Read Te B'aib'ara Ruuta 3 Bible Online

Ruuta 3 - Te B'aib'ara bible

Ruuta 3

¹I mwin te tai ae aki maan, ao e taku Naomi nakon Ruuta, “Natiu N na karekea buum b'a ko aonga n tekateka raoi.

²Ko uringnga b'a bon ara koraki ni kaan teuare Boaati are ko m'am'akuri ngkoa ma ana ateiaine. Noria, ane e nang kaaki kun ni b'aare nakon te tairiki aei.

³Ma ngaia are, tebokiko, ao kabiriko, ao karina kunnikaim ae tamaroa, ao nako nakon te tabo are e kaaki kuuni b'aare iai, ma ko na aki kaotiko nakoina ni karokoa tiana n am'arake ma ni mooi.

⁴Ko na tara te tabo are e na wene iai, ao ngkana e a matunako, ao ko na karaurau ni ieta rabunana mani wene i bukin waena. Ane e na tuangko arom ae ko na karaoia.”

⁵Ao e kaeka Ruuta, “N na toui mwin am taeka ni kabane.”

⁶Ma ngaia are, e a nako Ruuta nakon te nne ni kaaki kun ni b'aare, ao e toui mwin ana taeka tinani buuna ni kabane.

⁷Ngke e a tia n am'arake ma ni mooi Boaati, ao e kukurei nanona, E nako ni wene i aon te b'ariko ni b'aare. Ao e karaurau n roko Ruuta, ao e ieta rabunan bukin waen Boaati, ao e wene i bukin waena.

⁸Ngke e a nukanibong ao e a kuba n uti man rairaki, ao e mimi ngke e a nora te ateiaine i bukin waena.

⁹E taku Teuarei nakoina, “Antai ngkoe?” E kaeka Ruuta, “Bon Ruuta ngai ae am toro; ngkai bon te koraki ni kaan ngkoe, ao ko bon riai ni kaawakinai. Ma ngaia are, I butiiko b'a ko na kawakinai.”

¹⁰Ao e taku teuarei, “E na kakab'aiako te Atua, b'a ko kaota te ataataiaomata ae e m'aiti riki ni baika ko karaoi ngkai nakon are rimoa, nakon tinan buum. Ko na riai n tia ni kakaea te rorobuaka n ataei, tao te kaub'ai, ke tao te aki kaub'ai, ma ko aki karaoa anne.

¹¹Ko na tai raraoma Ruuta, N na karaoi b'aai ni kabane akana ko tuangai, b'a a bane kaain te kaawa n ataiko b'a te aine ngkoe ae e raoiroi aroarom.

¹²E boni koaua b'a te koraki ni kaan ngai nakoni buum are mate, ao I riai ni kaawakiniko, ma bon iai riki te koraki ae kaan riki nako iu.

¹³Ko na tiku ikai ni kangainaa, ao ti na noria ningabong b'a ngkana e kani kawakiniko, ao e rangi n raoiroi, ma ngkana e aki, ao I tuea i matan te UEA b'a N na kawakiniko, wene ni kangainaa ikai.”

¹⁴Ao e wene neirei i bukin waena ni karokoa te karangaina, ao e teirake ngke e aaiota, b'a e aki tangiria Boaati b'a e na ataaki rokon neierei i rouna.

¹⁵E taku Boaati nakoina, “Taakina niniram ikai,.” Ao e karaoa arei neierei, ao e kanoa te ninira arei Boaati n te b'aare ae kaania uabwi te kirokuraem rawawatana, ao e buokia ni katokaa i aon angana. Ao e okira te kaawa ma uotana.

¹⁶Ao e roko ni mwengana, ao e titirakinna tinan buuna ao e taku, “E uara natiu?” Ao Ruuta, e tuanga b'aai ni kabane ake e karaoi Boaati nakoina, ma ana taeka naba ngke e kaangai,

¹⁷“Ko na aki riai n oki n akea uotam.” Ma ngaia are, e a karekei taian b'aare aikai.

¹⁸Ao e taku Naomi nakoina; “Ko na karauko, tataningaa mwin te baerei: b'a ane e na aki rau Boaati ni karokoa katiaan te baerei n te bong naba aei.”