Read Te B'aib'ara 1.Tamuera 7 Bible Online

1.Tamuera 7 - Te B'aib'ara bible

1.Tamuera 7

¹Ma ngaia are, e a reke i rouia kaain Kiriata Iearim te Atiniberita, ao a katikua n ana auti Abinataba, are e mena i aon te tabuki n aia kaawa. Ao a rinea natina te m'aane are Ereata b'a e na kaawakinna,

²ao e tiku ikekei i nanon 20 te ririki. I nanon te tai aei, ao a bane Iteraera n nanokawaki ma ni bubutiia te UEA b'a E na buokiia. [32]

³Ao n te bong teuana, ao e tuangiia Iteraera Tamuera ni kaangai, “Ngkana kam bon kan rairaki nakon te UEA, ao kam na anganai kakoauaana, b'a kam na kanakoi atuaia ianena, ni ikotaki naba ma te atua te aine are Nei Atiterota. Rairaki nakon te UEA ma nanomi ni kabane ao taromauriia n ti Ngaia. Ao ane na kamaiungkami mairouia kaain Biritia.”

⁴Ao a bane ni kanakoi bouanantin B'aara ao Atiterota ma ni moana taromaurian te UEA n ti Ngaia.

⁵Ao e taku Tamuera, “Tuangiia Iteraera ni kabane b'a a na bootaki ni kabowi i Mitib'a, ao N na tataro nakon te UEA i bukimi.”

⁶Ao a bootaki ni kabowi Iteraera i Mitib'a ao a kairaki i roun Tamuera. Ao a itiia te ran man te m'anib'a ao a kab'aroa b'a kaanga aia karea nakon te UEA. Ao ni bon te bong naba anne, ao a aki am'arake ni kaota rawawataia, ao a kaoti aia bure ma aia aki kakaonimaki nakon te UEA.

⁷Ao ngke a ataa te bootaki n kabowi kaain Biritia i Mitib'a, ao a kanakoa aia taanga ni buaka ni buakaniia Iteraera. Ao a maaku Iteraera ngke a ongo b'a a roko kaain Biritia.

⁸Ao a taku nakon Tamuera, “Tai katoka am tataro; bubutiia te Atua b'a E na kamaiura!”

⁹Ao Tamuera e bubutiia te UEA b'a E na kamaiuia Iteraera, ao i mwiina e anga te karea ae te tiibu te tei nakon te UEA.

¹⁰Ao e bon tuai bane ana anga karea Tamuera ngke a moana aia buaka kaain Biritia. Ao E kaekaia te UEA ao E karebwea te baa ni katobibiia. Ao a tiaoki kaain Biritia ao a birinako.

¹¹Ao a kiitana Mitib'a m'anen Iteraera ma n rimwiia ni karokoa rarikin taian tabuki ake i aan Beta Ka, ma n tiringiia ni kabane tautia ake a reke i rouia.

¹²Ao a bon rangi ni konaaki buaka kaain Biritia n te aro are rangi ni maan i mwiina ao a tib'a manga buakana Iteraera.

¹³Ao i mwiin te bobuaka, ao e katea te kanuringa Tamuera i marenan Mitib'a ma taiani b'a aika rietaata mataniwiia. Ao e aranna b'a, “Te Kanuringa are te Buoka”[33] b'a kauringaia Iteraera buokaia i Roun te UEA. Ao E buobuoka Iteraera te UEA ni buakaniia kaain Biritia i nanon ana tai ni maiu Tamuera.

¹⁴Ao a manga kaoka aia kaawa ma abaia ake i marenan Ekeron ma Kata. Ao e raoi naba Iteraera ma kaain Amora. [34]

¹⁵Ao e riki b'a te tia kairiiri Tamuera [35] i aon Iteraera ni kabane bongin maiuna.

¹⁶Ni katoa ririki ao e naanako Tamuera nako Betaera, Kirekara, ao Mitib'a ni kakaraoa te m'akuri n tia moti nakoia aomata.

¹⁷Ao i mwiina, e a manga nako n okira abana i Ram'a ma ni karaoa naba te m'akuri n tia moti. Ao iai naba te baonikarea ae karaoia i bukin te UEA i Ram'a.