Read gitonga Genesi 20 Bible Online

Genesi 20 - gitonga bible

Genesi 20

¹Abrahama a di khuga vbale a gu hongola tigoni gwa Negebhi, aya vbaha wulanga nya gu eno a wona lidhoropa la Kadesi, eno na ga wona lidhoropa la Suri. A di ya vbanya tigoni gwa Gerari.

² Abrahama a di rana mwangadzi waye, khuye: “I ndriyangu.” Abhimeleki, mufumeli wa Gerari a di rumela guya dzega Sara.

³Aholu Nungungulu a di embela Abhimeleki khu ndroroni ni wutshigu, khuye: “U nafa khu kotani nya nyamayi u dzegidego, kholu ngadzavane.”

⁴Abhimeleki a di si gu hengeli lidawu ni Sara, a di ganela, khuye: “Ama Pfhumu yangu, ina u na songa vathu nyambana nandru, gani?

⁵Gasi khandruye Abrahama a nyi embedego gukhuye: I ndriyangu, gani? Ambari uye mune kha tiyisa nuye gukhuye i ndriyaye, gani? Eni nyi giride esi khu mapimo nya yadi na nyi agide monyoni gwangu.”

⁶Nungungulu a di mu hakha khu ndroroni, khuye: “Aneni nyi ngu dziti gukheni u giride esi nu agide monyoni gwago, kheni nyi nga gu vbulugisa gu nyi ghohela, nyi gu himbedzela gu mu kuha.

⁷Gasi olu bweledza nyamayi ga mwama waye kholu uye muprofeti[8] a na gu lombelela gasi u vbanya, aholu wa gumba mu bweledza dziti nya gukhuwe khu lisine furi u nafa, uwe gumogo ni vathu vago vatshavbo.”

⁸Abhimeleki a di wuga ni dzimindru ngudzu a ramba madhota yaye yatshavbo, a ma embeledzela satshavbo, avo va di tala khu hwanga nya wukhongolo ngudzu.

⁹Hwane nya ugo, Abhimeleki a di ranisa Abrahama a mu embela, khuye: “Ginani u giridego gwathu? Gihoso muni hi giridego gwago, gu kala u rana nandru nya wukhongolo ngudzu ga eni ni litigo langu latshavbo? Uwe u nyi girede esi si si yeligo gu girwa khu muthu.”

¹⁰Abhimeleki a di wudzisa gambe Abrahama, khuye: “Ginani u nga gi wona gu kala u gira kharati?”

¹¹Abrahama a di hakha, khuye: “Eni nyi di pimisa khu monyoni gwangu kheni, khu lisine tigoni momu gu mwalo githawo ga Nungungulu, va na nyi songa khu gufela mwangadzi wangu.

¹²Gu diga nya isoso, uye i ndriyangu furi khu lisine, gyanana nya guvelegwe khu babe wangu, aholu khandri gyanana gya mayi wangu, nyi di mu dzega gasi gu khala mwangadzi wangu.

¹³Avbo Nungungulu a nyi dzegidego a nyi gira mulegalegi hwindzo ni valongo vangu, eni nyi di embela mwangadzi wangu, kheni: U na nyi girela wuhindzi nya gu ni wevbini wulanga hi na vbohago, uwe u na khuwe eni nyi ndriyago.”

¹⁴Khavbo avbo, Abhimeleki a di dzega dzinvuta ni dzimombe, sithumi nya vama ni vanyamayi a ninga Abrahama, a mu bweledzela mwangadzi waye Sara.

¹⁵Abhimeleki a di engedza gambe a ganela, khuye: “Wona, litigo langu lomo mbeli gwago. U ngu dzi kodza guya vbaha avbo gwago u gunago.”

¹⁶A di embela Sara, khuye: “Wona, nyi ngu ninga ndriyago likhumi mazana (1.000) singerengere nya parata. Egi gi na khala avbo gwago kha nga gifenengelo mahoni gwa vatshavbo u vbanyago navo, uwe u agisidwe ga satshavbo sesi.”

¹⁷Abrahama a di lombelela ga Nungungulu, Nungungulu a di hawulugisa Abhimeleki, mwangadzi waye ni sithumi saye nya vanyamayi, gasi va kodze gu velega sanana.[9]

¹⁸Kholu PFHUMU Nungungulu a di bangisa mahembe ya vanyamayi vatshavbo va ndrangani ga Abhimeleki, va khala sifule khu kotani ya Sara, mwangadzi wa Abrahama.