Read Te B'aib'ara Ruuta 2 Bible Online

Ruuta 2 - Te B'aib'ara bible

Ruuta 2

¹Iai ana koraki are buun Naomi ae arana Boaati, ae te aomata ae kaub'ai ma ni kakannato.

²N te bong teuana, ao e taku Ruuta nakon Naomi, “N na nako n te tawaana ni b'aare ni karemrem nikiran ake a tia n rikoi taan tai. E na bon nanoangaai temanna ni kariaia b'a N na karemrem.” E taku Naomi, “Naako natiu.”

³Ma ngaia are, e a nakon te tawaana Ruuta ni karemrem iai i mwiia taan tai. Bon te kab'aia nakoina b'a ngaia e karemrem n ana tawaana Boaati are bon ana koraki Erimereka.

⁴I mwin te tai ae e aki maan, ao e a roko Boaati mai Betereem, ao e kamauria taani m'akuri ao e taku, “E na mena te UEA iroumi.” Ao ngaiia a kaeka ni kaangai, “E na kakab'aiako te UEA.”

⁵Ao e titiraki Boaati nakon ana toro are Mataniwiia taani m'akuri, “Antai neienne?”

⁶Ao e taku teuarei, “Bon te Iruwa, are e ira Naomi ngke e oki mai Moaaba.

⁷Ao e butiai b'a e na karemrem i mwiia taan tai. E m'akuri ma ngke e ingabong ni karokoa ngkai, ao e a tib'a motirawa ma ni katanna man te riringa.”

⁸Ao e taku Boaati nakon Ruuta, “N na tuangko arom; Tai karemrem n te tawaana riki teuana, ma ti ikai. Raonia ateiainen te tawaana aei;

⁹taraia n te tabo ike a tai iai ao raonia. I a tia n tuangiia rorobuaka b'a a na aki tabareiko. Ao ngkana ko kan mooi, ao ko na karekea nimam man taian b'aketi aika a tia ni kanoaki aikai.”

¹⁰Ao e bobaraaki Ruuta ni kabo matana ma aontano, ao e taku nakon Boaati, “Bukin tera ngkai ko nanoangaai? Bukin tera ngkai ko akoa te ianena?”

¹¹E taku Boaati, “B'a I kaongoaki irouia aomata b'aai ni kabane ake ko a tia ni karaoi nakon tinan buum, man te tai are e mate iai buum: arom ngke ko kitana tamam, tinam, oin abam, ma n roko ni maeka i buakoia te botannaomata ae ko aki ataia ma ngkoa.

¹²Ke E anganiko boom ae kororaoi te UEA, ae Atuaia Iteraera, i bukin am m'akuri ae ko a tia ni karaoi, b'a ko a roko i nanon ana Kakaawakin.”

¹³E kaeka Ruuta ni kaangai, “Teuae Ko karineaki irou, ko rangi n akoai, ao ko kabebetea nanou n am taeka aika a raraoi, e ngae ngke I aki boraoi ma am tia m'akuri te aine temanna.”

¹⁴Ngke e a bo tain te am'arake, ao e taku Boaati nakon Ruuta, “Nakomai katoonga te kariki, ao kateboa kanam n te beneka. Ma ngaia are, e a nako n tekateka Ruuta i rarikiia taan tai, ao Boaati e anganna naba uaanikai aika a uarereke aika a tinimaki. Ao e am'arake Ruuta ni karokoa e boni ngae raoi, ao e aki bane kanana.

¹⁵Ao ngke e a teirake ni karemrem neierei, ao e tuangiia ana taan tai Boaati ni kaangai, “Ke e karemrem i buakon b'ab'ati ni b'aare, ao tai tukia, kam na buuti naba tabeua b'ab'ati ni b'aare b'a e na rikorikoi ana b'ai.”

¹⁷Ao e karemrem Ruuta n te tawaana ni kabongnga, ao ngke e a tia n oroi ni kanakoi kuniia, ao e kaania tebwina te kirokuraem rawawatana.

¹⁸Ao e uota ana b'aare nakon te kaawa, ao e noora m'aitin are e a tia ni karemm'a neiere tinan buuna. Ao e anganna naba nikiran kanana.

¹⁹Ao e taku Naomi nakoina, “Ko karemrem ia n te bong aei? Ao antai ana tawaana ae ko m'akuri iai? Ke e kakab'aiaki iroun te UEA te aomata are e a tia ni m'annanoiko.” Ma ngaia are, Ruuta e tuanga Naomi b'a e m'akuri n ana tawaana Boaati.

²⁰E taku Naomi, “Ke e kakab'aiaki Boaati iroun te UEA, b'a E bon ataataiaomata te UEA nakoia aika a maiu, ao nakoia naba aika a tia ni mate.” E taku riki Naomi nakon Ruuta, “Bon ara koraki ni kaan te aomata anne, temanna ngaia ae e riai ni kawakiniira.”

²¹Ao e taku Ruuta, “Ao i rarikin anne, ao e tuangai naba b'a N na karemrem i rarikiia ana taan tai ni karokoa tokin te tai n tai.”

²²E taku Naomi nakon Ruuta, “Eng, natiu, e riai b'a ko na karemrem i rarikiia ateiainen ana tawaana Boaati, b'a rimwi ao ko na tabareaki ngkana ko nako n tawaana tabeua.”

²³Ma ngaia are, e teimatoa Ruuta ni karemrem i rarikiia ana ateiaine Boaati ni karokoa tokin tain te b'aare ma te uita, ao e teimatoa Ruuta ni mamaeka iroun Naomi.