Read gitonga Genesi 2 Bible Online

Genesi 2 - gitonga bible

Genesi 2

¹Wu di vbela kharati thumo watshavbo nya guvange ndzadzi ni mafu ni satshavbo si guromo umo.

² Khu litshigu nya livbandre na mavili, Nungungulu, na vbedzide thumo waye watshavbo a wu giridego, a di hefemula.

³Nungungulu a di kategisa litshigu lolo nya livbandre na mavili, li khala litshigu nya guphasedwe Uye, kholu khilo litshigu a nga hefemula migaralo nya thumo watshavbo nya guvange, owu Nungungulu a nga wu thumago.

⁴Owu khuwo sasamedzo nya matimo nya guvangwe ndzadzi ni mafu, gikhati PFHUMU Nungungulu a giridego ndzadzi ni mafu.

⁵Gu di ngari mwalo misimbo mafuni, ni mwasi wu di si gu bugi, kholu PFHUMU Nungungulu a di si gu wisi ndzadzi mafuni, gambe gu diri mwalo muthu nya gulime mafu.

⁶Khu guralo, mafuni gu di gu buga gifefe nya mati ma nga bani ma gu naganisa gwatshavbo.

⁷ Khu guralo, PFHUMU Nungungulu a di wumba muthu khu kudzudzwane nya mafu a gu mu furugedza dzithonvuni, a mu thela liphuvbo nya guvbanye. Muthu a di khala givangwa nya guvbanye.

⁸PFHUMU Nungungulu a di yala lithembwe Edheni, khu phuvbo ga Khugadambo a gu vega umo muthu a nga mu wumbago.

⁹ PFHUMU Nungungulu a di bugisa tigoni mafumbu yatshavbo nya misimbo nya mihandro nya gutsakise gu yi wona, ni gutshamba gu yi hodza. Vbakari nya lithembwe a di vega simbo nya womi, ni simbo nya guti gu hambanisa iso nya sadi niso nyamba sadi.

¹⁰Wu di buga tsongo Edheni wu naganisa lithembwe, wu di kabanega khu mitsongo mina.

¹¹Lina nya owu nya guphele khu Pisoni; khuwo wu dzuwulugelago litigo la Havhila, li gu na ni ndralama nya yingi.

¹²Ndralama ya tigoni momo khyadi ngudzu, vbale gambe momo mafura nya gunungele gwadi, ni siwindri nya lisima.

¹³Lina nya tsongo nya wuvili wa gu ranwa pwani Giyoni wu dzuwulugelago litigo latshavbo la Kusi.

¹⁴Lina nya owu nya wuraru gupwani Tigre, wa guvbindra khu phuvbo ga Khugadambo ga litigo la Asiriya; tsongo nya wu na gupwani Ewufrate.

¹⁵PFHUMU Nungungulu a di vega muthu thembweni ga Edheni, gasi a li lima ni gu li sayisa.

¹⁶PFHUMU Nungungulu a di mu ninga milayo yeyi, khuye: “U na hodza mihandro nya misimbo yatshavbo nu tshulegide,

¹⁷aholu handro nya simbo nya guti gu hambanisa silo nya sadi niso nyamba sadi, u nga wu hodzi. Kholu litshigu u na gu wu hodzago u nafa.”

¹⁸PFHUMU Nungungulu a di engedza gambe, khuye: “Khandri gwadi mwama gu khala ekha. Nyi na mu girela mubangaladzi nya idzosaye ni uye.”

¹⁹Khu guralo, PFHUMU Nungungulu na wumbide khu mafu talo nya mafumbu nya sirengo sa khabini ni sinyoni sa damboni a di si bikela ga muthu gasi gu wona malina muni a na si ningago. Lina a nga ningago ga gimwegyo ni gimwegyo nya sivangwa soso nya guvbanye, khilo gi tidwago khilo.

²⁰Muthu a di riya malina nya sifuyo satshavbo sa ndrangani, sinyoni sa damboni ni sirengo nya likhabi, aholu kha nga mana muphasedzeli nya gu mu yele.

²¹Khavbo avbo, PFHUMU Nungungulu a di thela ligovbe nya likhongolo muthu a gu lala. Na modwe khu ligovbe, Nungungulu a di mu dusa limbambo limwedo a gu bugisa tshonge wulanga waye.

²²Khu limbambo a nga dusago khu ga mwama, PFHUMU Nungungulu a di gira nyamayi a gu mu bikela ga mwama.

²³Mwama a di nengela, khuye: “Ina na, khu woni, olu, aya marambo nya marambo yangu ni nyama nya nyama yangu. A na ranwa gupwani nyamayi; kholu dusidwe khu ga mwama.”

²⁴Khu gighelo gyogyo, mwama a na diga ndranga ya babe ni mayi waye aya patana ni mwangadzi waye, va vavili va gu khala muthu moyo basi.

²⁵Mwama ni nyamayi va di khala wumbwiri, aholu va vavili va di si dzipwi dzitshoni khu isoso.