Read Te B'aib'ara Tani Motiki-taeka 21 Bible Online

Tani Motiki-taeka 21 - Te B'aib'ara bible

Tani Motiki-taeka 21

¹Ao ngke a tia ni kaaitibo Iteraera i Mitib'a i m'aain te buaka ma kaain te baronga are Beniamin, [162] ao a karaoa te berita ae tabu: Bon akea mairoura ae na anga natina te aine b'a e na mare ma m'aanen te baronga are Beniamin.

²Ao i mwiin te buaka ma te baronga are Beniamin, ao a nako Iteraera nakon te tabo n taromauri i Betaera ao a tekateka ikekei ni karokoa bungin taai. Ao a takaarua n tang ni korakai,

³ao a tataro ni kaangai, Ara UEA, bon Atuan Iteraera Ngkoe. E aera ngkai ko kariaia b'a e na riki te aro aei? Ngkai e a bua ara baronga are teuana.

⁴Ao n te ingabong are i mwiina, ao a karaoa te baonikarea Iteraera ao a anga aia karea are kakukureian te UEA ma ni bubutiia Ana kakab'aia.[163]

⁵Ao a titirakiniia i bon irouia ni kaangai, Iai mai buakoia barongan Iteraera ae aki roko nakon te tabo n taromauri? Ti a tia ni karaoa ara berita ae tabu b'a ane aki roko n te bowi i Mitib'a ao e na tiringaki.

⁶Ao a nanokawaki Iteraera n te b'ai are riki nakoia kaain te baronga are Beniamin, ao a taku, E a mauna nako ara baronga are teuana.

⁷Bon ti tabeman m'aanen te baronga are Beniamin ake a aki mate n te buaka. Ti na karekeia buuia b'a a aonga n aki mauna nako. Ma ti nang kanga ni karaoa anne, ngkai ti a tia ni berita nakon te UEA b'a akea mai rouia ae na manga iein ma natira aine?

⁸Ao a manga titiraki riki Iteraera, Iai te baronga ae aki roko n tain te bowi are karaoaki i Mitib'a? Ao i mwiin te ititiraki i bon i marenaia, ao a kunea b'a ngaia a aki roko kaain Iabeti are i Kireata.

¹⁰Ma ngaia are, a kanakoia 12,000 aia taani buaka ma aia taeka ae kaangai, Buakana Iabeti i Kireata ao tiringiia kaaina ni kabane, ma ti aine aika tuai ni iein aika kam na kamaiuia.

¹²Ao a buakana Iabeti i Kireata taani buaka, ao a okira te maeka i Kanaan [164] ma 400 aine aika ataeinaine.

¹³Ao a ikotaki m'aane ao a kanakoa te rongorongo nakoia m'aanen Beniamin ni B'aan Rimmon, n tuangiia b'a a tangiria Iteraera ni karekea te raoi ma ngaiia.

¹⁴Ao a roko m'aanen Beniamin mani B'aan Rimmon, ao Iteraera a kaieiniia ma ataeinaine mai Iabeti. Ma a aki tau m'aitiia aine.

¹⁵Ao a rangi n nanokawaki Iteraera, i bukina ngke a kuri ni mauna nako aia baronga teuana.

¹⁶Ao a taku naake aia taani kairiiri i aoia ni kabane: A bane ni mate ainen Beniamin. Ao ti nang kanga ni karekeia buuia m'aanen Beniamin ake nikiraia?

¹⁷Ngkana akea natiia, ao ane na mauna nako teuana ana baronga Iteraera.

¹⁸Ma ti bon aki kona ni kaieiniia m'aanen Beniamin ma natira aine. Ti a tia ni karaoa ara berita ae matoa b'a ti na aki karaoa anne, ao ngkana ti a manga urua ara berita, ao ti na maraia.

¹⁹Ao e taku temanna, Ao tera ami iango n Ana Toa te UEA are kakaraoaki ni katoa ririki i Tiro? E na bo i Betaera, i maiakin Reb'anon, i mainikun te kawai are nako Betaera ao Tekem.

²⁰Ao taan kairiiri, a tuangiia m'aanen Beniamin ake a tuai reke buuia ni kaangai: Kam na nako Tiro ni karabaingkami ni nne ni kureebe i rarikiia n te tabo are karaoaki iai te Toa.

²¹Kam na tataningaia ataeinainen Tiro ake a na ruruoia. Kawaekoaingkami n otinako n raweia raomi i buakoia ataeinaine, ao uotiia nakon ami auti b'a buumi.

²²Ngkana a ngurengure tamaia ke tariia i bukiia, ao ti na kaangai, Taiaoka n nanoangaiia n anganiia m'aane akekei b'a buuia. A aki tau m'aitiia aine ake ti karekeia i bukiia m'aanen Beniamin n te buaka are i Iabeti. Ao kam na bon aki reke n te maraia n aron ara ti boraraoi iai [165] ngkai kam bon aki kariaia b'a a na iein ma natimi aine.

²³Ao a nako m'aanen Beniamin nako Tiro ni karabaia i buakon taian nne ni kureebe. Ao a waakina aia m'aie taian ataeinaine, ao a raweia buuia m'aane akekei n tatabemaniia nako ma ni uotiia nako. Ao a nako n okira abaia m'aanen Beniamin, ao a manga karaoa aia kaawa ma ni manga moana maekaia iai.

²⁴Ao i mwiin anne, ao a okiri mwengaia ma aia utu Iteraera ake te korakina.

²⁵A aki tautaekanaki Iteraera iroun te uea ni boong akekei, ao a bane ni inaomata aomata nako ni karaoa are a bon taku b'a e eti.