Read gitonga Genesi 22 Bible Online

Genesi 22 - gitonga bible

Genesi 22

¹Hwane nya gugirege satshavbo sesi, Nungungulu a di linga Abrahama. A di mu rana, khuye: “Abrahama!” Abrahama a di hakha, khuye: “Nyi womo avba.”

²A di mu embela, khuye: “Dzega mwanago Isaki, gyanana gyago gya gimwegyo basi u gi golago ngudzu, u bela ndzilani u gu hongola tigoni ga Muriya. Nu vbohide iyoyo, u na mu songa u gira khuye mhamba nya phaso nya guvbiswe, gigomoni nyi na gu nonedzago.”

³Khavbo avbo, Abrahama a di wuga ni dzimindru ngudzu, a ambagisa sighwabhata giburwana, a dzega sithumi saye sivili, ni mwanaye Isaki, a di koka dzikhuni nya miphaso, a bela ndzilani nya guhongole wulanga a nga leletedwago khu Nungungulu.

⁴Khu litshigu nya wuraru, Abrahama a di khusa maho, a gu wona wulanga na ngari hwindzo.

⁵A di embela sithumi saye, khuye: “Enu tshalani avba ni giburwana. Eni ni gyanana hi na vbindra hi hongola mbeli hi ya khozela. Hi na wuya nugunugu hi ta mu mana avba.”

⁶Abrahama a di dzega dzikhuni nya miphaso a dzi handzega magatani ga mwanaye Isaki, uye a di phara nilo ni ngala mandzani, va bela ndzilani va vavili.

⁷Khavbo avbo, Isaki a di wudzisa babe waye Abrahama, khuye: “Ama baba!” Abrahama a di mu hakha, khuye: “Ganela, mwanangu.” Isaki a engedza, khuye: “Avba, hi na ni nilo ni dzikhuni; aholu yomo evbini nvuta nya miphaso?”

⁸Abrahama a di hakha, khuye: “Nungungulu a na hi ninga nvuta nya miphaso nya guvbiswe, mwanangu.” Khu guralo, va di gimbila gumogo vatshavbo.

⁹ Na va vbohide wulanga wule va nga leletedwago khu Nungungulu, Abrahama a di gira giluvelo, a gu handzega avbo dzikhuni, a hunga mwanaye Isaki, a mu handzega vbadzikhunitunu vbatshani nya giluvelo.

¹⁰Abrahama a di khusedza libogo a gu dusa ngala a vbweta gu paya gyanana gyaye.

¹¹Aholu, ngilozi ya Nungungulu yi di mu rana khu vbatshani Ndzadzini, khiyo: “Abrahama! Abrahama!” Uye a di hakha, khuye: “Nyi womo avba.”

¹²Yi di engedza gambe yi mu embela, khiyo: “U nga khusi libogo lago u songa gyanana, u nga gi bayisi. Olu nyi ngu wona gukheni u na ni githawo ga Nungungulu, kholu khwa nyi bombela mwanago, gyanana gyago gya gimwegyo basi.”

¹³Khavbo avbo, Abrahama a di khusa maho, a wona nvuta mweyo na yi khwetede khu dzikeho misimboni. A di yi dzega a gu gira khiyo mhamba nya miphaso nya guvbiswe, a dzegisa khiyo mwanaye.

¹⁴Abrahama a di rana wulanga wule khuye: “PFHUMU Nungungulu a na ninga phindrulo.” Kala na muhuno gu ganedwa gupwani: “Gigomoni a ningago phindrulo PFHUMU Nungungulu.”

¹⁵Khavbo avbo, ngilozi ya Nungungulu yi di rana gambe Abrahama nya wuvili khu vbatshani ndzadzini,

¹⁶khiyo: “Nyi ngu sambanya khu lina langu furi gu ganela Pfhumu gukheni, olu u giridego kharati, u si feleli gu nyi ninga mwanago, gyanana gyago nya gimwegyo basi,

¹⁷ Eni nyi na gu kategisa; nyi na engedzela livelego lago khu sanana nya singi ngudzu, nya gutale kha nga dzinyeledzi dza ndzadzini, kha nga mafu nya fungu wa phwani. Sanana sago si na khozisa valala vawe si gu va dzegela madhoropa yawe.

¹⁸Mayigo yatshavbo ya mafuni, ma na kategiswa khu ga melego wago, kholu uwe u yingiside magana yangu.”

¹⁹Khavbo avbo, Abrahama a di bwelela avbo si nga bani na siri avbo sithumi saye, va ya wuya vatshavbo gumogo Bherisebha, iyo a ngaya vbahago ndranga yaye.

²⁰Na si giregide satshavbo sesi, va dita tivisa Abrahama, khavo: “Milika nuye velegide livbandre na siraru sanana ni ndriyago Nahori.”

²¹Uzi khuye matiwula yakone, ni ndriyaye Bhuzi, Kemuweli babe wa Arani,

²²Kesedi, Hazu, Pilidasi, Judilafi ni Bhetuweli.

²³Bhetuweli khuye babe wa Rabheka. Khiso esi sanana nya livbandre na siraru a nga velega Milika ni Nahori, ndruye wa Abrahama.

²⁴Mwanagadzi waye nya wuvili, nya gupwani khu Rewuma a velegide nuye Teba, Gahami, Tahasini ni Mahaka.