Read gitonga Genesi 1 Bible Online

Genesi 1 - gitonga bible

Genesi 1

¹Guhegulani Nungungulu a di vanga ndzadzi ni mafu.

²Mafu ma diri liphanga nyambana giwumbelo, ma diri giwula nyambana gilo, gidema gi di fenengedza linene, Liphuvbo la Nungungulu li di gu furugedza vbatshani nya mati.

³ Nungungulu a di phela gu ganela, khuye: “Gu na manege guwonegela.” Guwonegela gu di manega.

⁴Nungungulu a di wona nya gukhuye guwonegela gilo nya gyadi, a gu hambanisa guwonegela ni gidema.

⁵Nungungulu a di rana guwonegela, khuye: “Mihani” a gu rana gidema khuye “wutshigu.” Li di pfola, li gugya; litshigu nya guhegule.

⁶Nungungulu a di khuye: “Gu na manege ndrengelenge vbakari nya mati, yi hambanisa aya ya vbatshani ni aya ya vbavbatshi.”

⁷Gu di girega kharato. Nungungulu a di gira ndrengelenge, a hambanisa mati ya vbavbatshi ni aya ya vbatshani nya ndrengelenge, si girega kharato.

⁸ A di rana ndrengelenge khuye ndzadzini. Li di pfola li gugya; litshigu nya wuvili.

⁹Nungungulu a di khuye: “Ma na patane dangamwedo mati ma guromo vbavbatshi nya ndzadzi, gu manege mafu nya gubange.” Gu di girega kharato.

¹⁰Nungungulu a di rana gipandre nya gubange, khuye: “Mafu,” a gu rana tshangano nya mati, khuye: “Linene.” PFHUMU Nungungulu a di si wona gukhuye khyadi.

¹¹Nungungulu a di ganela gambe, khuye: “Mafu ma na fenengedzwe khu likhabi; mafumbu nya mwasi ma ningago dzithanga, ni misimbo nya mihandro yi velegago mihandro ni dzithanga dzaye mafuni, gukhedza khu lifumbu ni lifumbu.” Gu di girega kharato.

¹²Mafu ma di bugisa mwasi ni mitongwe yi ningago dzithanga khu mafumbu yaye, ni misimbo yi ningago mihandro ni mbewu khu mafumbu yaye. PFHUMU Nungungulu a di si wona gukhuye khyadi.

¹³Li di pfola, li gugya; litshigu nya wuraru.

¹⁴Nungungulu a di khuye: “Gu na manege myenge nya guwenengedze ndzadzini, yi hambanisa wutshigu ni mihani. Yi na khale giyeyedzo nya dzinango, matshigu ni myaga,

¹⁵Myenge yoyo yi vegidwego ndzadzini yi na wenengedze mafu.” Gu di girega kharato.

¹⁶Nungungulu a di vanga myenge mivili nya yikhongolo: Owu nya wukhongolo wu fela gufumela mihani, owu nya wudugwane wu fumela wutshigu. Khu guhegisa, a di gira dzinyeledzi.

¹⁷Nungungulu a di dzi vega ndzadzini gasi gu wenengedza mafu,

¹⁸dzi fumela mihani ni wutshigu, dzi hambanisa gu wonegela ni gidema. Nungungulu a di si wona gukhuye khyadi;

¹⁹li di pfola li gugya; Litshigu nya wu na.

²⁰Nungungulu a di khuye: “Matini gu na tale khu sirengo nya guvbanye: Sinyoni si na vbuvbe damboni.”

²¹Nungungulu a di vanga mafumbu nya guhambanelane nya sirengo nya sikhongolo sa linene, ni sirengo satshavbo si vbanyago matini ni satshavbo si vbuvbago khu mambapi. Nungungulu a di si wona gukhuye khyadi.

²²Nungungulu a di si kategisa, khuye: “Velegelani mu andra mu gu tadza mati ya linene; sinyoni niso si na velegelane tigoni.”

²³Li di pfola, li gugya: Litshigu nya livbandre.

²⁴Nungungulu a di khuye: “Gu na manege sirengo nya guvbanye, nya mafumbu ni mafumbu: Sifuyo, sirengo nya gukhwirire khu lididi, ni sirengo nya likhabi, khu mafumbu yawe.” Gu di girega kharato.

²⁵Nungungulu a di vanga mafumbu yatshavbo nya sirengo nya likhabi ni mafumbu yatshavbo nya sifuyo, ni mafumbu yatshavbo nya sirengo si khwirirago khu lididi mafuni. Nungungulu a di si wona gukhuye satshavbo khyadi.

²⁶Nungungulu a di khuye: “Hongoleni hi gire muthu khu mufananiso wathu, a godzana ni Ethu, gasi a fumele dzindzandzi dza phwani, ni sinyoni si vbuvbago ndrengelengeni, ni sirengo satshavbo si vbanyago mafuni.”

²⁷Nungungulu a di vanga muthu khu mufananiso Waye, a mu giride a godzana ni Nungungulu; a di vanga mwama ni nyamayi.

²⁸Nungungulu a di va kategisa a va embela, khuye: “Velegelanani, mu andra, mu tadza mafu, mu ma fumela. Fumelani dzindzandzi dza matini, sinyoni ni sirengo satshavbo si vbanyago mafuni.”

²⁹Nungungulu a di ganela gambe, khuye: “Nyi ngu mi ningani mwasi watshavbo wu velegago mbewu, ni misimbo yatshavbo yi velegago mihandro yi gu na ni dzithanga. Si na khale guhodza gwanu.

³⁰Gasi sirengo satshavbo si vbanyago mafuni, ni sinyoni satshavbo sa damboni ni satshavbo si khwirirago khu lididi, si gu ni hefemulo nya guvbanye, nyi ngu si ninga gu hodza mwasi watshavbo wu bugago mafuni.” Gu di girega kharato.

³¹Nungungulu a di wona gukhuye sigiro Saye satshavbo si diri sadi ngudzu. Li di pfola, li gugya: Litshigu nya livbandre na limwedo.