Read Te B'aib'ara Te Kaotioti 19 Bible Online

Te Kaotioti 19 - Te B'aib'ara bible

Te Kaotioti 19

¹I mwini baikai ao I ongo te bae kanga te b'anaa ae korakora ae b'anaaia kaain te botaki ae ab'ab'aki i karawa, ae kaangai, “Neboa te UEA! Ana b'ai Atuara te kamaiu, ma te neboaki, ma te m'aaka,

²b'a a koaua ana moti ao a eti. E a tia ni motika taekan te kabekaau are rangi n atoatongaki taekana, are te kabekaau are kam'araea te aba n ana wene ni bure; ao E a tia ni karekea kaina i bukina ngke e kamateia ana toro.”

³A a manga kaangai riki, “Neboa te UEA! E aetorake bubuni bueen neierei n aki totoki.”

⁴Ao a katorobubua ni bobaraaki unimm'aane ake uangauni ma aman ma baike a maiu ake aman, ao a taromauria te Atua are tekateka i aon te kaintokanuea, ao a kaangai, “Amen! Neboa te Atua!”

⁵Ao e nako te b'anaa man te kaintokanuea, ae kaangai, “Kam na karaoiroa Atuara, ngkami aika ana toro ni kabaneingkami, ma ngkami aika kam makua, aika kam mangori ma aika kam kakannato.”

⁶Ao I ongo te bae kanga b'anaaia kaain te botaki ae ab'ab'aki, ae kanga karongoani b'aron naao aika bati, ao kanga rebwerebweni baa aika korakora, ao a kaangai, Areruia! B'a E uea te Uea ae Atuara ae Moan te M'aaka.

⁷Ti na kim'areirei ma ni kakatonga, ao ti na neboia. B'a e a roko ana tai ni mare te Tiibuteteei, ao e a tia ni katauraoia neiere E na mareaki ma ngaia.

⁸E a tia n anganaki neierei kunnikaina ae te rinen ae e raoiroi ae raneanea ae itiaki b'a e na b'ainna. (Te rinen ae e raoiroi, bon aroia ake a itiaki ni kakaraoa nanon te Atua ni maiuia).

⁹ Ao e taku te anera nako iu, “Ko na korea ae kaangai, A a kab'aia akana kaoaki nakon ana am'arake ni mare te Tiibuteteei.” Ao e kaangai naba, “Taeka aikai bon taeka aika koaua aika ana taeka te Atua.”

¹⁰Ao I katorobubua ni bobaraaki i rarikini waena b'a N na taromauria. Ao e taku nako iu, “Tarataraiko b'a ko na aki taromauriai; bon raom n toro ngai, ao raoia naba n toro tarim ake a teimatoa n taua te koaua are E kaotiotia Iesu. Ko na taromauria te Atua n tii Ngaia; b'a te koaua are E kaotiotia Iesu boni ngaia ae angania ana aomata te Atua te kona n taetae ni burabeti.”

¹¹Ao I nora karawa b'a e uki; ao noria, te aoti ae mainaina! Ao aran teuare toka i aona boni Kakaonimaki ao Koaua; E aki ribuaka n ana moti, ao E aki naba ngkana E buaka.

¹²Ai aron uran te ai matana, ao a bati baunuea i aon atuna; ao iai te ara ae koreaki i aon rab'atana, ae akea temanna ae ataia b'a ti Ngaia.

¹³Ao E kunnikaiaki n te kunnikai ae kateboaki n te raraa; ao e atongaki arana b'a ana “Taeka te Atua”.

¹⁴Ao a iria n ri mwina taanga ni buaka ake i karawa i aoia aoti aika mainaina, ao a kunnikaiaki n te rinen ae e raoiroi ae mainaina ae itiaki.

¹⁵Ao e oti nako mai wina te kabaang ae kakang, b'a E na oreia botannaomata iai, ao E na tauu taekaia ni kairiia ma te matoa; ao E na toutoua aon nen taonani kureebe are ana b'ai korakoran unin te Atua are Moan te M'aaka.

¹⁶Ao iai arana ae koreaki i aon ana kunnikai ao i aon rangana, ae kaangai, “AIA KING KING AO AIA UEA UEA”.

¹⁷Ao I nora te anera temanna b'a e tei n taai; ao e taetae n te b'anaa ae korakora, ao e kaangai nakoia maan ni kabane aika kibakiba i aan-nang, “Kam na bane mai, ni botaki i bukin ana am'arake ae ab'ab'aki te Atua;

¹⁸b'a kam na kang irikoia ueea ma mataniwi n taanga ni buaka, ma tautia, ma irikoia aoti ma taan toka i aoia, ma aomata ni kabaneia, aika inaomata ma tooro, ma aika mangori ma aika kakannato.”

¹⁹Ao I nora te man are tiritiri, ma uea i aonnaba ma aia taanga ni buaka, b'a a ikotaki b'a a na buakana Teuare toka i aon te aoti, ma ana taanga ni buaka.

²⁰Ao e tauaki te man are tiritiri, ma te burabeti ni kewe are karaoi kanikina i matana, ake e m'am'anaia iai te koraki ake a kanikinaeaki n ana kanikina te man are tiritiri, ma te koraki naba ake a taromauria te bouananti are karaoaki b'a katotongana. E teweaki nako te man are tiritiri ma te burabeti ni kewe, ngke e maiu, i nanon te nama are te ai are ura n te burimton.

²¹Ao ake tabem'aang ake nikira a kamateaki n ana kabaang Teuare toka i aon te aoti, are te kabaang are oti nako mai wina; ao a bane ni ngae maan ake a am'arake n irikoia.