Read Te B'aib'ara 1.Tamuera 16 Bible Online

1.Tamuera 16 - Te B'aib'ara bible

1.Tamuera 16

¹Ao E taku n te bong teuana, “Tamuera, I a tia n ribaa Tauro, ao I aki tangiria b'a e na riki b'a te uea. Ko na aki nanoangaia. Uota b'aan te oriwa teutana [97] n te kaonteina ae uarereke [98] ao naako kawara te aomata ae arana Iete, ae maeka i Betereem. I a tia n rinea natina te m'aane temanna b'a e na uea.”

²Ao e taku Tamuera, “Ngkana I karaoa anne, ao e na ataia Tauro ao e na tiringai.” Ao e taku te UEA, “Uota te kao teteei, ao tuangiia aomata nako b'a ko roko b'a ko na anga karea nako Iu,

³ao e kaooa Iete nakon te angakarea.[99] Ngkana I tia n tuangko b'a antai natina te m'aane ae I rineia, ao ko a kab'aroa naba i aon atuuna b'aan te oriwa.”

⁴Ao Tamuera, e karaoa te b'ai are tuangnga te UEA ao e nako Betereem. Ao a nako taani kairiiri man te kaawa ni kaitibo ma ngaia, ma a rangi ni maaku ao a titiraki ni kaangai, “Tera rokom aei, te roko n raoi ke tiaki?”

⁵Ao e taku Tamuera, “Eng, boni ngaia. I roko b'a n na angakarea nakon te UEA. Katauraoingkami [100] b'a kam na ira te angakarea ma n airi ma ngai.” Ao e kaooa naba Iete Tamuera ma natina m'aane b'a a na ira te angakarea, ao e tuangiia, ao e kairiia b'a a na ira te angakarea.

⁶Ao ngke a roko Iete ma natina m'aane, ao Tamuera, e noora natin Iete te ikawai, are Eriaba, ao e taku bon i nanona, “Tao bon aei ae na rineia te UEA.”

⁷Ma E taku te UEA nako ina, “Tamuera, ko na tai taku b'a ngaia ae na rineaki i bukina ngke a ab'ab'aki ao e botonim'aane. Bon tiaki ngaia ae rineaki. A karaoa aia rinerine aomata man tarakiia, ma I karaoa Au rinerine ma taraan nanoia.”

⁸Ao Iete, e tuanga natina te m'aane are Abinataba b'a e na nakon Tamuera, ma e taku Tamuera, “Tiaki ngaia. E aki rineaki iroun te UEA.”

⁹Ao i mwiina, e a manga kanakoa natina Iete are Tiamma, ma e taku Tamuera, “E aki rineaki naba iroun te UEA.”

¹⁰Ao e kanakoia natina Iete ake itiman nakon Tamuera. Ma n tokina, ao e taku Tamuera, “Iete, akea ae rineia te UEA mai buakoia rorobuaka n ataei.

¹¹Iai riki natim te m'aane?” Ao e taku Iete, “Eng, bon iai riki. Bon natiu are te bina are Tawita are nako n kaawakiniia tiibu.” Ao e taku Tamuera, “Weteia! Ti aki kona ni waakina te bootaki ni karokoa rokona.”

¹²Ao kananako wetean Tawita Iete. Bon te ataei ni m'aane ngaia ae marurung rab'atana, e botonim'aane ma matana aika mata tokatoka. Ao n te tai are roko iai Tawita, ao e taku Tamuera, “Boni ngaia aei! Teirake, ao atoa b'aan te oriwa i aon atuuna.” [101]

¹³Ao e atoa te b'a Tamuera i aon atuun Tawita ngke a bon tabe ni mataku tarina nako. Ao n te tai anne, E niniia Tawita Tamnein te UEA ao E moana tikuna i rouna man te tai anne. Ao e oki Tamuera nakon ana auti i Ram'a.

¹⁴E a tia Tamnein te UEA ni kiitana Tauro, ao e nako te tamnei ae buakaka mairoun te UEA ni kakamaakua.

¹⁵Ao a taku ana aobitia Tauro nako ina, “Bon te tamnei ae buakaka mairoun te UEA ae kakamaakuko.

¹⁶Te uea ae ko karineaki, kanakoira b'a ti na kakaaea ae rabakau ni katanga te aabi. E na katangitang nako im ngkana e roko te tamnei are buakaka mairoun te UEA, ao ko na riki ni marurung iai.”

¹⁷Ao e taku Tauro, “E tamaroa, kakaaea te aomata ae kona ni katanga te aabi ao kanakomaia nako iu.”

¹⁸Ao e taku temanna ana aobitia, “Iai temanna natin Iete te m'aane are maeka i Betereem ae rabakau ni katangitang. Bon te tia buaka ae ninikoria, te ataeinim'aane ae botonim'aane, e kona n taetae raoi, ao e mena te UEA i rouna.”

¹⁹Ao e kanakoa te rongorongo Tauro nakon Iete ae kaangai, “Tuanga natim te rorobuaka are Tawita b'a e na kiitan moa am tiibu ma n nakomai nako iu.”

²⁰Ao e katokaa te kariki ma te baeki ae on n te wain [102] i aon te aati, ao i mwiina, e tuanga Tawita b'a e n a kaira te aati ma te kooti ae uarereke nakon Tauro.

²¹Ao e m'ananga Tawita nakon Tauro ao e a moana m'akurina i rouna. Ao e rangi n tangiria Tauro, ma ngaia are, e karikia b'a te tia uouoti taiani b'ai ni buaka.

²²E aki rangi ni maan i mwiin aei, ao e a manga kanakoa riki te rongorongo Tauro nakon Iete ae kaangai, “I rangi n tangira Tawita, ma ngaia ae I butiiko b'a ko na kariaia tikuna i rarikiu.”

²³Ngkana e kaminoa ana iango Tauro te tamnei ae buakaka mairoun te UEA, ao e katanga ana aabi Tawita. Ao e rau nanon iai Tauro ma ni marurung iai, ao e nako te tamnei ae buakaka mai rouna.