Read gitonga Genesi 12 Bible Online

Genesi 12 - gitonga bible

Genesi 12

¹ PFHUMU Nungungulu a di embela Abrama, khuye: “Diga litigo lago, la valongo vago ni ndranga ya babe wago, u hongola ga litigo nyi na gu nonedzago.

²Nyi na wusa khu uwe litigo nya vathu nya vangi. Nyi na gu kategisa, nyi gu ninga lina nya wuzundzo, u na khala uwe gikategiso.

³ Nyi na kategisa avo va gu kategisago, nyi vala avo va na gu valago. Vathu vatshavbo va tigoni va na kategiswa khu kotani gwago.”

⁴Abrama a di khuga a bela ndzilani kha nga guruma gwa PFHUMU Nungungulu. A di dzega Loti. Abrama a diri ni livbandre na mavili magumi ni livbandre (75) myaga, gikhati a khugidego khu tigoni ga Harani.

⁵A di dzega mwangadzi waye Sarayi ni Loti, gyanana gya ndriyaye, ni silo saye satshavbo a nga bani nari naso ni vathu va nga bani va mu thumela tigoni gwa Harani, va bela ndzilani vatshavbo va hongola tigoni gwa Khanani. Na va vbohide tigoni gwa Khanani,

⁶Abrama a di li tsemakanya khu vbakari ni vbakari kala a vboha dhoropani gwa Sikemi, vbafuvbi ni simbo nya wukhongolo wa Moreya. Vakhanani va di gu vbanya tigoni mule.

⁷ PFHUMU Nungungulu a di dzi wonegisa ga Abrama a mu embela, khuye: “Nyi na ninga litigo leli situgulwana sago.” Abrama a di vbaha vbale giluvelo gya PFHUMU Nungungulu a nga dzi wonegisago gwaye.

⁸A di khuga khu vbale a gu hongola mbeli kala gigomoni gi guromo phuvbo ga Khugadambo ga lidhoropa la Bheteli. A di tsitsa avbo mitshatsha yaye na gu wona Bheteli khu Muhwadambo, ni Hayi khu Khugadambo; a di gira gambe giluvelo a gu phasela avbo lina la PFHUMU Nungungulu.

⁹Abrama a di simamisa gu gimbila liendro laye, na gu ema avba, na gu ema vbale, na gu thonona Negebhi.

¹⁰Gu di manega ndzala tigoni mule, Abrama a di thavela tigoni ga Egipito, aya vbanya iyo gikhati nya gukari, kholu, ndzala yi diri yikhongolo ngudzu.

¹¹Vari vbafuvbi ni gu bela tigoni ga Egipito, Abrama a di embela mwangadzi waye Sarayi, khuye: “Upwa, nyi ngu dziti nya gukheni u nyamayi nya gumbure ngudzu.

¹²Avbo Vagipiti va na gu wonago, va na, khavo: I mwangadzi waye, va na nyi songa, va gu diga uwe u vbanya.

¹³Khu guralo, nyi ngu gu lomba gukheni u ganela gukhuwe u ndriyangu, gasi nyi fela gu pharwa gwadi khu kotani yago.”

¹⁴Abrama na vbohide tigoni ga Egipito, Vagipiti va di wona gukhavo mwangadzi waye mburide ngudzu.

¹⁵Manganagana ya Faro, gikhati ma nga mu wonago, ma di ya ganela khu uye ga Faro, ma zundza wumburi waye. Khu guralo, mwangadzi wa Abrama a di dzegwa a yiswa nyumbani ga Faro.

¹⁶Khu kotani yaye, Abrama a di pharwa gwadi ngudzu, a gu ningwa dzinvuta, dzimombe ni dziburu, sithumi nya vama ni vanyamayi, dziburu nya migadzi ni dzingameriya.

¹⁷Aholu PFHUMU Nungungulu a di tsayisa khu mitungu nya yikhongolo Faro ni ndranga yaye khu kotani ga Sarayi mwangadzi wa Abrama.

¹⁸Faro a di rumela guya ranwa Abrama, a ta mu embela, khuye: “Khu ginani u giridego esi kharati? Khu ginani u ngamba nyi embela gukhuwe i mwangadzi wago?

¹⁹Khu ginani u nga nyi embela gukhuwe i ndriyago, u nyi diga nyi mu hakha kha nga mwangadzi wangu. Olu dzega mwangadzi wago, oyu, mu dzege u hongola naye.”

²⁰Khavbo avbo, Faro a di ruma masotshwa yaye khu githawo gasi gu bangaladza Abrama ni mwangadzi waye, ni silo saye satshavbo a nga bani nari naso kala va gu duga vbinganoni nya litigo la Egipito.