneraa te b'ai n raranga kunnikai nakon te o.[119] Ao e takaarua, “Tamton, a nang buakaniko kaaini Biritia.” Ao e uti Tamton ao e kouta te b'ai n raranga kunnikai mai oina are n te tano, ao man taian neera naba ake n te o. Ao i mwina, e a manga taeka irana man te kunnikai are a tia n rarangaaki.

¹⁵Ao e taku Nei Terira, “Tamton, ko taku b'a ko tangirai, ma ngaia bon te kewe. Ko a tia ni kaburababaai tenua te tai, ao ko tuai man tuangai aron reken korakoram.”

¹⁶Ao e a kaauakinna ma n imanonoia ni katoa bong ni karokoa ae a b'ara nanon Tamton.

¹⁷Ao ni bon tokina, e a tuanga neierei te koaua Tamton ao e taku, Bon ana b'ai te Atua ngai [120] ma ngke te tei ngai, ngaia are, e tuai man kokoreaki iran atu. Ngkana e koreaki ao e na nako naba korakorau mairou, ao N na riki iai ni ngore ni bon aroia aomata.

¹⁸Ao e a ataia Nei Terira b'a e a bon taekina raoi te koaua. Ma ngaia are, e kanakoa temanna b'a e na tuangiia taan tautaeka ni kaangai, Kam na nakomai riki nakon au auti te kabanea n tai. E a tia n tuangai raoi ngkai Tamton te koaua. Ao a uoti taian tirewa nakon ana auti Nei Terira taan tautaeka n aron are a tia ni berita iai nakoina.

¹⁹Ao e kamatuua Tamton Nei Terira i aon toan waena. Ao e anga ana kanikina nakon temanna m'aanen Biritia ngke a tabe ni korea ana bibiri Tamton ake itiai. Ao ngke a tia ni koreia, ao e a nako korakoran Tamton. Ao e kabaea Tamton Nei Terira

²⁰ao e takaarua, Tamton a buakaniko kaain Biritia. Ao e uti Tamton ao e taku n ana iango, N na manga bon b'aranako ma ni birinako n aron are I bon kakaraoia. E aki ataia b'a e a toki buokana iroun te UEA.

²¹Ao a taua Tamton kaain Biritia, ao a auta matana ni karebenakoi. A uotia nakon te karabuuti i Kaata ao a kabaea n taian taurekereke. Ao i mwiina, a kam'akuria b'a e na kaminominoa te atiibu n ib'araua.

²²Ma aki manga korea riki iran atuuna ngaia are, e a manga rikirake iran atuuna.

²³Ao a karaoa aia bootaki ni kukurei ae buubura taan tautaeka ao a anga aia karea nakon antiia are Takon. Ao a taku taan tautaeka: Bon ara kairiribai ngkoa Tamton ma e a tia Takon ni buokiira n taua Tamton.

²⁴Ao a bane ni kukurei aomata, ao a takaarua ni kaangai, Kaotinakoa Tamton, ti na katoki nanora ni ngareakinna.

²⁵Ao a kaotinakoa Tamton man te karabuuti taan tautaeka, ao ngke a nooria aomata, ao a neboa antiia iai ni kaangai: E tiring arokara Tamton e tiringiia ara aomata bon ara kairiribai, ma e buokiira atuara n taua. A b'ainingarea Tamton teutana, ao i mwiina a tuangnga b'a e na tei i rarikin bouan te tembora ake i nuuka ake bouan te taubuki.

²⁶E taua bain Tamton temanna te rorobuaka n ataei ni kairiia, ao e taku Tamton, Taiaoka karekea te tabo ae iai te b'ai ae N na raraaia. Kairai nakon taian boua ake bouan te taubuki.

²⁷Ao a tabe ni waakina aia bootaki ni kukurei taan tautaeka i Biritia ma n rib'anono irouia aomata aika 3,000 taian aomata[121] ao angiia riki ake a mena i aon taubukin te tembora. A bane n taratara Tamton ma ni b'ainingareia. [122]

²⁸Ao e tataro Tamton ni kaangai, Taiaoka te UEA ae te Atua, Ko na uringai. A auta matau kaain Biritia ni kanakoi, ma I butiko b'a ko na manga kakorakoraai riki te kabanea n tai, b'a I a kukurei naba ngkana tao e ti reke irantaangakin kanoan matau ti teuana. [123]

²⁹Ao e tei Tamton i nuukan boua aika uaai ake bouan te taubuki. E kanakoa baina ao e reke i baina are te angaatai te boua are teuana, ao te boua are teaina ni baina are te maing.

³⁰Ao e takaarua ni kaangai, “N na mate ma kaain Biritia.” Ao e butui taiani boua ake uaai akekei n tokini korakorana, ao e ingunako te tembora ni b'akariia taan tautaeka ma aomata ni kabane ake i nanona. E raka riki m'aitiia kaain Biritia ake a mate iroun Tamton ni matena, nakon ake e tiringi ngke e boni maiu.

³¹Ao a m'ananga tarina nako ma ana utu nako Kaata ao a anaa rab'atana nakoni mwengana, ao a taunna n ana ruanimate tamana are te b'angani matang [124] are e mena i marenan Tora ma Etitaora. Bon te tia kairiiri [125] Tamton i aon Iteraera i nanon 20 te ririki.