Read Te B'aib'ara 1.Tamuera 2 Bible Online

1.Tamuera 2 - Te B'aib'ara bible

1.Tamuera 2

¹Ao e tataro Nei Anna: Ko kakorakoraai ma ni kakukureiai, te UEA Ko kamaiuai. Ao ngkai I kim'areirei ao I ngareakiniia au kairiribai.

²Bon akea riki te atua [11] n ai arom. Ao mai rouna ti a kamaiuaki nakon aon te maunga. [12]

³I kona n tuangiia aomata aika kamoamoa ni kaangai, “Katoka ami kamoamoa! Bon akea te b'ai teuana ae raba mairoun te UEA, ao e baairei baika ti karaoi.”

⁴Ara UEA, ko otouai aia kainikatebe taani buaka, ma Ko anga te korakora nakoia aika tatatata.

⁵Aomata ngkoa ake a m'aiti kanaia a nang kabooi nako ngkai rab'ataia ti i bukin te m'akoro ni kariki. Ma Ko anganiia aika akea kanaia te am'arake ae moan te bati. Te aine ae akea natina, Ko anganna itiman natina, ma te aine ae m'aiti natina e tiku ma akea natina.

⁶Ko anaa te maiu, ao ko anga te maiu. Ko kab'akaia aomata nako abaia maate ao Ko a manga kaokiia.

⁷Ara UEA boni Ngkoe ae Ko karikiira b'a kaub'ai ke taiani kainano. Ko kamenakiia tabeman ni m'akuri aika rietaata ao Ko kab'akaia tekorakina.

⁸Ko tabekiarake aomata aika kainano ao aika akea mwengaia Ko anaia mai buakon turam ni maange ao Ko anganiia te nne ae karineaki i nanon taiani bareti. Ko katea te aonnaba i aon taian aana, ao bon am b'ai.

⁹Ko kaawakiniia am aomata aika kakaonimaki ma ni kabane aika buakaka a na mate i nanon te rotongitong. Ti aki kona n tokanikai ni bon oin korakorara.

¹⁰Ara UEA, a na maaerikiriki aomata aika buakaniko ngkana Ko buakaniia ma rebwen te baa mai karawa. Ko na motika taekan te aonnaba ae b'anin ao Ko na anga te m'aaka ma te korakora nakon am uea ae rineaki.

¹¹Ao a okirikaaki Erekana ma Nei Anna nakoni mwengaia i Ram'a, ao e a tiku te ataeinim'aane are Tamuera ni buoka Eri ni m'akuri i bukin te UEA.

¹²Bon taian ibonga natin Eri ake m'aane, ma a aki ongotaeka, ao aki kakaonimaki nakon te UEA.

¹³Ma ngaia are, ngke a tabe ni kaburoi irikon aia karea, ao a kanakoa aia tia m'akuri temanna ma ana waiteke ae tennai wiina.

¹⁴Ao te tia m'akuri arei, e kateboa ana waiteke arei i nanon te b'aata, ao e uota rikaaki te iriko are reke n ana waiteke nakoia ibonga. Ao ai anne aroia ibonga aika uoman aikai nakoia Iteraera ni kabane ake a roko n anga aia karea i Tiro.

¹⁵Ao n taai tabetai ngkana a anga karea aomata, ao e roko te tia m'akuri, e ngae naba ngkana e tuai korokoreaki te karea ao e tuai naba anga te aba te karea nakon te UEA. [13]

¹⁶Ao a tataneiai aomata ni kaangai, “Anaa ane ko bon tangiria. Ma ti na anga moa te nenea nakon te UEA.” Ma e taku te tia m'akuri, “Kam na aki anga moa. Ngkana kam aki anganai ngkai ao n na anaia ma te matoa.”

¹⁷A aki tabe natin Eri ake m'aane ma aia karea aomata ake a anga. Ao bon te bure ae rangi ni buakaka te baei, ao e bon kauna te UEA.

¹⁸Ao e m'akuri Tamuera i bukin te UEA ao e karina i aona te kunnikai te rinen ae kaokoro[14]

¹⁹ao taiani kunnikai [15] are e a tia ni karaoia tinana. E katoa ririki neierei n uouoti taiani kunnikai, ngkana e roko ma buuna n anga aia karea i Tiro.

²⁰E aki toki Eri ni kakab'aia Erekana ma buuna ni kaangai, “E bungiaki Tamuera b'a kabooan ami tataro. Ngkai kam a tia n anga ngaia nakon te UEA. I tataro b'a E na kakab'aiaingkami te UEA ma n anganingkami riki natimi aika m'aiti ni kabooa mwiin natimi aei.” Ao ngke e a tia Eri ni kakab'aiaia, ao a oki rikaaki Erekana ma Nei Anna nakoni mwengaia.

²¹Ao te UEA E akoa Nei Anna, ao a manga reke riki natina teniman m'aane, ao uoman aine. Ma e rikirake n ikawai rake Tamuera n Ana auti te UEA i Tiro.

²²Ao e a rangi ni kara Eri n te tai aei, ao e teimatoa n ongongo taekaia natina n te b'ai ae a kakaraoia nakoia Iteraera. [16]

²³Ao e titirakiniia ni kaangai, “E aera ngkai kam karaoi baika a rangi ni buakaka aikai?

²⁴Bon akea te b'ai ae I ongongo ma ti taekan ngureakinakimi irouia ana aomata te UEA.

²⁵Ngkana kam kaikoaka te aomata temanna, ao E kona te Atua ni manga kaeti b'aai i marenami ni kauoman. Ma ngkana kam karaoa te bure nakon te UEA, ao bon akea ae kona ni buokingkami!” Ma te UEA e a kaman iangoi tiringakiia. Ngaiare e kamatoai nanoia n aki kan ongo b'anaan tamaia.

²⁶Ao e tabe n rikirake tangirakin Tamuera iroun te UEA ao ana aomata te UEA.

²⁷Ao e roko te burabeti temanna nakon Eri ao e anganna te rongorongo mairoun te UEA: Ngke a tautoronaki ngkoa ami bakatibu iroun uean Aikubita, ao I roko ni kawariia ma ni kaotai nakoia b'a antai Ngai.

²⁸I rineia ami utu b'a Au ibonga mai buakoia barongan Iteraera. I tangiria b'a a na anga karea ma ni kabuoki taiani b'ai ni kaboiarara nako Iu ma ni kakaaea b'a tera ae I tangiria b'a a na karaoia Au aomata.

²⁹I tuangiia aomata ni kabane b'a a na uoti aia karea nako ikai n te tabo ae I maeka iai, ao I kariaingkami ma ami utu b'a kam na kaawakin b'aai ake a aki anga te aba nako Iu i aon te baonikarea. Ma kam karineia riki natimi m'aane nako Iu! Ma kam aki karineai[17] taiani karea ma angab'ai ake uotaki nako Iu, ao kam a rangi ni marikarika i bukin kanakin m'akoron taiani karea ake a rangi n raraoi.

³⁰Bon te UEA Ngai ae Atuaia Iteraera. I berita b'a n na teimatoa ni kariaia ami utu b'a a na m'akuri b'a ibonga, ma I tuangkami ngkai b'a bon akea riki te b'ai teuana ae I kona ni manga karaoia! I karineia aomata aika a karineai, ma I kamaraiaia akana a ribaai.

³¹E na roko te tai are N na tiringingkami iai ma kaain ami utu ni kabane. Bon akea temanna maibuakomi ae na maiu ni karokoa karana.

³²E na m'aiti aia kangaanga ami utu [18] N na akoia Iteraera,[19] ma a na bane ni mate kaain ami utu i nanon ataeia.

³³Ngkana I karika temanna man ami utu b'a te ibonga, ao e [20] na onrake maiuna n te nanokawaki ma te rawawata. Ma a na mate angiia m'aanen ami utu n te mate ae kakamaaku! [21]

³⁴Ni kakoauaan aei b'a N na bon karaoi baikai; ao natim m'aane, ake Obeni ao Bineati, ana tii teboo mateia n te bong teuana.

³⁵I a tia n rinea te aomata temanna b'a Au ibonga, ae te aomata ae na kakaonimaki ma n ongotaeka i Rou. N na karikiia ana utu b'a taiani ibonga ao a na buoka au uea ae rineaki.

³⁶Ma ngkana iai ae tiku mai buakoia ami utu, ao e na roko ni kawara au ibonga ma ni bubutiia te m'ane ke te m'akoro ni kariki teutana. E na kona naba ni kaangai nakon au ibonga, “I butiiko b'a ko na karikai b'a te ibonga temanna, b'a e aonga n reke naba kanau teutana.”