Read gitonga Genesi 16 Bible Online

Genesi 16 - gitonga bible

Genesi 16

¹Sarayi, mwangadzi wa Abrama a nga bani ari mwalo gyanana, a diri ni githumi nya nyamayi nya Mugipiti, nya gupwani khu Agari.

²Sarayi a di embela Abrama, khuye: “Kha nga olu PFHUMU Nungungulu a ngamba nyi ninga guvelega, nyi ngu gu lomba u dzega githumi gyangu nya nyamayi. Mwendro a gu dzina saye khavbo gwaye, nyi na mana sanana.” Abrama a di dzumela mawonelo ya Sarayi.

³Khavbo avbo, Sarayi, ngadza Abrama a di dzega Agari, githumi gyaye nya Mugipiti a gi ningela ga mwama waye Abrama gasi gi khala mwangadzi waye. Esi si giregide hwane nya gu Abrama na vbanyide gipimo nya likhumi myaga tigoni gwa Khanani.

⁴Uye a di tshangana ni Agari, oyu a di khura mimba. Avbo a nga dzipwago gukhuye a na ni mimba, a di phela gunyenya Sarayi, mune waye.

⁵Sarayi a di embela Abrama, khuye: “Dzitshoni nyi thedwago khu kotani yago dzi na thegela uwe. Eni nyi gu ningide githumi gyangu gu khala mwangadzi wago, olu gi dzipwago na giri ni mimba gya gu nyi nyenya. PFHUMU Nungungulu a na hi lamule ethu ha vavili, uwe ni eni!”

⁶Abrama a di mu hakha, khuye: “Githumi gyago gyomo mandzani gwago; gira gugola gwago khu igyo.” Khavbo avbo, Sarayi a di gi tshanisa a gu gi tshonegisa. Agari a di khuga a gu thavela hwindzo.

⁷Ngilozi ya PFHUMU Nungungulu yi di ya mu mana giwulani, vbafuvbi ni gifefe nya mati ndzilani nya guye Suri.

⁸Ngilozi ya PFHUMU Nungungulu yi di embela Agari, khiyo: “Agari, githumi gya Sarayi, wa guta khu evbi? Wa gu hongola hayi?” Uye a di hakha, khuye: “Nya gu thava mune wangu Sarayi.”

⁹Ngilozi ya PFHUMU Nungungulu yi di mu embela, khiyo: “Bwelela ga mune wago, u ya dzi thesa vbavbatshi mbeli gwaye.”

¹⁰Ngilozi yi di engedza gambe, khiyo: “Nyi na andrisa melego wago, situgulwana sago si na tala ngudzu nyambana muthu nya gu dzi kodze gu si saya.”

¹¹Ngilozi ya PFHUMU Nungungulu yi di mu embela gambe, khiyo: “U na ni mimba u na velega gyanana nya gikhwathana u na gi riyago lina nya gupwani Ismayeli, kholu PFHUMU Nungungulu pwide lito nya gutshaniseke gwago.

¹²Gyanana gegi gi na khala kha nga giburwana nya kanu, gi na wugela vathu vatshavbo; gambe, gi na wugedwa nigyo khu vatshavbo, gi na vbaha tshatsha waye mbeli ga vandriyaye vatshavbo.”

¹³Agari a di rana PFHUMU Nungungulu a nga ganelago naye khu lina nya gukhuye “Nungungulu khuwe U nyi wonago”[4], kholu a di khuye: “Kha nya mu wona neni wule a nyi wonago, gani?”

¹⁴Khu magirelo yoyo, nambo wule wu khalago ndzilani nya gukhuge khu Kadesi u hongola Bheredi, wa gu ranwa pwani nambo wa Lahayi-Roi.[5]

¹⁵ Agari a di hefemula gyanana gya Abrama. Abrama a di riya gyanana gya Agari khuye khigyo Ismayeli.

¹⁶Abrama a diri ni livbandre na mararu magumi ni livbandre na moyo (86) myaga gikhati Agari a velegidego Ismayeli.