Read gitonga Genesi 18 Bible Online

Genesi 18 - gitonga bible

Genesi 18

¹PFHUMU Nungungulu a di dzi wonegisa avbo ga Abrahama vbafuvbi ni miguhu ya Mambre, na khade mwanyani nya tshatsha waye, ni vbakari nya mihani.

² Na khuside maho a di wona madhota mararu na ma emide vbafuvbi gwaye. Avbo a nga ma wona, a di khuga vbamwanyatunu nya tshatsha waye a tutuma a va khinga aya khidzima vbavbatshi,

³a ganela, khuye: “Pfhumu yangu, nya gu bani nyi mane wuhigo mahoni gwago, nyi ngu gu lomba, U nga vbindri nyamba bela ga githumi gyago.

⁴Nyi na rumela gu reswe mati madugwana mu ta hambani mawundru, mu hefemula mutsani nya simbo yoyu.

⁵Nyi naya dzega gibaba gidugwana, gasi mu kodze gu mana tshivba nya gugimbile ndzila yanu nya gulaphe, kholu mu vbindride khu ga githumi gyanu.” Madhota ma di hakha, khayo: “Gira kha nga idzo u ganedego.”

⁶Abrahama a di vbiredza gu bela tshatshani gwaye aya ganela ni Sara, a mu embela, khuye: “Vbiredza u baga sipimo siraru nya wuguvbi u suga u gira sibaba.”

⁷Abrahama a di tutuma a hongola phandroni aya hatha gimombyana nya gyadi nya guene a ninga githumi a gi dongisela khu guvbiredza.

⁸Abrahama a di ya dzega matega ni mahwe, a resa gambe gimombyana gi nga dongisedwago. A di vega satshavbo mbeli ga madhota; uye a gu ema vbafuvbi gwawe, vbavbatshi nya simbo. Avo va di hodza.

⁹Va di mu wudzisa, khavo: “Womo evbini, mwangadzi wago Sara?” Uye a di hakha, khuye: “Womo tshatshani.”

¹⁰ Moyo nya avo a di engedza, khuye: “Mwakani, nyi na wuya gambe ndrangani gwago, mwangadzi wago Sara a na bani nari ni gyanana.” Sara a di yingisela satshavbo, khu hwane nya lidimba nya tshatsha.

¹¹Wonani, Abrahama ni Sara va di gumbide ngudzu, Sara a di hegiside gu wona migima yi wonwago khu vanyamayi.

¹² Sara a di hega khu monyoni gwaye, a ganela, khuye: “Olu nyi gumbidego eni, ni pfhumu yangu niyo yi gumbide, ina nyi nga na gupwa gambe gunengela, gani?”

¹³Aholu PFHUMU Nungungulu a di embela Abrahama, khuye: Khu ginani Sara a hegago, a ganela, khuye: “Ina lisine, nyi na dzi kodza kamwe gu velega gyanana, olu nyi gumbidego, gani?”

¹⁴Ina gyomo gilo a gi tandregago PFHUMU Nungungulu, gani? Khu matshigu nya nga aya, mwaga wutago, nyi na wuya gambe khavba, Sara a na bani nari ni gyanana nya gikhwathana.

¹⁵Sara a di ganedza, khuye: “Eni kha nya hega.” A di ganela kharato kholu a di tade khu hwanga; aholu uye a di mu hakha, khuye: “Khidzo, u hegide.”

¹⁶Madhota ma di khuga ma bela ndzilani nya guhongole Sodhoma. Abrahama a di gimbila navo a va bangaladza.

¹⁷PFHUMU Nungungulu a di ganela khu monyoni gwaye, khuye: “Nyi na sihela Abrahama esi nyi vbwetago guya gira, gani?

¹⁸Olu Abrahama a na khalago nyapandre nya lihundzu nya likhongolo nya tshivba, khavbo gwaye ma na kategiswago mahundzu yatshavbo nya vathu va mafuni, gani?

¹⁹Kholu nyi mu hathide gasi a laye sanana saye ni linyumba laye gu landrisa ndzila ya PFHUMU Nungungulu, khu gu gira gululama ni lisine; khu magirelo yoyo, PFHUMU Nungungulu a na tadzisa gitumbiso gyaye ga Abrahama.”

²⁰Khavbo avbo, PFHUMU Nungungulu a di ganela, khuye: “Huwa nya guthuledze Sodhoma ni Ghomora yikhongolo ngudzu! Gighoho gyawe gi lemede ngudzu!

²¹Nyi na tshiga nyi yati lisine, mwendro huwa yi vbohidego dzindzeveni khiyo kamwe va giridego. Nyi na ya liti lisine.”

²²Madhota yale ma di pfhurara ma bela ndzilani ma gu hongola Sodhoma. PFHUMU Nungungulu a di nga emide vbafuvbi ga Abrahama.

²³Abrahama a di hidzimela ga Pfhumu aya mu wudzisa, khuye: “Ina u na mbembisa idzosaye, va nya gululama gumogo ni sighohi, gani?

²⁴A gu dzina saye vomo livbandre magumi vathu nya gululame dhoropani. U na va mbembisa kamwe, gani? Kha wu na tsetselela litigo lolo khu kotani nya avo nya livbandre magumi vathu nya gululame va vbanyago umo, gani?

²⁵Ahihi, u nga alakanyi gu gira silo nya nga isoso; gu songa u mbembisa va nya gululama gumogo ni sighohi, muthu nya gululame ni gighohi u va gira idzosaye! Ni vbadugwana, u nga giri kharato! Ina mulamuli nya litigo latshavbo a na sindrwa khu gu lamula, gani?”

²⁶PFHUMU Nungungulu a di mu hakha, khuye: “Nya guya mana vathu nya livbandre magumi nya gululame dhoropani ga Sodhoma, nyi na tsetselela litigo latshavbo khu kotani yawe.”

²⁷Aholu, Abrahama a di engedza gambe gu lomba, khuye: “Nyi na tiya gu ganela ni Pfhumu yangu, eni nyi gu si wa gilo, nyi gu kudzudzwane ni nguma basi.

²⁸Ahati va gu kenelela livbandre vathu avbo nya livbandre magumi nya vathu nya gululame. U na mbembisa lidhoropa latshavbo khu kotani nya gukenelele livbandre basi, gani?” PFHUMU Nungungulu a di hakha, khuye: “Kha nyi na mbembisa lidhoropa nya guya mana umo magumana na livbandre vathu nya gululame.”

²⁹Abrahama a di engedza a ganela gambe, khuye: “Ahati wa guya mana basi magumana?” Pfhumu a di hakha, khuye: “Kha nyi na li mbembisa khu kotani nya avo nya magumana.”

³⁰Abrahama a di engedza a ganela gambe, khuye: “Pfhumu yangu, u nga gorogi nya gu engedza gambe gu lomba; ahati ga guya manega basi magumararu vathu nya gululame?” Pfhumu a di hakha, khuye: “Kha nyi na li mbembisa nya guya mana avo nya magumararu vathu.”

³¹Abrahama a di ganela nyaluphye, khuye: “Nyi na tiya nyi ganela ni Pfhumu yangu. Ahati wa guya mana basi magumavili vathu nya gululame?” Pfhumu a di hakha, khuye: “Kha nyi na mbembisa lidhoropa khu kotani nya avo nya magumavili.”

³²Abrahama a di ganela gambe, khuye: “Pfhumu yangu, u na nyi divalela, nyi na ganela gambe gumogo basi: Ahati wa guya mana likhumi vathu nya gululame?” Pfhumu a di hakha, khuye: “Kha nyi na mbembisa lidhoropa khu kotani nya avo nya likhumi.”

³³PFHUMU Nungungulu na vbedzide gu ganela ni Abrahama, a di hongola. Abrahama a di bwelela wulanga waye.