Read Te B'aib'ara 1.Tamuera 9 Bible Online

1.Tamuera 9 - Te B'aib'ara bible

1.Tamuera 9

¹Kiti bon te aomata ae marurung ae kaain te baronga are Beniamin. Tamana bon Abiera, ao tibuna bon Abia.

²Bon iai natin Kiti te m'aane ae arana Tauro, ae tamaroa taraana, ao e ab'ab'aki riki nakoia Iteraera ni kabane.

³Bon iai tabeua ana aati, ma a tia ni birinako. Ma ngaia are, e taku nakon Tauro, “Kaira temanna te toro ao naako kakaei taian aati ake a tia ni birinako.”

⁴Ao e nako Tauro ma te toro nakon aaba ake a tabukibuki i Eberaim ao n abaia kaain Tiaritia, ma a bon aki roko n te reke taian aati. Ao i mwiina, a manga nakon abaia kaain Tiaarim ao Beniamin, ma bon akea naba iai aati.

⁵Ao n tokina a roko n te aba are a maeka iai kaain te kaainga are Tuba [39] Ao e taku Tauro nakon ana toro, “Ti a nako n okira ara auti. Ngkana ti aki waekoa n oki, ao ane nang toki raraoman tamau n te aati, ao ane nang manga raraomaeakiniira!”

⁶Ao e taku te toro arei, “Taninga moa. Iai Ana aomata te Atua ae maeka n te kaawa ae kaan ma ikai. Bon te kamimii b'a a bane ni kokoro bukin baike e taekin ni kabane. Ti a nako ni maroroo ma ngaia. E na mena ngkoa ao e kona n tuangiira te tabo ae ti na kakaae iai.

⁷Ao e taku Tauro, “N na kanga ni kawara te burabeti ao akea uotau nako ina? Ao bon akea naba nikiran ara kariki i nanon te baeki. Tera ae ti na anganna?”

⁸Ao e taku te toro arei, “Bon iai au tirewa ae uarereke. Ti na anganna, ao ane na tuangiira b'a ti na kakaae ia te aati.”

⁹Ao e kaeka Tauro, “E nang tamaroa! Ti a nako n noora te aomata ae kakaoti nako ina te kaotioti!”

¹⁰Ao e nako Tauro ma te toro nakon te kaawa are maeka iai te burabeti.

¹¹Ao ngke a tabe n tam'arakea te tabuki ike e mena iai te kaawa, ao a kaaitibo ma te ateiaine ae na itiran, [40] ao a taku m'aane ake uoman akekei nako ina, “Ti kakaea te m'aane are a kakaoti taiani kaotioti nako ina, e memena n te kaawa aei ke e aki?”

¹²Ao e taku neierei, “Eng, e memena ikai. Bon are n te kaawa n te bong aei b'a e na karaoaki te angakarea ma te botaki n am'arake n te tabo n taromauri. Ao bon are i m'aaimi, ma kawaekoaingkami,

¹³ane kam na nooria ngkana kam rin ni mataroan te kaawa. B'a ane i aoni kawaina n otinako nakon te tabo n taromauri b'a e na am'arake ma iruwa ake a kaoaki. A aki kona n am'arake ni karokoa e tia ni kakab'aia te karea. Ngkana kam nako ngkai, ao ane kam na kauia.”

¹⁴Ao a nakon te kaawa, ao ngke a nang rin ni mataroan te kaawa, ao e a otinako, i aoni kawaina nakon te tabo n taromauri.

¹⁵Ao E a tia n tuanga Tamuera te UEA n te bong are i m'aain rokon Tauro ni kaangai,

¹⁶“I a tia n noora rawawataia Au aomata, ao I ongo aia wewete ni kani buokaki. Nakon te ingabong, ao N na kanakoa te m'aane man te baronga are Beniamin, ae na kamaiuia aomata mairouia kaain Biritia. I tangiriko b'a ko na kab'aroa b'aan te oriwa [41] i aon atuuna ni kaotia b'a e na riki b'a aia tia kairiiri.”

¹⁷Ao e taratara Tauro Tamuera, ao E taku te UEA nako ina, “Bon anne te m'aane are I tuangko taekana. Boni ngaia are na tautaekana Iteraera.”

¹⁸Ao Tauro e nako ni kawara Tamuera i mataroan te kaawa ao e taku nako ina, “E maeka n te kaawa aei te m'aane are e nonori taian kaotioti. Kam kona n tuangai te kawai nakon ana auti?

¹⁹Ao e taku Tamuera, “Boni ngai te aomata ae I nonori taiani kaotioti! Naako ngkai tam'arakea te tabo n taromauri. Ko na am'arake ma ngai n te bong aei, ao nakon te moaningabong, I a kaeka am titiraki.

²⁰Ko na aki raraoma n am aati ake a birinako tenibong te bong n nako. A tia n reke. Am b'ai ma am utu b'aai ni kabane aika rangi ni kakaawaki i aon Iteraera.” [42]

²¹Ao e taku Tauro, “E aera ngkai ko tuangai te b'ai aei? Bon kaain te baronga ngai ae Beniamin, ae te kabanea ni uarereke ni baronga mai Iteraera, ao bon te kabanea ni mangori au kaainga mai buakon kaaingan te baronga.”

²²Ao Tamuera e kaira Tauro ma ana toro nakon te ru ni katangaina n te tabo n taromauri. Ao e kaaniia teningaun aomata ikekei ake a roko b'a a na ira te botaki n am'arake, ao Tamuera, e angan Tauro ma ana toro nneia aika kakannato b'a a na tekateka iai.

²³Ao e taku Tamuera nakon te kuuka, “I anganiko ngkoa m'akoron te iriko

²⁴ae rangi n tamaroa ao I tuangko b'a ko na kaokoroa. Uotiamai ngkai.” Ao e uota te iriko arei te kuuka ao e katikua i matan Tauro. Ao e taku Tamuera nako ina, “Aio kanam. Am'arake b'a I a tia ni katauraoia i bukim, ao I kaoiia aomata aikai b'a a na kamarorooko n am'arake. Ao ngke a tia n am'arake Tauro ma Tamuera

²⁵ao a kiitana te tabo n taromauri nakon te kaawa. Ao e a tia ni katauraoaki te kainiwene i bukin Tauro i aon taubukin te auti ae boraoi [43] are ana auti Tamuera,

²⁶ao e matu Tamuera ikekei. Ao n otin taai n te ingabong are i mwiina,[44] ao e wetea Tauro Tamuera nako taubukin te auti, ao e taku, “E a bo tain te uti! N na iriko ni kab'akako i mataroan te kaawa.” Ao e teirake Tauro, ao a kaai n airi nako

²⁷ao ngke a kaaniia tabon te kaawa, ao e tei Tamuera ao e taku, “Karimoa teutana am toro b'a n na tuangko te b'ai are tuangai te Atua.” Ao ngke a tia n rimoa teutana te toro arei,