Read Te B'aib'ara 1.Tamuera 25 Bible Online

1.Tamuera 25 - Te B'aib'ara bible

1.Tamuera 25

¹Ao e mate Tamuera ao a bane n roko Iteraera n tanginiwenei i bukina. Ao i mwiina, a taunna ni mwengana i Ram'a. [119] Ao i mwiin aei, e a nako Tawita nako rereuan B'aran.

²Iai temanna te rorobuaka ae kaain te kaainga are Kareb'a ae arana Nab'ara, ae kaain te kaawa are Maon, ao iai abana i rarikin te kaawa are Karemera.

³E bon rangi ni kaub'ai, b'a iai ana tiibu ae 3,000 ao 1,000 ana kooti. E rangi ni baraaoi buuna are Nei Abikaira ao e wanawana, ma bon te aomata ae e buretireti, ao e kakaiun. E tabe ni koroburaei ana tiibu Nab'ara i Karemera, [120]

⁴ao e mena Tawita n te rereua, ngke e ongo te rongorongo arei,

⁵ma ngaia are, e kanakoia tengaun ana rorobuaka ma ana taeka b'a a na nako Karemera, ni kakaaea Nab'ara ma n anganna ana kamauri.

⁶E tuangiia b'a a na kaangai nakon Nab'ara: “E kanakoira Tawita b'a ti na anganiko ana kamauri, ma ana katekeraoi nakoim, ma am utu, ao am b'ai ni kabane.

⁷E ongo b'a ko tabe ni koroburaei am tiibu, ao e tangiria b'a ko na ataia b'a a tia n raoniira am taani kaawakintiibu ao bon akea te b'ai ae karaoia nakoia ae e buakaka. Akea naba aia b'ai ae ti iraea n taai ni kabane ake a mena iai i Karemera.

⁸Bon titirakiniia, ao ane a na kaongoraeko. Ti a taonaki ni bongin te bootaki ni kukurei, ao e butiiko Tawita b'a ko na butim'aira n akoira. Ti butiiko b'a ko na anganiira ane e konaa n reke iroum ngaira aika am toro ao nakon raoraom ae Tawita.” [121]

⁹Ao a karokoa te rongorongo aei nakon Nab'ara n aran Tawita. Ao a tataninga ikekei,

¹⁰ni karokoa e anga ana kabanea ni kaeka Nab'ara ae e kaangai, “Tawita? Antai te aomata anne? I tuai man ongongo arana mai m'aaina! A kaona aon te aba tooro aika a biri nako ni boong aikai!

¹¹I aki kan anaa au kariki ma te ran, ao maan ake I tiring i bukiia au taan koroburae n tiibu, ao n anga nakoia aomata aika I aki ata te tabo ae a nako mai iai!” [122]

¹²Ao a oki ana rorobuaka Tawita nakoina ao a tuangnga te b'ai are e taekinna Nab'ara.

¹³Ao e anga ana taeka Tawita ni kaangai, “Kanim ami kabaang ni nneia, ao a bane ni karaoa arei. Ao e karina naba ana kabaang Tawita ni nnena ao e m'ananga nako ma 400 ana rorobuaka, ao a katikuia 200 imwiia ma b'aai.

¹⁴E taku temanna ana tia m'akuri Nab'ara nakon buun Nab'ara are Nei Abikaira, “Ko a tia n ongo te rongorongo? E kanakoia ana taan uarongorongo Tawita man te rereua ma te kamauri nakon ana toka, ma e aki butim'aia.

¹⁵Ao a bon rangi raoiroi nakoira; a bon aki roko n te tabareira, ni kabane ara tai are ti mena iai ma ngaiia n taian tawaana, akea ara b'ai ae e a kimoaia.

¹⁶A kakaawakiniira n te bong ma te ngaina n taai nako are ti tabe iai tararuaia ara nanai ni man.

¹⁷Taiaoka ma kareerekea riki am iango iai ao karekea am iango b'a tera ae ko na karaoia nako iai. E konaa n riki te b'ai aei b'a rokon te kangaanga nakon ana toka ao kaain ana utu ni kabane. Bon te aomata ngaia ae e raarawa n tuangaki arona, ao bon akea ae e konaa n ongo i rouna!”

¹⁸Ao e kawaekoaa Nei Abikaira ni karekei taiani kariki aika 200 m'aitina, uoua te baeki n ran aika kunin te man ae a onrake n te wain, niiman tiibu aika umunaki, 17 te kirokuraem te uita ae e tinimaki, 100 amwiin te kureebe ae a m'au, ao 200 te amwi ni biiku aika a m'au, ao e katokai i aon te aati.

¹⁹Ao e taku nakon ana tia m'akuri. “Ko na rimoa b'a N na ririmwiiko.” Ma akea te b'ai ae e taekinna nakon buuna.

²⁰E kam'ananga ana aati ri tinanikun te kab'ao are n iteran te tabuki ike e rina naba ni kaaitibo ma Tawita ma ana rorobuaka aika a m'ananga ni kainetia.

²¹E tabe n iango i nanona Tawita ao e taku, “E aera ngke I a kabane au tai ni kaawakiniia ana taan kaawakiniman i nanon te rereua ikekei? Bon akea te b'ai teuana ae ti iraea, ao ngaia aio boon mwiin buokana irou!

²²Tera ngkana e oreai n tiringai te Atua ngkana I aki tiringiia ni kabane aomata aikai nakon te ingabong!”

²³Ao ngke e noora Tawita Nei Abikaira, e kawaekoa n ruo ma ni b'aka i aontano

²⁴i waen Tawita, ao e taku, “Taiaoka teuae ko karineaki, ongora irou! N na bon riai ni bukinai n te b'ai aei.

²⁵I butiiko b'a ko na aki tabe ma Nab'ara, b'a bon akea manenana! Ao bon anne nanon arana: te nanoroo! I aki mena ikekei ngke a roko am taani m'akuri teuae ko karineaki.

²⁶Bon te UEA ae e tautauko b'a ko na aki tiringa am kairiribai. Ao I tuea ngkai n aran te UEA ae E maiu b'a a na aki konaa n tiringko am kairiribai ma aomata ni kabane akana a tangiria ni kan tiringko ao ana katuaaeaki kaanga Nab'ara.

²⁷Taiaoka teuae ko karineaki, butim'aea au b'aintangira aikai I uoti nakoim ao anganiia am aomata akanne.

²⁸I butiiko b'a ko na kab'araa au bure n te b'ai ae I a tia ni karaoia. E na kaueako te UEA, ma am kariki naba, i bukina b'a ko buaka i bukina; ao ko na aki karaoa te b'ai teuana ae e buakaka i nanon am tai ni maiu.

²⁹Ngkana iai ae e na buakaniko ao ni kataia n tiringko, ao E na kaawakiniko te Atua b'a ko na mano raoi, kaanga te aomata ae e kakaawakina te kaub'ai ae e kakaawaki. E na karenakoia am kairiribai nako te UEAkaanga te aomata ae e karenakoa te atiibu n te bana.

³⁰Ao ngkana E tia te UEA ni karaoi baika a raraoi aikai ni kabane n aron are E berita iai nakoim ngkoe ae uean Iteraera,

³¹ao i mwiina ane e na aki rawaawata nanom ke n nanokawaki teuae ko karineaki i bukin tiringakim ae akea bukina ke i bukin irantangaeam i bon iroum. Ao ko na uringai teuae ko karineaki ngkana E tia te UEA ni kakab'aiako.”

³²E taku Tawita nakon neierei, “E na neboaki te UEA, ae Atuaia Iteraera, are E kanakomaiko n te bong aei b'a ko na kawarai!

³³E rab'a te Atua i bukin am iango raoi ao i bukin naba te b'ai ae ko a tia ni karaoia ngkai ko tautauai man karaoan te bure n tiritiri ao man irantaangaku i bon irou.

³⁴E a tia te UEA ni kaawakinai b'a N na aki karaoa ae e buakaka nakoim. Ma I bon tuea n aran te UEA b'a ngke arona b'a ko bon aki waekoa n roko ni kawarai, ao a na bane ni mate ana rorobuaka Nab'ara nakon te moaningabong!”

³⁵Ao i mwiin arei, e kukurei Tawita ni butim'aai b'aai ake e uoti neierei nakoina ao e taku nakoina, “Naako okira mwengam ao tai raraoma. N na karaoa ane ko tangiria.”

³⁶Ao e nako Nei Abikaira n oki nakon Nab'ara, are e bon mena ni mwengana ni karaua ni kukurei n ana baka n am'arake ae e karaoia ae kaanga ai aron ana baka te uea. E mooi manging ao akea te b'ai ae e riki i rouna, ma ngaia are, akea te b'ai teuana ae e karakinna neierei nakoina ni karokoa te moaningabong are i mwiina.

³⁷Ao ngke e a toki angin mangingina, ao e a karakin b'aai ni kabane neierei nakoina. E a reke naba i rouna te marei ao e a ti aki konaa naba ni kakam'akuri.

³⁸Tebwina te bong i mwiina, E orea Nab'ara te UEA ao e mate.

³⁹Ao ngke e ongo Tawita taekan Nab'ara b'a e a tia ni mate, ao e taku, “E na neboaki te UEA! E a tia n irantangaai mairoun Nab'ara i bukina ngke e kamamaaeai ao E kaawakinai b'a N na aki karaoa ae e buakaka. E a tia te UEA ni katuaaea Nab'ara i bukin ana m'akuri ae e buakaka.” Ao i mwiin arei, e karaoa ana kabutiman Tawita b'a e kan mare ma Nei Abikaira.

⁴⁰E kanakoa ana tia m'akuri ni kawara neierei i Karemera ao e taku nakoina, “E kanakoira Tawita nakoim b'a ti na kairiko nakoina b'a buuna.”

⁴¹Ao e bobaraaki Nei Abikaira nako aontano ao e taku, “Bon ana toro ngai ae I tauraoi n teboki waeia ana toro nako.”

⁴²E kawaekoaa n teirake ao e tokara ana aati. Ao e iraki neierei irouia ana aine aika niiman, ao e ira ana toro Tawita ao e riki b'a buuna.

⁴³E a tia Tawita ni mare ma Nei Ainoam are kaain Ietireera, ao ngkai e a manga riki Nei Abikaira b'a buuna naba.[123]

⁴⁴Ma i marenan taai aikanne, e a tia Tauro n anga natina are Nei Mikara are moan buun ngkoa Tawita b'a e na mare ma Nareti are natin Raiti te rorobuaka are kaain te kaawa are Karim. [124]