Read Te B'aib'ara Te Kaotioti 21 Bible Online

Te Kaotioti 21 - Te B'aib'ara bible

Te Kaotioti 21

¹Ao I nora karawa ae boou ma aonnaba ae boou; b'a e a tia ni mauna te moa ni karawa ma te moa n aonnaba, ao ai aron naba marawa.

²Ao I nora te kaawa are tabu, are Ierutarem ae boou, b'a e ruo mai karawa mairoun te Atua, ao e katauraoaki n ai aron te aine ae katamaroaaki i bukin teuare e na mare ma ngaia.

³Ao I ongo te b'ana man te kaintokanuea b'a e kaangai, “Noria, e mena ana um'anrianna te Atua irouia aomata! E na maeka i rouia, ao a na riki b'a ana botannaomata; ao te Atua E na memena i rouia.[38]

⁴E na kabane rannimataia te Atua ni kaoi mai mataia; ao akea te mate ae na riki, ao e na akea naba te nanokawaki, ma te tang, ma te maraki: b'a a mauna nako b'aai nikawai.”

⁵Ao E kaangai Teuare tekateka i aon te kaintokanuea, “Noria, I a karaoi b'aai ni kabane b'a b'aai aika boou. Ao E kaangai naba, Ko na koroi baika I a tia n taekin; b'a a koaua taeka aikai ao a onimakinaki.”

⁶Ao E taku nako iu, “A bane n tia. Boni Ngai te Moa ao te Toki; boni moani b'aai Ngai ao tokiia naba Ngai. N na angan ane kani moi nimana mani koburaken te ran, are te ran ni maiu, ae akea boona.

⁷Ane tokanikai ao e na b'aib'ai ni baikai;[39] ao N na riki b'a Atuana, ao ngaia e na riki b'a natiu.

⁸Ma te koraki akana kimamaaku, ma akana aki onimaki, ma akana riai ni bati n ribaki, ma taani kamateia aomata, ma taani wene ni bure, ma taan tabunea, ma taan taromauri bouananti, ma taani kewekewe, a na reke tib'angaia n te nama are e ura iai te ai ma te burimton, are te mate are te kauoua.”

⁹Ao e roko te anera temanna mai buakoia anera ake itiman, ake iai i rouia boora ake itiua, ake a on ni b'aai ni kamamate ake itiua; ao e taetae nako iu, ni kaangai, “Mai ikai, N na kaota te aine are nangi mareaki, are na riki b'a buun te Tiibuteteei.”

¹⁰Ao e kairai nakon te maunga ae ab'ab'aki ae rietaata, ngke I mena i aani m'aakan ana kairiri te Tamnei; ao e kaota te kaawa are tabu are Ierutarem nako iu ngke e tabe n ruo mai karawa mairoun te Atua, ao e raneanea n raneanean te oota are nako mairoun te Atua;

¹¹ao raneaneana ai aron raneanean te atibu ae rangi ni kakawaki; kaanga ai aron te atibu are te iatebi,[40] ae tara ni kiraati n ai aron te kirutitaro.[41]

¹²Ao iai nonona ae ab'ab'aki ae rietaata, ma mataroana aika tebwi ma uoua, ma anera aika tengauni ma uoman aika toa ni mataroa n tantani i rarikiia; ao a toa naba mataroa aikai ma tatabeua aara aika koreaki i aoia, aika araia baronga ake tengauni ma ua baronga ake tibun Iteraera.

¹³Tenua te mataroa n iteran te nono are mai mainiku, ao tenua n iterana are mai meaang, tenua mai maiaki, ao tenua mai maeao.

¹⁴E kateaki te nono aei i aon aana aika tebwi ma uoua, aika koreaki i aoia aara aika tebwi ma uoua aika araia taan tuatua ake tengauni ma uoman, ake ana tia tuatua te Tiibuteteei.

¹⁵Ao te anera are taetae ma ngai iai ana kai ni baire ae te koora, are e na bairea iai te kaawa, ma mataroana nako, ma nonona.

¹⁶E tikuea te kaawa, b'a ti te bo ab'akina ma rababana. E anaa ab'akin te kaawa ma rababana n ana kai ni baire, ao e anaa naba rietana: teuana tengaa ao nimabubua te maire ab'akina, ae ti te bo ma rababana ao rietana.

¹⁷E anaa naba bairen nonona, b'a tebubua ma abwi ma aua te m'anokunibai,[42] n te b'ai ni baire are kakabonganaki irouia aomata.

¹⁸E karaoaki nonona n te iatebi, ao te kaawa n te koora, ae ai aron te kiraati ae itiaki.

¹⁹A katamaroaaki aan nonon te kaawa arei n atibu nako aika kakawaki: moan aana n te iatebi, ao aana are te kauoua n te tabeiro,[43] ao are te katenua n te kareketona,[44] ao are te kaaua n te timaraketo;

²⁰e katamaroaaki are te kanimaua n te taretonuka,[45] ao are te kaonoua n te tarerio, ao are te kaitiua n te kerutorito;[46] are te kawanua n te beruro,[47] ao are te karuaiwa n te tobati;[48] are te katebwina n te kurutoberato,[49] ao are te katebwi ma teuana n te uakinto;[50] ao are te katebwi ma uoua n te ametuteto.[51]

²¹Ao mataroana ake tebwi ma uoua boni moomi aika tebwi ma uoua; a karaoaki n tatabeua nako mani moomi aika kaka ti teuana; ao kawain te kaawa bon te koora ae itiaki, ae kanga ai aron te kiraati ae itiaki.

²²Akea te Tembora teuana ae I noria n te kaawa; b'a te Tembora iai bon te Uea are te Atua are Moan te M'aaka, ma te Tiibuteteei.

²³E aki kainanoa taai ke nam'akaina te kaawa arei i bukin ootana; b'a ootana boni mimitongin te Atua, ao taurana bon te Tiibuteteei.

²⁴Ane a na nakonako botannaomata n ootana, ao ueea i aonnaba a na uoti kaub'aia nako nanona.

²⁵A na bon aki kainaki mataroana n te ngaina, b'a akea te bong ikekei.

²⁶Ao a na uoti kaub'aia aomata nako ma aia b'ai aika rangi ni kakawaki nako nanon te kaawa.

²⁷Ao e na bon aki kona n rin i nanona te b'ai ae kam'ara, ke ane e karaoa ae riai ni bati n ribaaki ma ni b'ab'aina te kewe; ma a na rin iai ti te koraki ake a tia ni m'akoro araia ni bokin te maiu are ana b'ai te Tiibuteteei.