Read Te B'aib'ara Tani Motiki-taeka 7 Bible Online

Tani Motiki-taeka 7 - Te B'aib'ara bible

Tani Motiki-taeka 7

¹Ao n te karangaina are i mwiina, ao e uti Kiteon ma ana taanga ni buaka, ao a kam'ainga aia kaemb'a nakon te Koburake n ran are Maaku.[43] Ao kaain Miiria a kaemb'a i meang, n te m'arua are i aan te Maunga are More. [44]

²Ao E taku te UEA, “Kiteon, a rangi ni m'aiti kaain am taanga ni buaka. I aki kona n anganiko te tokanikai ngkai a rangi ni m'aiti kaaina. B'a ane a na taku Iteraera b'a a tokanikai i boni irouia, ao akea te b'ai ae I karaoia nakoia.

³Ma ngaia are, ko na bootia am taanga ni buaka, ao tuangiia b'a ane maaku ao e kona ni kiitana te Maunga are Kireata [45] ma n okira mwengana.” Ao a okira mwengaia 22,000 tautia, ao e tiku Kiteon ma ti 10,000 te tautia.

⁴Ao E taku te UEA, “Kiteon, a boni m'aiti naba am tautia akanne. Ko na manga kairiia nakon te koburake n ran, ao ko na kataia iai. N na tuangko b'a antai ae na iriko, ao antai ae na okira ana auti.”

⁵Ao ngke e kairiia rikaaki ana tautia Kiteon nakon te koburake n ran, ao E taku te UEA nakoina, “Ko na taraia b'a tera aron moiia n te ran. Ao i mwiina, ko na tib'auaia nakon uoua te koraki—akana newenewea te ran kaanga kamea, ao akana a katorobubua ma ni mooi.”

⁶Ao bon 100 m'aitiia m'aane ake a itiia te ran ni baiia, ao a neweneweia, ao ake nikiraia a katorobubua ni mooi.

⁷Ao E taku te UEA, “Kiteon, ko na anaiia aomata ake a itiia te ran ni baiia ma n newenewe ni mooi mai iai. Ao kaokiia akana nikiraia nakoni mwengaia. N na buokiko ni kamaiuia Iteraera, ao ni buokiia naba te taanga ni buaka are 300 m'aitiia ni kataenikaiia kaain Miiria.”

⁸Ao e anga ana taeka Kiteon n aron aikai, “Kam na tiku ngkami aika 300 ikai. Ao ngkami aika nikirana, kam na okiri mwengami, ma kam na katikui kanami ma ami bu iroura.” E mena aia kaemb'a ana taanga ni buaka Kiteon i aon te tabuki ni kaaitaraa aia maeka kaain Miiria are mena i nanon te m'arua.

⁹Ao E taku te UEA nako Kiteon n te tairiki anne, “Teirake ngkai, ao buakana aia maeka kaain Miiria. N na anganingkami te tokanikai i aoia,

¹⁰ma ngkana kam boni maaku naba ni buakaniia, ao ko na nako ma am toro are Bura nakon aia kaemb'a n te aro ae kam na aki nooraki.

¹¹Ao ngkana kam ongo aia taeka kaain Miiria, ao ane kam na aki maaku.” Ao a nako Kiteon ma Bura nakon aia maeka kaain Miiria, nakon te tabo ike a tei iai tautia.

¹²E bon rangi ni korakora te maeka arei. A kaona te m'arua arei kaanga te taanga n rookati [46] kaain Miiria, Amareka, ao botannaomata ake i mainiku. Tao e beebete riki warekan te tano are i mataniwiin te bike nakon warekan aia kaamero.

¹³Ao e ongo ana taeka temanna te tautia ngke e karakina miina nakon raona n tautia ae kaangai, “I miia teuana te kariki are karaoaki man te b'aare ae rabinobino n roko nakon ara kaemb'a. E orea te autinrianna are nneia ara mataniwi, [47] ao e ranganako te autinrianna ao e b'aka.”

¹⁴Ao e taku te tautia are raona, “Nanon miim anne, bon taekani Kiteon, are te kam'aanta irouia Iteraera. E na kairaki iroun te UEA ma ana taanga ni buaka ni kataenikaiia tautian Miiria ma kaain ara kaemb'a aei ni kabane.”

¹⁵Ao ngke e ongo Kiteon taekan te mii arei ma nanona, ao e bobaraaki n neboa te Atua. Ao i mwiina, e okira aia kaemb'a Iteraera ao e takaarua ni kaangai, “Ti a nako, E na katokanikaira te UEA i aon aia taanga ni buaka kaain Miiria.”

¹⁶Ao e bwenaua ana taanga ni buaka Kiteon nakon 3 te m'akoro aika 100 kaain tekorakina, ao e katoaia tautia ma aia bu, ao te tiaeki te kaatibu ae buubura ae te taura i nanona.

¹⁷Ao e taku Kiteon, “Ngkana ti roko n aia maeka ara kairiribai, ao kam na maenako ni katobibia. Ao kam na taningaai b'a N na anga te kanikina n te bu. N te tai are kam bon ongo naba iai tangin au bu ma au koraki, ao kam na katang ami bu, ao kam takaarua ni kaangai, ‘I bukin te UEA ao Kiteon.’ ”

¹⁹Ao a roko ana taanga ni buaka Kiteon i rarikin aia kaemb'a aia kairiribai tabeua te aoa i mwiin te roo, bon i mwiin naba rokoia tautia tabeman ake aia kairiribai ake a na manga tei. [48] Ao a katanga aia bu Kiteon ma ana koraki, ao a urui taian tiaeki ake kaatiibu, ake a karabaaki taian taura i nanoia,

²⁰ao a karaoa naba aron aei koraki ake uakoraki. A bane n taui aia taura ni baiia te angamaing, ao aia bu ni baiia are te angaatai, ao a takaarua ni kaangai, “Ana kabaang te UEA ma Kiteon!”

²¹Ao a ientaka aia tautia aia kairiribai, ao a iangoa birinakoia. Ao ana koraki Kiteon a bon tiku ni nneia ni katobibia aia maeka aia kairiribai, ma ni manga katangi riki aia bu.

²²Ao ngke a karaoa aei, ao te UEA e karikiia aia kairiribai b'a a na buutii aia kabaang i boni irouia ma ni buakaniia i boni irouia. Ao a kataia ni birinako aia kairiribai man aia kaemb'a. Ao a biri nakoni Kaawan Te Aroka are Te Aketia, nako Terera, [49] ni karokoa mataniwiin te aba are abaia kaain te kaawa are Abera Meora are i rarikin Tabata. [50]

²³Ao e manga kanakoa riki ana taeka Kiteon i bukin karokoakiia riki tabeman tautia mani baronga ake Nabetari, Atera, ao iteran Manate ake uoua [51] b'a a na buoka buakanakiia kaain Miiria.

²⁴Ao e kanakoa naba taani uarongorongo b'a a na tuangiia m'aane ni kabane ake a maeka n aaba ake a tabukibuki i Eberaim ni kaangai, Nakomai buokiira ni buakaniia kaain Miiria. Teiakini taian koburake n ran, karaanga n ran, ao taian m'anib'a, ni karokoa Beta Bara i m'aain rokoia kaain Miiria iai. Ao a teiakina naba te Karaanga are te Ioretan. Ao a karaoi raoi b'aai ni kabane ake e taekin Kiteon nakoia tautian Eberaim,

²⁵ao a buoka naba kakioaia kaain Miiria i mainikun te Karaanga are te Ioretan. A taua Reeben ao Kameanti,[52] ake taani kairiiri ake uoman mai Mirian. A tiringa Reeben n te b'a are buubura are e a manga ataaki n arana ae Ana B'a Reeben, ao a tiringa Kameanti i rarikin nnen maangen te wain.[53] A uoti atuuia taani kairiiri ake mai Miiria tautian Eberaim nakon Kiteon.