Read Te B'aib'ara 1.Tamuera 14 Bible Online

1.Tamuera 14 - Te B'aib'ara bible

1.Tamuera 14

¹N te bong teuana ao e taetae Ionatan nakon te teinim'aane are uouota ana b'ai ni buaka, “Ti na nako n aia kaemb'a I-Biritia.” Ma e bon aki tuanga tamana Ionatan are Tauro,

²are kaemb'a i aan te kai ae te bomkuranete i Mikeron, ae aki bati n raroa mai Kibea; ao iai ana taanga ni buaka aika 600 i rarikina.

³Te ibonga are uouota te ebota bon teuare Aiia, bon natin tarin Ikabota are Aituba, are natin Bineati ao tibun Eri, ana ibonga te UEA i Tiro. A aki roko n te ataa m'aane akekei ae e a tia n nako Ionatan.

⁴E iangoia Ionatan b'a e na karoko n aia kaemb'a kaain Biritia n rarikin Mikemati, ma iai uoua b'a aika rietaata aika mena i rarikina ae ataaki n araia b'a Boteta ao are teuana Tene.

⁵Are teuana e mena i meangina ni kaitaraa Mikemati, ao are teuana i maiakina, ni kaitaraa Keeb'a.

⁶Ao a tabe n taetae ni kawai Ionatan ma ana tautia ngke a m'ananga nakon aia kaemb'a kaain Biritia ao a taku, “Bon ti ngaira uoman ni kaaitaraia m'aane aika akea atuaia aikai,” Ao e taku Ionatan, “Ma E kona te UEA ni buokiia tautia aika ti tabeman n tokanikai n te buaka n aron naba ae bon akea kangaangan buokaia te taanga ni buaka ae b'anin i Rouna. E na mena ngkoa ao e na buokiira te UEA n te buaka aei.”

⁷Ao e taku te tautia arei, “Karaoi b'aai ni kabane akana ko kan karaoi. N na bon raoniko nako ikekei.”

⁸Ao e taku Ionatan, “Ao aio te b'ai ae ti na karaoia. Ti na nakoia b'a aonga n norira.

⁹Ao ngkana a ruorikaaki ni buakaniira n te tabo are ti mena iai, ao ti na aki tam'arake nakon te tabo are e mena iai aia kaemb'a.

¹⁰Ma ti na tam'arakea te tabuki ni buakaniia ngkana a tuangiira. B'a nanon anne, E buokiira te UEA ni katokanikaira i aoia.

¹¹Ao a tei i oin te tabuki Ionatan ma ana tautia n te tabo ike a nooraki raoi iai i rouia kaain Biritia. Ao a taku kaain Biritia, “Ao bon nooriia Iteraera aika bon te akea uaaia b'a a tia n otinako man te b'angab'anga ike a karabaia iai.”

¹²Ao i mwiina, a takaarua nakon Ionatan ma ana tautia ni kaangai, “Tam'arake ikai, b'a iai te b'ai ae ti na tuangngkami!”

¹³Ao e tam'arakea iteran te tabuki are teuana Ionatan ao a ri mwiina a na tautia. Ao ngke a roko i taubukina, ao e tiringiia kaain Biritia Ionatan ake a buaka mai moa, ao tautia a tiringiia ake a buaka mai buki.[74]

¹⁴Ao i m'aain are a roko n tebubua te buuti,[75] ao a tia n tiringiia uangaun kaain Biritia.

¹⁵Ao a bane kaain ana taanga ni buaka Biritia n tiaoki--n reitaki ma ake n te maeka, ma ake uatei, ma ake n taiani katawanang, ao ake taan kurib'ai. A bane ni maaku ma n aki reke aia iango. Ao E kanakoa te m'aeiei te Atua, ao e ruru aontano.[76]

¹⁶Ao ana taan taratara Tauro ake a mena i Keeb'a [77] a nooria b'a a birinako ana taanga Biritia ni uamaaenako, kaanga ai aron te taura te nenea ae ran nako.

¹⁷Ao e taku Tauro nakoia ana aobitia, “Warekia tautia ni kakaea b'a antai aika kiitana te maeka.” Ao ngke a bane warekakiia tautia, ao a kunea b'a akea Ionatan ma te tautia are uouota ana b'ainibuaka.

¹⁸Ao n te tai anne, e ibonga iai Aiia irouia ana taanga ni buaka Iteraera, ao e taku Tauro nako ia, “Nakomai ikai, ti na titirakina te Atua b'a tera ae ti na karaoia.” [78]

¹⁹Ao ngke e bane ana taetae Tauro, ao e nooria b'a e tabe n rikirake ni mangaongao kaain Biritia, ao e taku, “Tai tabe iai Aiia!”

²⁰Ao e kawaekoa ni bootia ana taanga ni buaka, ao i mwiina e kairiia nakon aia kaemb'a kaain Biritia. Ao n te tai aei, a rangi ni mangaongao kaain Biritia ao a bon tiringiia i bon irouia.

²¹Ao iai naba tautia ake a tangoaki [79] n aia taanga ni buaka kaain Biritia, are a manga raoniia Iteraera ma ni buaka i bukin Tauro ao Ionatan.

²²Ao angiia Iteraera a tia ni karabaia n aaba ake a tabukibuki i Eberaim. Ao ngke a ongo b'a a birinako kaain Biritia, ao a otinako man te tabo are a karabaia iai, ao a manga buoka kakioakiia kaain Biritia.

²³Ma ngaia are, E buoka Iteraera te Atua ni katokanikaia n te bong arei. E a tia n tuangiia mai m'aaina ana tautia Tauro ni kaangai, “N na kabooa mwiin aia m'akuri kaain Biritia i m'ain bungin taai, ma ngaia are, akea ae na am'arake i m'aain bungintaai. Ao ane am'arake i m'aain bungintaai ao e na maraia!” Ma ngaia are, e tuangiia b'a a na berita ke n tuea b'a a na aki am'arake. Ao n te tai anne, e a tia n ri rarikin te kaawa are Beta-Awen te buaka,[80] ao a rootaki n te baki ae korakora ana taanga ni buaka Iteraera.

²⁴

²⁵Ao a tia n nakon te buakonikai te taanga ni buaka ma aomata ake a maeka i rarikiia,

²⁶ao a roko n te tabo ike a timtim iai i aontano ana karewe te manibeeru.[81] Ma bon akea ae kanna, b'a a maaka maraiaia.

²⁷Ao Ionatan e aki ataa ana kamaraia Tauro nakoia ana tautia. Ma ngaia are, e kotea ana karewe te manibeeru n tabon okona ao e anaia ni baina ni kanna. Ao e a manga rin korakorana ma angin nanona nakon te buaka.

²⁸Ao e taku te tautia nako ina, “E taku tamam b'a e na maraia ane am'arake n te bong aei, ao ti bane ni kariaia anne. Ao bon anne bukina ngkai akea angin nanora.”

²⁹Ao e taku Ionatan, “E rangi ni kabatiai ami kangaanga tamau. Noorai ngkai! I ti anaa teutana ana karewe te manibeeru ao e rin korakorau ma angin nanou.

³⁰Tera ngke kam a tia ni kana te am'arake are a kiitanna kaain Biritia. B'a kam aonga ni kona n tiringiia riki aika m'aiti.”

³¹Ao ngke a bong, ao a rangi ni kua Iteraera n tiringiia kaain Biritia i aon te kawai mai Mikemati ni karokoa Aiiaron.[82]

³²Ao a anai am'arake ake a anai mairouia kaain Biritia ao a am'arake. Ao a bon tiringi naba taian tiibu ao kaao ao taiani bunnikao i aon te tano ma ni kang ao a aki katinakoa moa raraaia i aon te tano. [83]

³³Ao e tuangaki Tauro iroun temanna ni kaangai, “Nooria! A tia n aki ongotaeka te taanga ni buaka nakon te UEA ni kana te iriko ni man i m'aain katiinakoan te raraa.”

³⁴Ao tuangiia aomata ni kabane akana n te maeka b'a a na uoti aia kao ma aia tiibu teteei nako iu. A kona n tiringi aia man i aon te b'a aei, [84] ma ni kana te iriko ni man. Ao a na akea iai ae na manga aki ongotaeka nakon te UEA ni kana te iriko ni man ae iai te raraa i nanona.” Ao a uoti aia kao tautia n te tairiki anne ao a tiringi ikekei i aon te b'a are buubura arei.

³⁵Bon te moan baonikarea are kateia Tauro i bukin te anga karea nakon te UEA.[85]

³⁶Ao e taku Tauro, “Ti na buakaniia riki kaain Biritia ngkana e a roo. Ti kona ni buakaniia n te bong. Ti na anai aia b'ai ni kabane ake i rouia!” Ao a taku aomata, “Ti na karaoi b'aai ni kabane akana ko tangiria.” Ao e taku Aiia are te ibonga, “Tataninga. Ti na titirakina moa te UEA b'a tera ae ti na karaoia.”

³⁷Ao Tauro, e titirakina te UEA ni kaangai, “Ti na buakaniia kaain Biritia? Ko na buokiira ni katokanikaira?” Ma E a aki kaekaia te Atua n te tai aei.

³⁸Ao e weteia ana aobitia Tauro ni bootia ao e taku, “Ti riai ni kakaea b'a tera te bure ae aki kaekaira iai te Atua.

³⁹I berita i matan te UEA ae maiu b'a ane karaoa te bure, e na tiringaki, e aoria naba ngkana bon natiu are Ionatan.” Ao akea ae kakarongoa.

⁴⁰Ao e tuangiia ana taanga ni buaka Tauro ni kaangai, “Kam na tei n iteran te ibonga are teuana, ao ngai ma Ionatan, ti na tei n te itera are teuana.” Ao a bane ni kariaia aomata.

⁴¹Ao e tataro Tauro ni kaangai, Ara UEA ae Atuan Iteraera, e aera ngkai Ko aki kaekaai n te bong aei? Taiaoka ma kaotia nako ira b'a antai ae bure. Natiu ae Ionatan ma ngai, ke Am aomata aika Iteraera?” [86] Ao e oki te kaeka b'a Ionatan ma Tauro aika a tia ni bure.

⁴²Ao e tuanga Aiia Tauro ni kaangai, “Ko na titirakina te UEA ngkai b'a E na kakaea i marenau ma Ionatan.” Ao e oki te kaeka b'a Ionatan ae e a tia ni karaoa te bure.

⁴³Ao e taku Tauro, “Ionatan, tuangai b'a tera ae ko a tia ni karaoia!” “I a tia ni kotea ana karewe te manibeeru n okou ao I kanna teutana. Ko na taetae ngkai b'a n na mate!”

⁴⁴“Eng Ionatan, I tuea nakon te Atua b'a ko riai ni mate.”

⁴⁵Ao a takaarua tautia ni kaangai, “E na aki mate. E a tia te Atua ni buoka Ionatan n tokanikai n te buaka i bukira. Ti bon aki kukurei b'a ko na tiringnga. Ti tuea nakon te Atua b'a ti aki kariaia b'a ko na tiringnga ke ni katoka baim i aona!” Ma ngaia are, a kaawakina Ionatan te taanga n tautia b'a e na aki tiringaki iroun Tauro.

⁴⁶Ao e toki kaaeakiia kaain Biritia iroun Tauro, ao e okira ana auti.

⁴⁷Ao ngke e a uea Tauro i aoia Iteraera, ao kaain Moaba, kaain Ammon, kaain Etom, taian uea mai Tob'a, kaain Biritia, ao kaain Amareka, a tia ni kabane n iraeia Iteraera.

⁴⁸Ao Tauro, e a buakaniia ana kairiribai ma n katokiia man iraeakiia Iteraera. Bon mataniwiin te bootaki n tautia ae ninikoria ao e aki toki n totokanikai n ana buaka nako. [87]

⁴⁹Buun Tauro bon Nei Ainoam, are natin Aimaati. Bon iai natiia m'aane aika teniman: Ionatan, Itiwi, [88] ao Marekitua.

⁵⁰Ao bon iai naba natiia aine aika uoman: Te karimoa bon Nei Meraba, ao te bina bon Nei Mikara.

⁵¹Ao Abenera are natin tarin taman Tauro boni ngaia te mataniwi n te taanga ni buaka. Taman Tauro are Kiti ma taman Abenera are Nera bon natin Abiera.

⁵²Ao e bane angiin bongin maiun Tauro ni bubuaka ma kaain Biritia. Ngkana e kunea te tia buaka ae korakora ke te m'aane ae ninikoria Tauro, ao e anaia b'a kaain ana taanga ni buaka.