Read Te B'aib'ara Te Kaotioti 1 Bible Online

Te Kaotioti 1 - Te B'aib'ara bible

Te Kaotioti 1

¹Te boki aei bon taekan ana kaotioti Iesu Kristo, are E anganaki iroun te Atua, b'a E na kaotia nakoia ana toro. Kanoan te kaotioti aei bon taekani baika na waetata n roko. E kaoti baikai Kristo iroun ana anera are E kanakoa nakon ana toro ae Ioane,

²are taekini b'aai ni kabane ake e a tia n noori, are ana taeka te Atua ma te koaua are E kaotiotia Iesu Kristo.

³E a kab'aia ane wareki taeka ni burabeti aikai, ao a kab'aia naba akana ongo, akana kawakini baika koreaki i nanon te boki aio; b'a e a kaan te tai are a na riki iai baikai.

⁴ Mairoun Ioane nakoia ekaretia ake itiua ake i Atia: Ami b'ai te akoi ma te raoi mairoun Teuare bon iai ngkai, ao iai ngkoa, ao iai rimwi n aki toki; ami b'ai naba te akoi ma te raoi mairouia tamnei ake itiman ake a memena i nanoaan ana kaintokanuea;

⁵ao ami b'ai naba te akoi ma te raoi mairoun Iesu Kristo, are kakaonimaki, are te moa ni kamaiuaki mai buakoia maate[1] are E manga uti mai buakoia maate, ao are aia Mataniwi uea i aonnaba. E tangirira, ao E kainaomataira man ara bure ni matena;

⁶ ao E karaoira b'a ibonga n ueana, aika taani beku iroun Atuana ma Tamana: ana b'ai te neboaki ma te m'aaka n tautaeka n aki toki! Amen.

⁷Noria, E nangi nako mai Kristo ma naang; ao a na bane maata n noria, ao uake a ewaria a na noria naba; ao a na bane n tang aomata nako i aonnaba i bukin te baere e karaoaki nakoina.[2] Eng, Amen.

⁸E taku te Uea ae te Atua ae Moan te M'aka, ae iai ngkai, ao iai ngkoa, ao iai rimwi n aki toki, “Boni Ngai te Moa ao te Toki.”

⁹Ngai ae Ioane, ae tarimi, ae raomi n uaia n rawawata ma ni kaaina Ueani Kristo ma ni b'aina te nanom'aka ngkai ti reitaki ma Iesu, I mena i aon te abam'akoro ae Batemoti, i bukin ana taeka te Atua ao i bukin naba te koaua are E tataekinna Iesu[3]

¹⁰I mena i aani m'aakan ana kairiri te Tamnei are Raoiroi n ana bong te Uea, ao I ongo te b'ana ae korakora, mai akuu, ae kanga tangin te bu,

¹¹ae kaangai, “Ane ko noria ao ko na koroia n te boki, ao ko na kanakoa te boki anne nakoia ekaretia ake itiua n taabo aikai: Ebeto, Temurena, Barekamo, Tuateira, Tareteiti, Biraterebia, ao Raorikeia.”

¹²Ao I rairaki b'a N na tara te aomata are taetae nako iu, ao I noori itiai kain-tei n taura aika koora, ma taura i aoia n tatabeua nako;

¹³ao i nuuka i buakoni kain-tei n taura aikai iai temanna ae ai aron taraan natin te aomata ae kunnikaia n te kunnikai ae e toki m'arairaina i aon raurauni waena, ao e kabaeaki b'ab'ana n te b'ai ni kabaebae ae te koora.

¹⁴Ao moanibaan te mainaina atuna ma iran atuna; ao matana ai aron taraan uran te ai,

¹⁵ao waena ai aron taraan te buraati ae raneanea ae a tia ni kaburoaki ni kaitiakaki n te ai ae ura m'aaka; ao b'anaana ai aroni karongoani b'aron naao aika bati,

¹⁶ao e tau itoi aika itiua i nanoni baina are ataina, ao e oti nako mai wina te kabaang ae kakang ae uaitera wina; ao taraan ubuna ai aron taai ae korakora riringana.

¹⁷Ngke I noria ao I katorobubua ni bobaraaki i rarikini waena n ai aron te mate; ao E kaaki baina are ataina i aou, ao E kaangai, “Tai maaku! Boni Ngai te Moa ao te Toki.

¹⁸Teuare Maiu Ngai; I mate ngkoa, ao noria, I a manga uti n aki toki, ao bon iai irou kingin te mate ma kingin Eriti.

¹⁹Ma ngaia ae ko na koroi taekani baika ko noori, aika baika riki ngkai, ma baika na riki rimwi.

²⁰Ao aio te kaantaninga ae raba ae nanonaki n itoi ake itiua, ake ko noori i nanoni baiu ae ataiu, ma kain-tei n taura ake koora ake a tei ma taura i aoia n tatabeua nako: Itoi ake itiua bon aia anera ekaretia ake itiua; ao kain-tei n taura ma taura i aoia n tatabeua nako bon ekaretia ake itiua.