Read Te B'aib'ara 1.Tamuera 30 Bible Online

1.Tamuera 30 - Te B'aib'ara bible

1.Tamuera 30

¹Uabong i mwiina, a roko Tawita ma ana rorobuaka i Tikeraka. A tia kaain Amareka ni kurib'aia Iuta maiaki ao a buakana Tikeraka. A tia ni kabuoka te kaawa

²ao a anaiia aine ni kabane; akea temanna ae a tiringnga, ma a uotiia nako ngke a nako.

³Ao ngke a roko Tawita ma ana rorobuaka, ao a nooria b'a e a tia ni kabuokaki te kaawa ao a uotaki nako buuia, natiia rorobuaka, ao natiia aine.

⁴Ao a tang Tawita ma ana rorobuaka, ao e aki roko n te toki tangiia ni karokoa a rangi ni kua.

⁵A bon uotaki nako naba buun Tawita ake uoman ake Ainoam ao Abikaira.

⁶E a bon rangi n reke Tawita n te kangaanga irouia ana rorobuaka b'a a rangi ni b'ara nanoia i bukin buan natiia, ao a iaiangoa karean Tawita n atiibu; ma E anganna korakorana te Atua,

⁷E taku Tawita nakon Abiata are natin te ibonga are Aimereka, “Uotaamai te ebota, “ao e uotia Abiata nakoina.

⁸Ao e titirakina te UEA Tawita ni kaangai, “N na riai n rimwiia taan kurib'ai? Ao N na kauiaia?” Ao E kaeka ni kaangai, “Naako rimwiia; ko na kauiaia ao ko na kamaiuia taenikai.”

⁹Ma ngaia are, a m'ananga nako Tawita ma ana rorobuaka ake 600, ao ngke a roko n te karaanga ae e uarereke i Berota, a tiku tabeman ikekei.

¹⁰Ao e reita nako kawaina Tawita ma rorobuaka ake 400; ao a kua ana rorobuaka ake 200 b'a a aki konaa n ri nanon te karaanga are e uarereke ma ngaia are, a tiku n iterana are teuana.

¹¹Ao e reke temanna kaain Aikubita n te aba arei ao a kairiia nakon Tawita. A anganna teutana te am'arake ma te ran,

¹²ao tabeua taiani kam'au ni biiku ao uoua te amwi n kureebe ae e m'au. Ao ngke e a tia n am'arake, e a manga oki korakorana; e aki roko n te am'arake ke ni mooi i nanon tenua te bong ae e b'anin.

¹³Ao e titirakinna Tawita ni kaangai, “Antai am toka, ao kaan ia ngkoe?” Ao e kaeka ni kaangai, “Bon kaain Aikubita ngai, te toro temanna mai Amareka. E kiitanai au toka i nanon tenua te bong aika a nako b'a I aoraki.

¹⁴Ti a tia ni kurib'aia abaia kaain Kerita i Iuta maiaki ao aban te kaainga are Kareb'a, ao ti kabuoka Tikeraka.”

¹⁵Ao e titirakinna Tawita ni kaangai. “Ko konaa ni kairai nakoia taan kurib'ai akanne?” Ao e kaeka ni kaangai, “N na kairiko ngkana ko berita nako iu n aran Atuam b'a ko na aki tiringai ke n anga ngai nakon au toka.”

¹⁶Ao e kaira Tawita nakoia. A uamaae nako taan kurib'ai i aon te tabo arei, a am'arake, a mooi, ao a kukurei i bukin aia b'ai aika a rangi n m'aiti ake b'aai ake a kurib'ai mairouia kain Biritia ao kanoan Iuta.

¹⁷Ao n te kiriangaina n te bong are i mwiina, ao E a bon buakaniia naba Tawita ni karokoa e bong. Bon akea ae reke biri nakona, ma ti 400 ataeinim'aane ake a toka i aon taiani kamero ma ni bo nako.

¹⁸E kamaiu b'aai ni kabane ake a anaaki irouia kaain Amareka, n reitaki ma buuna ake uoman;

¹⁹bon akea te b'ai ae e bua. A kaokiia ni kabane natiia rorobuaka ma natina aine ma rorobuaka ni kabane, ma b'aai ni kabane ake a kurib'aiaki irouia kaain Amareka.

²⁰E kaoki naba nanai ni kao ma nanai n tiibu; ao ana rorobuaka a kairiia aia nanai ni man nako mataia ao a taku, “Aikai bon ana b'ai Tawita!”

²¹Ao i mwiina, e oki rikaaki Tawita nakoia ana rorobuaka ake 200 ake a tia ni mamaara n iria, ao n tiku i tinanikun karaangan Berota ae e uarereke. A roko b'a a na butim'aea Tawita ma rorobuaka ake a iria, ao e kawariia Tawita ao e kamauriia.

²²Ma a taku tabeman rorobuaka aika a buakaka aika akea manenaia ake a ira Tawita, “A iriira rorobuaka aikai nakon te buaka, ma ngaia are, a na akea te b'ai ae a na anganaki man b'aai ake ti uoti mairouia kaain Amareka. A na ti anganaki buuia ma natiia ao a nako naba!”

²³Ma e taku Tawita: Raou, tai nanonrang n te b'ai ae e a tia n anganiira te UEA! E kaawakiniira te UEA ao E anganiira te tokanikai i aoia aomata ake ti buakaniia.

²⁴Antai ae konaa n ongora moa iroum? A na anganaki tautia ake a tiku imwiira n tararua te maeka aia b'ai ae na ti te bo ma are irouia tautia ake a nako ni buaka.

²⁵E karaoa te tua aei Tawita i bukin Iteraera, ao e kaawakinaki ni karokoa te bong aei.

²⁶Ao ngke e oki Tawita nako Tikeraka, e kanakoa m'akoron b'ai ake a tia n anaaki nakoia raoraona, taan kairiiri i aon Iuta, ma te rongorongo ae e kaangai, “Aio te b'aintangira nakoimi man b'aai ake a tia n anaaki mairouia Ana kairiribai nako te UEA.”

²⁷E kanakoa nakoia kaain Betaera, nakoia kaain Ram'a ni m'akoron Iuta are maiaki, ao nakoia kaain te kaawa are Iatira, [132]

²⁸Aroera, Tibemota, Etitemoa,

²⁹ao Rakara; nakon kaainga aika Ierameera, nakon kaain Kenaite,

³⁰ao nakoia kaain kaawa aika Orema, Boratian, Ataka,

³¹ao Eberon. E kanakoa nakon taabo ake e a tia ni m'am'ananga ngkoa inanoia iai ma ana rorobuaka akekei.